သျှမ်းပြည် ကွတ်ခိုင်မြို့နယ် မိုင်းယုလမ်းခွဲဆိုင်းဘုတ်တွင် မူရင်းရေးသားထားသည့် သျှမ်းစာနှင့် မြန်မာစာများ ဖျက်ဆီးခံလိုက်ရပြီး တအာင်း(ပလောင်)စာဖြင့် အစားထိုး ရေးသားထားကြောင်း စုံစမ်းသိရသည်။

မေလ ၅ ရက် နံနက်(၉)နာရီခန့်တွင် ကွတ်ခိုင်မြို့နယ် မိုင်းယုကျေးရွာအနီး လှုပ်ရှားနေသည့် တအာင်း(ပလောင်) အမျိုးသား လွတ်မြောက်ရေးတပ်မတော် TNLA တပ်သားများမှ မိုင်းယုနှင့် ပန်လော့ကျေးရွာအုပ်စုရှိ ကျေးရွာအုပ်ချုပ်ရေးမှူးများကို အစည်းအဝေး ခေါ်ယူ၍ မိုင်းယုလမ်းခွဲရှိ ရွာဝင်ဆိုင်းဘုတ်ကို ဖျက်ဆီးသွားမည်ဖြစ်ကြောင်း ပြောဆိုခဲ့သည်ဟု မိုင်းယုဒေသခံများက ပြောသည်။

“၅ ရက်နေ့က ဆိုင်းဘုတ်ဖျက်ဖို့ TNLA အစည်းအဝေး ခေါ်ပြောတာ။ အဲ့မှာ ရွာသူကြီးတွေက သဘောမတူတော့ နောက်ဆုံးကျတော့ မဖျက်ဘဲနဲ့ သျှမ်းစာတစ်ဘက်၊ ပလောင်စာတစ်ဘက် ရေးပေးမယ်လို့ ပြောတာ။ ဆေးသုတ်တာလဲ သူတို့ပဲ လုပ်မယ်လို့ ပြောတာပေါ့”ဟု အစည်းအဝေး တက်ရောက်သူခဲ့များနှင့် နီးစပ်သည့် ဒေသခံတစ်ဦးက သျှမ်းသံတော်ဆင့်ကို ပြောသည်။

ထိုစဉ်က ကျေးရွာအုပ်ချုပ်ရေးမှူးများအနေဖြင့် ၎င်းကိစ္စကို သဘောမတူခဲ့သော်လည်း မေလ ၈ ရက်တွင် မိုင်းယုလမ်းခွဲဆိုင်းဘုတ်သို့ အလုပ်သမားများ ရောက်ရှိလာခဲ့ပြီး သျှမ်းစာနှင့် မြန်မာဘာသာဖြင့် ရေးသားထားသော အမည်များနှင့် သျှမ်းအလံ၊ သာသနာ့အလံများအား ဖျက်ဆီးခဲ့ကာ တအာင်း(ပလောင်)စာဖြင့် အစားထိုး ရေးသားလိုက်ကြောင်း မိုင်းယုဒေသခံများထံမှ သိရသည်။

ယခုကဲ့သို့ ကွတ်ခိုင်မြို့နယ် မိုင်းယုလမ်းခွဲဆိုင်းဘုတ် ဖျက်စီးခံရပြီး တအာင်း(ပလောင်)စာဖြင့် အစားထိုး ရေးသားလိုက်ခြင်းနှင့် ပတ်သက်ပြီး TNLA တပ်ဖွဲ့ သတင်းနှင့် ပြန်ကြားရေးဌာနသို့ သျှမ်းသံတော်ဆင့်မှ ဆက်သွယ်မေးမြန်းခဲ့သော်လည်း ပြန်လည်ဖြေကြားခြင်း မရှိပေ။

“ဆိုင်းဘုတ်ကို ဒီလိုမျိုး လုပ်သွားမယ်လို့ ဘယ်ထင်မလဲပေါ့ဗျာ။ ရွာသားတွေရဲ့ သဘောမပါဘဲနဲ့ အခုလို အစားထိုးရေးခံလိုက်ရတာ။ ဒီဆိုင်းဘုတ် ဖြစ်လာဖို့ကလည်း ရွာသားတွေရဲ့ လူအား၊ ငွေအားနဲ့ လုပ်ခဲ့တာဆိုတော့ TNLA က အခုလိုလုပ်တာ လုံးဝမသင့်တော်ဘူး”ဟု ကွတ်ခိုင်မြို့နယ် မိုင်းယုဒေသခံ ၎င်းအမျိုးသားက သျှမ်းသံတော်ဆင့်ကို ဆက်ပြောသည်။

မိုင်းယုကျေးရွာအုပ်စုသည် ကွတ်ခိုင်မြို့နှင့် ၂၅ မိုင်ခန့် ကွာဝေးပြီး ကွတ်ခိုင်နှင့် နမ့်ဖတ်ကာကျေးရွာအကြားရှိ ပြည်ထောင်စုလမ်းမကြီးမှတဆင့် လမ်းခွဲဝင်ရောက်သွားရကြောင်း သိရသည်။

ပြီးခဲ့သည့် ဧပြီလ နောက်ဆုံးပတ်အတွင်းကလည်း ကွတ်ခိုင်မြို့ကို ထိန်းချုပ်ထားသည့် တအာင်း(ပလောင်)တပ်ဖွဲ့ TNLA နှင့် ကိုးကန့်တပ်ဖွဲ့ MNDAA တို့ အုပ်ချုပ်ရေးယန္တယား ဖော်ဆောင်ရန်အတွက် နယ်မြေစိုးမိုးမှုနှင့် ပတ်သက်၍ ညီနောင်မဟာမိတ် အချင်းချင်းကြား စစ်ရေးတင်းမာခဲ့ပြီး ကချင်လွတ်မြောက်ရေးတပ် KIA နှင့်လည်း စစ်ရေးပဋိပက္ခ ပွတ်တိုက်မှု ဖြစ်ပွားခဲ့ကြောင်း ကွတ်ခိုင်ဒေသခံများက ပြောသည်။

လက်ရှိတွင် ကွတ်ခိုင်မြို့နယ် မိုင်းယုကျေးရွာအုပ်စုအတွင်း သျှမ်းတပ် SSPP/SSA ၊ ကချင်လွတ်လပ်ရေးတပ် KIA ၊ တအာင်း(ပလောင်)တပ်ဖွဲ့ TNLA နှင့် ကိုးကန့်တပ်ဖွဲ့ MNDAA တို့ သွားလာလှုပ်ရှားနေသည်။