လားရှိုးမြို့အနီး ယနေ့(အောက်တိုဘာ ၂၇ ရက်) နံနက်ပိုင်းတွင် တစ်ကြိမ် ညနေပိုင်း ၄ နာရီတွင်တစ်ကြိမ် စစ်ကောင်စီသည် လေကြောင်းဖြင့် ဗုံးကြဲတိုက်ခိုက်နေကြောင်း စုံစမ်းသိရသည်။

လားရှိုးမြို့အနီး ယနေ့ နံနက် ၄နာရီမှ စတင်ပြီး စစ်ကောင်စီနှင့် ညီနောင်မဟာမိတ် (၃)ဖွဲ့တို့ တိုက်ပွဲ ဖြစ်ပွားကာ စစ်ကောင်စီဘက်မှ အထိနာသဖြင့် လေကြောင်းအသုံးပြုပြီး ဗုံးကြဲတိုက်ခိုက်မှုပြုလုပ်လာကြောင်း သိရသည်။

“စစ်တပ်ကတော့ လေကြောင်းနဲ့တိုက်ခိုက်နေတယ်။ မနက် (၄)နာရီကနေ (၁၀)နာရီမှာ လေကြောင်းတိုက်တာ တစ်ကြိမ်၊ ညနေ ၄နာရီလောက်ကစပြီး လေကြောင်းနဲ့ ထပ်တစ်ကြိမ် ဗုံးကြဲတယ်” ဟု စစ်မြေပြင်တွင် နေထိုင်သည့် လားရှိုးဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

လက်ရှိ သတင်းရေးသားနေသည့် ညနေ ၄နာရီခွဲကျော် အချိန်ထိ စစ်ကောင်စီက လေယာဉ်အသုံးပြု တိုက်ခိုက်နေပြီး၊ လေယာဉ်ဖြင့် ကင်းလှည့်နေသည့် သဘောရှိကြောင်း ၎င်းကပြောသည်။

“သူတို့တွေ အင်အားအများကြီး ထပ်ဖြည့်တယ်ထင်တယ်။ အခုကျနော်အိမ်ကို ဗုံးလာမှန်တယ်။ အခုအိမ်ပြင်မထွက်ရဲသေးဘူး။ အိမ်က တောအုပ်နဲ့လည်း နီးတော့ လူရှိတယ်ထင်ပြီး ကျဲချတာလားမသိဘူး။ အခု လေယာဉ် ၃ စီး ထပ်တက်လာတယ်”ဟု လားရှိုးမြို့အနီးရှိ ကျေးရွာဒေသခံတစ်ဦးက သျှမ်းသံတော်ဆင့်ကို ပြောသည်။

စစ်ကောင်စီဘက်မှ လေယာဉ်ဖြင့် အသုံးပြုပြီး တိုက်ခိုက်နေသည့်အပေါ် ပြည်သူများက စိုးရိမ်နေကြကြောင်း တိုက်ပွဲထဲပိတ်မိနေသည့် အမျိုးသားက ဆိုသည်။

“အိမ်မှာကလဲ အသက် ၆၀ ကျော် အမေအို ကျန်နေသေးတော့ သူ့ကို စိုးရိမ်တာ။ ကျတော်တို့အိမ်က ၂ ထပ်အိမ်ဆိုတော့ အမေ့ကို ကုတင်အောက် ဝင်ပုန်းနေဖို့ ပြောထားရတယ်။ အိမ်နားမှာလဲ ဗုံးခိုကျင်းတူးထားတာလဲရှိတော့ အဲ့မှာသွားခိုဖို့ ပြောထားရတယ်”ဟု ၎င်းက ဆက်ပြောသည်။

လားရှိုးမြို့နယ်အတွင်းရှိ လားရှိုးမြို့နယ် မက်ခိနု၊ ပန်စိန်း၊ ကောင်းဖြို၊ ဝမ်မွန်းနှင့် ဟိုနမ့်ကျေးရွာတို့မှ ပြည်သူများသည် လားရှိုးမြို့ပေါ်ရှိ ဆွေမျိုးများနှင့် ဘုန်းကြီးကျောင်းများသို့ လာရောက်ခိုလှုံနေရသည်။

လက်ရှိတွင် လားရှိုးမြို့ သီရိမင်္ဂလာ မန်ဆူရှမ်းကျောင်းတွင် စစ်ဘေး‌ရှောင်ဦးရေ ၄၀၀ ခန့် ရောက်ရှိနေပြီး ဟိုပိတ်ကျေးရွာ ဘုန်းကြီးကျောင်းတွင်လည်း စစ်ဘေးရှောင်ဦးရေ ၂၀၀ ကျော် ရောက်ရှိခိုလှုံနေသည်ဟု လားရှိုး‌‌ဒေသခံများထံမှ သိရသည်။

“ခုနလေးတင်ပဲ မနက်တုန်းကလို လားရှိုး လေယာဉ်ကွင်းဘက်ကနေ လေယာဉ်သံတွေ ပြန်တက်လာတာ။ သူတို့ပြောသံကြားတာ အပြင်ကနေလဲ အင်အားတွေထပ်ဖြည့်ပြီး ဒီည လားရှိုးမြို့ထဲကို ဝင်လာမယ်ထင်တယ်”ဟု လားရှိုးမြို့ပေါ်ရှိ ဆွေမျိုးနေအိမ်တွင် စစ်ဘေးရှောင်နေသည့် အမျိုးသမီးတစ်ဦးက သျှမ်းသံတော်ဆင့်ကို ပြောသည်။

လားရှိုးမြို့နယ်ရှိ ဒေသခံပြည်သူများမှာ တိုက်ပွဲထပ်မံဖြစ်ပွားမည်ကို စိုးရိမ်လျက်ရှိကာ မြို့ပေါ်နှင့် ကျေးရွာဘုန်းကြီးကျောင်းများသို့ လာရောက်ခိုလှုံနေရသည်ဟု ဒေသခံများထံမှ သိရသည်။