ကချင်ပြည် ဖားကန့်မြို့နယ်အတွင်း အောက်တိန်း 92စက်သုံးဆီ ပြတ်လပ်နေ၍ စက်သုံးဆီ အရောင်းဆိုင်အချို့ ပိတ်ထားကြသောကြောင့် ဒေသခံများ အခက်တွေ့နေကြရကြောင်း ဖားကန့်မြို့ခံများထံမှ သိရသည်။
ပြီးခဲ့သည့် စက်တင်ဘာလပိုင်းမှ စတင်ကာ ကချင်ပြည် ဖားကန့်မြို့နယ်အတွင်း ခရီးသည်တင်ယာဥ်များမှ လွဲ၍ အခြားသော ကုန်တင်ယာဥ်နှင့် စက်သုံးဆီကားများကို ဖြတ်သန်းသွားလာခွင့်ပိတ်ထားသည်။
ထို့ကြောင့် စက်သုံးဆီ အရောင်းဆိုင်အချို့ ပစ္စည်းပြတ်လပ်ပြီး ဆိုင်များပိတ်ထားကြသောကြောင့် ဒေသခံများ၏ စက်သုံးဆီလိုအပ်ချက်သည် တနေ့ထက် တနေ့ မြင့်တက်လာသည်။
” နန့်ယား ဂိတ်ကနေ ဆီကားတွေကော ကုန်ကားတွေကော အကုန် ဖြတ်ခွင့်မပေးတော့တာ၊ဆီ ဝင်မှုမရှိတော့ ဆိုင်တွေလည်း ရောင်းစရာမရှိလေ အခု ၂ ဆိုင်လောက်ပဲ ဖွင့်တော့တယ်။ စျေးကလည်းတက်ပြီး လိုသလောက်ဝယ်မရတာက ဆိုးနေတာ” ဟု ဖားကန့်မြို့မှ ဒေသခံတစ်ဦးက သျှမ်းသံတော်ဆင့်ကို ပြောသည်။
လက်ရှိတွင် အောက်တိန်း 92စက်သုံးဆီအမျိုးအစားတစ်ဂါလံလျှင် ၂၁,၀၀၀ ကျပ်ဈေးဖြင့်ပေးဝယ်နေရသဖြင့် အခြေခံလူတန်းစားအဖို့ ခက်ခဲကြပ်တည်းနေကြရကြောင်းလည်း သိရသည်။
” အခုဟာက ကုန်ဈေးနှုန်းကလည်း မတရားတက်နေတာ 92 ဆီမှ မဟုတ်၊ စားတဲ့ ဆန် ဈေးကလည်း ၂ဆထိတက်နေတာ ရှာဖွေရတာ ခက်ခဲရတဲ့အထဲ ဒီလို ကုန်ဈေးနှုန်းတွေနဲ့ဆို ရေရှည်မှာ မလွယ်ဘူး” ဟု ကုန်စိမ်းရောင်းချသူတစ်ဦးမှလည်း ဆိုသည်။
ကုန်တင်ယာဥ်များ ဝင်ခွင့်မပေးတော့ချိန်မှစ၍ ပေါ်ဆန်းမွှေး ဆန်တစ်အိတ်လျှင် နှစ်သိန်းကျပ်ဝန်းကျင်နှင့် ဆန်ကြမ်းတစ်အိတ်လျှင် တစ်သိန်းခြောက်သောင်းကျပ် ဝန်းကျင်ထိ မြင့်တက်လျှက် ရှိနေကြောင်း ဒေသခံများထံမှ သိရသည်။
ဖားကန့်မြို့တွင် ပြီးခဲ့သည့် အောက်တိုဘာလ ၃ ရက် မနက် ၁၀ နာရီခန့်က ဆိုင်းတောင်ရွာ၏ စာသင်ကျောင်း အနီး၌ ပစ်ခတ်မှုများဖြစ်ပွားခဲ့ပြီးနောက် ဖားကန့်မြို့ အဝင်အထွက် ဂိတ်၌ စစ်ကောင်စီမှ ကန့်သတ်ချက်များ ထားရှိလာခြင်းဖြစ်ကြောင်း သိရသည်။
