သျှမ်းပြည် မိုင်းဖြတ်မြို့နယ် ကျေးရွာအတွင်း စိတ်ကြွဆေးရည်ဖြစ်သည့် K နှင့် Happy Water ကို အလွန်အကျွံသုံးစွဲပြီး သီချင်းကိုအသံချဲစက်ဖြင့် ဖွင့်ကာ ကခုန်နေကြကြောင်း ဒေသခံများ သတင်းပေးပို့ချက်အရသိရသည်။
Happy Water မူးယစ်ဆေးသည် ကော်ဖီအမှုန့်ပုံစံ ကော်ဖီနှင့် သစ်သီးအနံ့ အရသာ (၂) မျိုးရှိပြီး ကော့တေးခွက် ပမာဏကို ကျွဲရိုင်းအချိုရည်နှင့် ရောကာသောက်သုံးရသည့် စိတ်ကြွဆေးရည် တစ်မျိုးဖြစ်သည်။
K (ခေါ်) မူးယစ်ဆေးဝါးသည် မြေဖြူအမှုန့်ပုံစံ (အဖြူရောင်) ရှိပြီး ခပ်ရှရှအနံရှိကာ နှာခေါင်းဖြင့် ရှူရှိက်ရသုံးစွဲသည့် မူးယစ်ဆေးဖြစ်သည်။
ယခုရက်ပိုင်းအတွင်း မိုင်းဖြတ်မြို့နယ်ရှိ ကျေးရွာအတွင်း လူငယ်၊ လူလတ်ပိုင်းများ စိတ်ကြွဆေးရည်ကို အလွန်အကျွံ သုံးစွဲပြီး အသံချဲ့စက်ကို ဆူညံစွာဖွင့်ပြီး ကခုန်နေကြသဖြင့် ဘေးပတ်ဝန်းကျင်ကို စိတ်အနှောက်အယှက်ပေးနေကြောင်း ဒေသခံ အမျိုးသားတစ်ဦးက သျှမ်းသံတော်ဆင့်ကိုပြောသည်။
“ အခုရက်ပိုင်းလူငယ်တွေ K ၊ Happy water တွေကိုအလွန်အကျွံသုံးတဲ့ပုံစံလိုမျိုးပဲ။ ညညဆိုရင် စပီကာ အကျယ်ကြီးဖွင့်တယ်။ ဆေးအရှိန်နဲ့ ကခုန်အော်ဟစ်နေကြတာ။ ပတ်ဝန်းကျင်ကို အနှောက်အယှက်ပေးနေတာ” ဟု ၎င်းဒေသခံ အမျိုးသား ကဆိုသည်။
လက်ရှိမှာ စိတ်ကြွဆေးရည်ဖြစ်သည့် Happy Water တစ်ထုပ်ကို ထိုင်းဘတ်ငွေ ၈၀၀ နှင့် ၁,၀၀၀ ကြား ရောင်းချနေကြကြောင်း သိရသည်။
“ အွန်လိုင်းငွေလိမ်တဲ့ အဖွဲ့နေအိမ်တွေနဲ့ K Happy Water ရောင်းတဲ့သူတွေကို ထိရောက်စွာ အရေးယူပေးဖို့လိုတယ်။ ဒေသ အာဏာပိုင်တွေ၊ ရဲတပ်ဖွဲ့တွေဆီမှာ သွားတိုင်ရင်လည်း မဖမ်းပေးတဲ့အပြင် သူတို့ကိုယ်တိုင်က အဲ့ကနေ ငွေတွေရနေတာ “ ဟု ကျေးရွာနေဒေသခံ အမျိုးသားတစ်ဦးက ထပ်လောင်းပြောသည်။
အဆိုပါ မူးယစ်ဆေးဝါး ရောင်းချသူများသည် နမ့်နန်းအခါရွာ၊ ဟိုနားလားဟူရွာ၊ ဟိုနားအခါရွာ၊ နမ့်ဟွေလုံရွာ ယမ်းခမ်းရွာ စသည့်ရွာများမှ ဖြစ်ကြသည့် ကြံ့ခိုင်းရေးပါတီဝင် အမတ်ဟောင်းအပါ စီးပွားရေးလုပ်ငန်းရှင်များ ဖြစ်ကြောင်း သိရသည်။
