သျှမ်းပြည် သိန္နီမြို့နယ် ကွန်ကောက်ကျေးရွာအုပ်စုမှ ကျေးရွာအတွင်း နေရပ်ပြန်သွားသည့် စစ်ရှောင်များသည် တောင်ယာသို့သွားရန်အတွက် မြေမြုပ်မိုင်းအန္တရာယ်ကို စိုးရိမ်နေရကြောင်း စုံစမ်းသိရသည်။
အောက်တိုဘာလ (၆) ရက်မှစတင်၍ ကွန်ကောက်ကျေးရွာအတွင်း စစ်ကောင်စီနှင့် ကချင်လွတ်လပ်ရေး တပ်ဖွဲ့တို့အကြား လက်နက်ဖြင့် အပြန်အလှန် ပစ်ခတ်တိုက်ခဲ့ရာ ဒေသခံ (၅၀၀) နီးပါးက ဘုန်းကြီးကျောင်း၊ ကျေးရွာနှင့် ဆွေမျိုးမိတ်ဆွေများထံ ထွက်ပြေးခဲ့ရသည်။
တိုက်ပွဲကြောင့် ထွက်ပြေးတိမ်းရှောင်နေရသည့် စစ်ရှောင်များသည် အောက်တိုဘာလ ၁၂ရက်တွင် စိုးရိမ်စိတ်ဖြင့် နေရပ်ပြန်သွားကြသည်။
ထို့ကြောင့် လက်နက်ကိုင်တပ်ဖွဲ့များ လှုပ်ရှားသွားလာခဲ့သည့် လမ်းကြောင်းနှင့် တိုက်ပွဲများဖြစ်ပွားခဲ့သည့် နေရာသည် ၎င်းတို့၏ တောင်ယာစိုက်ခင်းအနီးတွင် ဖြစ်ခဲ့သဖြင့် တောင်ယာသွားရန် မြေမြုပ်မိုင်း အန္တရာယ်ကို စိုးရိမ် နေရကြောင်း ဒေသခံ အမျိုးသမီးတစ်ဦးက ပြောသည်။
“ အခုထိ တောင်ယာသွားရင် မြေမြုပ်မိုင်းတွေ စိုးရိမ်နေရသေးတယ်။ ဘယ်နေရာမှာ မြုပ်မှန်းမသိဘူးလေ။ တိုက်ပွဲဖြစ်ပွားခဲ့နေရာတွေ၊ ရွာနဲ့အရမ်းတဲ့ နေရာတွေဆို သွားရမှာကို ကြောက်နေရတယ်။ တောတောင်ထဲမှာ နွားတွေ၊ ကျွဲတွေ သွားကျောင်းမှာလည်း စိတ်မလုံမခြုံခံစားနေရတယ် “ ဟု ၎င်းအမျိုးသမီးတစ်ဦးက ပြောသည်။
စစ်ရှောင်များ ထွက်ပြေးတိမ်းရှောင်နေစဉ် ကာလအတွင်း ပြောင်းချိုးရာသီဖြစ်သော်လည်း လက်ရှိမှာ မချိုးရသေးသည့် ပြောင်းခင်းဧက အများအပြားကျန်ရှိသေးကြောင်း ၎င်းကဆက်ပြောသည်။
သိန္နီမြို့နယ်အတွင်း တိုက်ပွဲသည် ငြိမ်သက်နေသော်လည်း ကချင်လွတ်လပ်ရေး တပ်မတော် (KIA) ဘက်မှ အခွန် (ဆက်ကြေး) ဆက်တိုက်ကောက်ခံနေသေးကြောင်း ဒေသခံတောင်သူ အမျိုးသမီးတစ်ဦးက ပြောသည်။
“ တိုက်ပွဲကတော့ ငြိမ်နေတယ်ဆိုပေမယ့် အခွန် (ဆက်ကြေး) ကတော့ ဆက်တိုက်ကောက်ခံနေတုန်းပဲ။ ကားတွေ ရပ်ခိုင်းပြီး ကားသော့သိမ်းတာ၊ လိုင်စင်ကားသိမ်းတာ လုပ်နေတယ်။ အိမ်ပြန်လာရတော့လည်း တမျိုးတမျိုး စိတ်ပူနေရတယ် “ ဟု ဒေသခံတောင်သူ အမျိုးသမီးတစ်ဦးက ပြောသည်။
အလားတူ အောက်တိုဘာလ ၁၀ ရက်တွင်လည်း သိန္နီမြို့နယ်အတွင်း တိုက်ပွဲဖြစ်ပွားခဲ့ရာ စစ်ကောင်စီသည် ကွန်ကျေးရွာအတွင်းရှိ ဘုန်းကြီးကျောင်းဝန်းအတွင်းသို့ နေရာယူပြီး တောင်ပေါ်တွင် နေရာယူထားသည့် ကချင် လွတ်လပ်ရေး တပ်မတော် (KIA) ရှိရာသို့ လက်နက်ကြီးဖြင့် ပစ်ခတ်ခဲ့သည်။
စစ်ကောင်စီဘက်မှ ပစ်ခတ်လိုက်သော လက်နက်ကြီးကြောင့် (အောက်တိုဘာ ၉ )ရက်တွင် ကောင်းချိုကျေးရွာ အတွင်း ကျရောက်ပေါက်ကွဲရာ ကိုယ်ဝန်သည်အမျိုးသမီးတစ်ဦး ထိခိုက်ဒဏ်ရာခဲ့သလို၊ နှစ်ဖက်တပ်ဖွဲ့ ပစ်ခတ်မှုကြောင့် နေအိမ်အဆောက်အဦး၊ ဘုန်းကြီးကျောင်းဆောင်များလည်း ပျက်စီးခဲ့ရသည်။
လက်ရှိ သိန္နီမြို့နယ်အတွင်း စစ်ကောင်စီနှင့် ကချင်လွတ်လပ်ရေး တပ်မတော် (KIA) တို့ စစ်ရေးလှုပ်ရှားမှု တင်းမာမှုရှိနေသေးသဖြင့် အချိန်မရွှေးတိုက်ပွဲဖြစ်ပွားလာမည်ကို ဒေသခံများက စိုးရိမ်နေကြောင်း ပြောသည်။
Leave a Comments