ကလေးငယ်ကို ရိုက်နှက်ခဲ့သည့် ဆရာမကို အရေးယူမှုမရှိသေး

သျှမ်းပြည် မိုင်းရှူးမြို့နယ် ဟိုနမ့်ရွာအတွင်း နေထိုင်သည့် ကလေးငယ်တစ်ဦး ဆရာမက ညိုမဲအောင် ရိုက်နှက်ခဲ့သော်လည်း လက်ရှိအချိန်ထိ အရေးယူမှု မရှိသေးကြောင်း စုံစမ်းသိရသည်။

ထိုရိုက်နှက်သည့် ညိုမဲသည့် ဒဏ်ရာကြောင့် ကလေးငယ်သည် စိတ်ပိုင်းဆိုင်ရာ ခံစားမှုပြသာနာ ကြုံတွေ့နေရကြောင်း ၎င်းနှင့်နီးစပ်သူတစ်ဦးက သျှမ်းသံတော်ဆင့်ကိုပြောသည်။

“ အခု လူကြောက်နေတယ်။ စကားမပြောရဲဘူး။ မျက်နှာလည်း မရွှင်ဘူး”ဟု ၎င်းက ဆိုသည်။

ပြီးခဲ့သည့် (အောက်တိုဘာလ ၉ ) ရက်တွင် မိုင်းရှူးမြို့နယ် ဟိုနမ့်ရွာရှိ အခြေခံ လူလတန်းကျောင်းမှ ပထမတန်းကျောင်သူ နန်းငင်းနွံသည် “ စားရမသေးဘူး “ ဆိုပြီး ဆရာမကိုပြောဆိုမိရာမှ ရိုက်နှက်ခံရပြီး ဦးခေါင်းနှင့် မျက်နှာတပြင်လုံး ညိုမဲစွဲအထိ ဒဏ်ရာရရှိခဲ့သည်။

အောက်တိုဘာလ ၁၁ ရက်မှ ယမန်နေ့ အောက်တိုဘာလ ၁၈ ရက်အထိ ခုနှစ်ရက်ကြာ ခိုလမ်မြို့ စစ်ဆေးရုံတွင် ဆေးဝါးကုသမှု ခံယူခဲ့ရသည်။

လက်ရှိ ကလေးငယ်၏ ကျန်းမာရေးမှာ ဆရာဝန်များ၏ပြောပြချက်အရ မျက်လုံးအနီးတဝိုက်နှင့် နားတွင် အရိုးအပ်ကွဲ ဒဏ်ရာရှိနေကြောင်း ၎င်းနှင့်ဆွေမျိုးတော်စပ်သူ နန်းဆိုင်ဟန်က ပြောသည်။

“ ဆရာဝန်တွေ ဓာတ်မှန်ရိုက်ကြည့်တော့ အပြင်ပိုင်းဒဏ်ရာတွေပဲ မြင်ရတယ်။ ဒါပေမယ့် အထဲမှာတော့ အရိုးကပ်ကွဲတဲ့ ဒဏ်ရာတွေ ရှိတယ်။ မျက်လုံး တဝိုက်နဲ့ နားတဝိုက်တွေမှာ အရိုးအပ်ကွဲတဲ့ ဒဏ်ရာတွေ ရှိတယ်လို့ ပြောတယ်။ ဆေးရုံကနေ ဆင်းသွားပြီဆိုရင် ဆရာဝန်ကပေးတဲ့ဆေးအတိုင်း သောက်ရင် သက်လာမယ်လို့ ပြောတယ် “ ဟု ရိုက်နှက်ခံရသည့် ကလေးငယ်ကျန်းမာရေးအခြေအနေကို နန်းဆိုင်ဟန်က ပြောသည်။

ရိုက်နှက်ခံရသည့် နန်းငင်းနွံတစ်ဦးသည် ဆရာမ၏ ဆဲဆိုပြောဆိုမှု၊ ပြင်းပြင်းထန်ထန် ရိုက်နှက်ချက်များကြောင့် လက်ရှိမှာ ရုပ်ပိုင်းဆိုင်ရာအပြင် စိတ်ပိုင်းဆိုင်ရာ ခံစားမှုပြသာနာ ကြုံတွေ့နေရကြောင်း သွားရောက်ကူညီ ခဲ့သည့် ဟိုလမ်မြို့ဒေသခံ အမျိုးသမီးတစ်ဦးက ပြောသည်။

“ ကလေးရဲ့အခြေအနေကတော့ လူတွေ့ရင် ကြောက်နေတယ်။ စကားသိပ်မပြောဘူး။ စိတ်ဒဏ်ရာ ရတယ်လို့တော့ ထင်တယ်။ သူ့ကိုသွားကြည့်တာတော့ စကားသိပ်မပြောဘူး။ မျက်နှာက ငေးငေးမှိုင်မှိုင် ဖြစ်နေတယ်။ ဦးခေါင်းကတော့ သက်သာလာပြီ။ ဒါပေမယ့် ဦးခေါင်းကို တုတ်နဲ့ရိုက်ခဲ့လို့ အာရုံကြောကနေ မျက်ကွင်းညိုလာတာ ဖြစ်နေတယ်။ ပြန်သက်လာမယ်လို့တော့ ဆရာဝန်ကပြောတယ် “ ဟု ဟိုလမ်မြို့ဒေသခံ အမျိုးသမီးတစ်ဦးက ပြောသည်။

