သျှမ်းတောင်၊ ရွာငံမြို့နယ်တွင်ကျေးရွာ ဥက္ကဌ အပါအဝင် အမျိုးသား ၃ ဦးနှင့် အမျိုးသမီးတစ်ဦးကို စစ်ကောင်စီမှ ဖမ်းဆီးခေါ်ဆောင်သွားကြောင်း စုံစမ်းသိရှိရပါသည်။
ရွာငံမြို့နယ် သိမ်ကုန်းကျေးရွာ ဥက္ကဌ ဦးမောင်ထွဋ်နှင့်အတူ အသက် ၄၀ကျော် အမျိူးသား ၂ဦး နှင့် အသက် ၄၀ အရွယ် အမျိုးသမီး တစ်ဦးဖြစ်သည့် ဒေါ်မိုးဝါတို့ကို ယမန်နေ့ (မေ ၁၆)ရက် ညနေပိုင်းတွင် စစ်ကောင်စီတပ်သားများက လာရောက်ဖမ်းဆီးခေါ်ဆောင်သွားပြီး ယနေ့အချိန်ထိ အဆက်အသွယ်မရသေးကြောင်း ဖြစ်စဥ်ကိုသိရှိသည့် ဒေသခံ အမျိုးသမီးတစ်ဦး ကသျှမ်းသံတော်ဆင့်ကိုပြောသည်။
“ ရွာလူကြီးကိုလည်း ဖုန်းဆက်မရဘူး၊ ပြန်ဖမ်းသွားတယ်၊ မမိုးဝါကိုရော ဖမ်းသွားတယ်၊ တခြားလူတွေကိုလည်းခုထိ ဆက်သွယ် မရသေးဘူး။ ဘာကြောင့်ခေါ်သွားတာလဲ မသိဘူး၊ ခုထိ ဘာသတင်းမှ မရသေးဘူး၊”ဟု ဒေသခံ အမျိုးသမီးတစ်ဦးက ပြောပါသည်။
အလားတူ ရွာငံမြို့နယ် သိမ်ကုန်းကျေးရွာနေထိုင်သည့် အသက် ၄၀ကျော်အရွယ်ရှိ အမျိူးသားနှစ်ဦးကိုလည်း ယမန်နေ့ (မေ ၁၆ရက် ) ညနေပိုင်းတွင် ၎င်းတို့၏ နေအိမ်တွင် လာရောက်ဖမ်းဆီးသွားကြောင်း ရွာငံမြို့နယ် ဒေသခံများကပြောသည်။
“ စစ်တပ်က မနေ့က ညနေပိုင်းမှာ ကိုခင်မောင်ဌေးနဲ့ ကိုအောင်အောင်ကို လာဖမ်းသွားတယ်။ သူတို့ အိမ်ထိတက် ဖမ်းတယ်။ ဘာကြောင့်ဖမ်းလည်းဆိုတာတော့မသိဘူး”ဟု ဖြစ်စဥ်ကိုသိရှိသည့်အမျိုးသမီးက ဆိုပြန်သည်။
ထို့အပြင် ယမန်နေ့ ညနေပိုင်းတွင် စစ်ကောင်စီမှ ဖမ်းဆီးသွားသည့် ဒေါ်မိုးဝါသည် ၎င်း၏ အမျိုးသားကိုလည်း လွန်ခဲ့သည် ၂၀၂၃ခုနစ် ဇွန်လ ၁၃ရက်တွင်ဖမ်းဆီးခဲ့ပြီး၊ အကြမ်းဖက် တိုက်ဖျက်ရေး ဥပဒေပုဒ်မဖြင့် ထောင်ဒဏ် ၂၂ချမှတ်ခံရကာ နေအိမ်ပါချိတ်ပိတ်ခံခဲ့ရသည်။
ထို့နောက် ဒေါ်မိုးဝါသည် သိမ်းကုန်ကျေးရွာ ဥက္ကဌ ၏ နေအိမ်တွင် နေပြီး လက်ဖက်ရောင်းဝယ်လုပ်ကိုင်နေသူဖြစ်သည်။
“ မနှစ်ကလည်း သူ့ (ဒေါ်မိုးဝါ) ယောကျာ်းက ဖမ်းသွားတော့ သူ့အိမ်လည်း ချိတ်ပိတ်ခံရတယ်လေ။ သူကနေစရာ မရှိတော့ သိမ်ကုန်းကျေးရွာလူကြီးအိမ်မှာ နေနေတာ။ အခု သူ့ကို ဘာလို့ ဖမ်းသွားလဲ မသိဘူး” ဟု ၎င်း အမျိုးသမီးက ဆိုသည်။
ထို့အပြင် ယမန်နှစ် ဇွန်လ ၁၃ရက်တွင် ဒေါ်မိုးဝါ၏ အမျိုးသား နှင့် အတူ ယမန်နေ့က ဖမ်းဆီးခံရသည့် သိမ်ကုန်းကျေးရွာ ဥက္ကဌကိုလည်း စစ်ကောင်စီက ဖမ်းဆီးခဲ့ရာ ဇွန် ၁၈ရက်တွင် ဥက္ကဌကို ပြန်လွှတ်ပေးခဲ့သည်။
လက်ရှိမှာ သိမ်ကုန်းကျေးရွာ ဥက္ကဌကို မည်သည့်အကြောင်းပြချက်ဖြင့် ပြန်ဖမ်းသည်ကို မသိရှိသေးပေ။
အလုပ်သင်သတင်းထောက်ရေးသားသည်။
Leave a Comments