သျှမ်းပြည် ကျောက်မဲ-မိုင်းငေါ့ကားလမ်းဘေးရှိ နမ့်မန်းရွာတွင် နာမည်ကြီးနေသည့် ” နတ်ဆေးရည်” တောင်ကျချောင်းရေ ကို သွားရောက်ချိုးစဥ် အမျိုးသမီး တစ်ဦးချော်လဲပြီး သေဆုံးသွားကြောင်း ဒေသခံများပြောပြချက်အရသိရသည်။
အောက်တိုဘာ ၁၇ ရက်တွင် နမ့်ဆန်မြို့နယ် မြို့သစ်ရွာနေ အသက်(၄၀)ကျော်အရွယ် ဒေါ်မြထွန်း ဆိုသူ အမျိုးသမီးသည် ကျောက်မဲ-မိုင်းငေါ့ကားလမ်းဘေးရှိ နမ့်မန်းရွာတွင် တောင်ကျချောင်းရေ သွားချိုးရာ ဗွက်ထဲ၌ ချော်လဲပြီး သေဆုံးသွားသည်ဟု မိုင်းငေါ့မြို့ခံ တစ်ဦးက သျှမ်းသံတော်ဆင့်ကို ပြောသည်။
“ဟုတ်တယ်။ ရေချိုးတဲ့နေရာမှာ ချော်လဲတာ။ အဲ့မှာက လုပြီး ရေချိုးကြတာ၊ ဗွက်တွေနဲ့ဆိုတော့ အချင်းချင်း တိုက်မိကြရင်း တစ်ယောက်က ချော်လဲပြီး သေသွားတာ၊ နောက်တစ်ယောက်ကတော့ လေဖြတ်သွားတယ်၊ နတ်ကိုင်တာတော့ မဟုတ်ဘူး”ဟု မိုင်းငေါ့မြို့ခံတစ်ဦးက သျှမ်းသံတော်ဆင့်ကို ဆက်ပြောသည်။
သဘာဝအတိုင်း တောင်ကျရေထွက်သည့် ထိုနေရာသည် ယခင်ကတည်းက ကျောက်မဲ-မိုင်းငေါ့သို့ ပြေးဆွဲသည့်ကားများ ခရီးတစ်ထောက် ရပ်နားကြပြီး တောင်ပေါ်ရွာများမှ လက်ဖက်ကုန်သည်များ ကုန်ပစ္စည်းဖလှယ်သည့် နေရာဖြစ်သည်။
ယခုအခါ နတ်ဆေးရည်ဟု နာမည်ကြီးပြီးနောက် ၎င်းနေရာသို့ ကျောက်မဲ၊ မိုင်းငေါ့၊ နမ့်ဆန်၊ သီပေါ၊ နမ့်လန်မြို့တို့မှ ပြည်သူများ တစ်ရက်လျှင် ရာနှင့်ချီ လာရောက်ကြကြောင်း သိရသည်။
“အခုလူတွေ ကျိတ်ကျိတ်တိုးပြီး ရေသွားချိုးကြတဲ့ နတ်ဆေးရည် ဆိုတာ တကယ်မဟုတ်ဘူး။ အရင်တုန်းက နတ်ဆေးရည် ဆိုပြီးတော့လဲ မကြားဖူးဘူး။ သောက်ဖို့ သုံးဖို့ တောင်ကျရေကတော့ တကယ်ရှိပါတယ်။ ဒီရေချိုးပြီး လေဖြတ်တာပျောက်တယ်တို့၊ အကြောလွဲတာ ပျောက်တယ်လို့တော့ မွေးကတည်းက အခုအသက် ၃၀ ကျော်အထိ တခါမှ အဲ့လိုမျိုး မကြားဖူးဘူး”ဟု နမ့်မန်းရွာတွင် နေထိုင်ခဲ့ဖူးသည့် နန်းလှက သျှမ်းသံတော်ဆင့်ကို ပြောသည်။
ကျောက်မဲမြို့မှ မိုင်းငေါ့မြို့သွားရာလမ်းရှိ နမ့်မန်းရွာသည် ယခင်က အိမ်ခြေ ၁၅ အိမ်ခန့် ရှိပြီး ၂၀၂၀ ခုနှစ် ဝန်းကျင်က RCSS နှင့် TNLA တပ်ဖွဲ့တို့၏ တိုက်ပွဲများကြောင့် ရွာပျက်ခဲ့သည်။
Leave a Comments