ထို့အပြင် ကလေးငယ်ကို ရိုက်နှက်ခဲ့သည့် ကျောင်းဆရာမ နန်းနွန်းကို လက်ရှိမှာ မြို့နယ်ပညာအုပ်ချုပ်ရေးမှူးမှ အရေးယူထားကြောင်း သိရှိရပြီး အသေးစိတ်ကို ဆက်သွယ်မေးမြန်းရန် မရခဲ့ပေ။

ကလေးငယ်ကို အလွန်အကျွံ ရိုက်နှက်မိကြောင်း တောင်းပန်သည့်အနေဖြင့် (အောက်တိုဘာလ ၁၀ ရက်)က ဆရာမဖြစ်သူ နန်းနွန်းသည် ၎င်းနေအိမ်သို့ သွားရောက်ပြီး မုန့်ဖိုးဟုဆိုပြီး ကျပ်ငွေ ၅ သိန်း ပေးခဲ့ကြောင်း သိရသည်။

ပညာရေးဝန်းထမ်းများသည် ကလေးငယ်များအတွက် အလွန်အရေးပါသည့် ရှေ့ဆောင်လမ်းပြဖြစ်သဖြင့် ကလေးကို အကြမ်းမဖက်ဘဲ မှန်ကန်သည့်နည်းလမ်းဖြင့် သွန်သင်ဆုံးမသင့်ကြောင်း၊ ကျောင်းပျော်မှ စာတော်မည်ဟု မူလတန်းကျောင်း ဆရာမ နန်းခမ်းက မှတ်ချက်ပြုသည်။

“ ကလေးငယ်ကို အဲ့လိုတော့ ရိုက်လို့မရဘူး။ ကလေးဉာဏ်မီသလောက်ပဲ သင်ပေးရတာ။ ကလေး စာစိတ်ဝင်စားရင် စာရမယ်။ စိတ်မဝင်စားရင် မရဘူး။ အရင်ဆုံး ကလေးကို ကျောင်းပျော်အောင် ထားရမယ် “ ဟု မှန်ချက်ပြုသည်။

တစ်ဖက်တွင် စစ်တပ်ကအာဏာသိမ်းပြီးနောက်ပိုင်း သျှမ်းပြည်အတွင်း ပညာရေးဝန်ထမ်းရှားပါးလာမှုကြောင့် (၁၀) တန်း အောင်မြင်ပြီးသွားသည့် သူများကို တလလျှင် ကျပ်ငွေ ၁ သိန်းခွဲဖြင့် ကျောင်းဆရာ၊ ဆရာမအဖြစ် ပြည်သူလူထုမှ ခန့်အပ်နေရသည်။

အာဏာသိမ်းပြီးနောက်ပိုင်း မြန်မာတဝှမ်းလုံးမှ ပညာရေးဝန်းထမ်းများသည် အာဏာဖီဆန်ရေးလှုပ်ရှားမှု CDM ပြုလုပ်လာကြပြီး၊ တစ်ဖက်မှာလည်း နိုင်ငံရေး အခြေအနေကြောင့် လစာအခက်ခဲဖြစ်လာပြီး စစ်ကောင်စီ ပေးအပ်သည့် လစာမှာ မမှန်ကန်မှုကြောင့် ဝန်ထမ်းဘဝမှ ရပ်ဆိုင်းခဲ့သည်။

ဆီဆိုင်မြို့နယ် ကျောင်းသားမိဘတစ်ဦးက “ တကယ့် ဆရာ၊ ဆရာမတွေလောက်တော့ မမီဘူးပေါ့။ သင်တန်းတွေလည်း မတက်ရဘူး။ သူတို့ တက်သလိုသာ သင်နေရတာ။ ကိုယ့်ကလေးအတွက်တော့ စာသင်တဲ့အခါမှာ ကောင်းကောင်းနားမလည် နိုင်မှာကိုဘဲ စိုးရိမ်တယ် “ ဟု ၎င်းကျောင်းသားမိဘတဦးက ပြောသည်။

အာဏာသိမ်းပြီး ၂ ကျော်ကာလအတွင်း မြန်မာနိုင်ငံတဝှမ်းတွင် လူ့အခွင့်အရေး ချိုးဖောက်မှု ပိုမို များပြားလာပြီး၊ အဲ့ထဲမှ ပညာရေးဝန်ထမ်းများသည် ကျောင်းသား၊ ကျောင်းသူများကို ကလေးအခွင့်အရေး ချိုးဖောက်မှုကလည်း ယခင်ထက် ပိုများလာကြောင်း လူ့အခွင့်အရေးတက်ကြွလှုပ်ရှားသူမှ မှတ်ချက်ပြုလိုက်သည်။