သျှမ်းပြည် လားရှိုးခရိုင်၊ သိန္နီမြို့နယ် ဟိုမိန်းဘုန်းကြီးကျောင်းရောက် စစ်ရှောင်များသည့် ယနေ့ (အောက်တိုဘာ ၁၂)ရက်တွင် စိုးရိမ်စိတ်ဖြင့် နေရပ်ပြန်သွားကြောင်း စုံစမ်းသိရသည်။
သိန္နီမြို့နယ်၊ ကွန်ကောက်ကျေးရွာအုပ်စုအတွင်း အာဏာသိမ်း စစ်ကောင်စီ နှင့် ကချင်လွတ်လပ်ရေး တပ်မတော် (KIA) တို့ လက်နက်ကြီးဖြင့် အချင်းချင်း အပြန်အလှန် ပစ်ခတ်မှုကြောင့် ဟိုမိန်းကျောင်းသို့ ရောက် စစ်ဘေးရှောင်များသည် စုစုပေါင်း (၁၀၀) ကျော် နီးပါး ရှိသည်။
လက်ရှိမှာ တိုက်ပွဲငြိမ်းသက်နေသဖြင့် ယနေ့ အောက်တိုဘာလ (၁၂) ရက်တွင် သိန္နီမြို့နယ်၊ ဟိုမိန်းဘုန်းကြီးကျောင်း၌ ရောက်ရှိနေကြသည့် ကွန်ကောက်ကျေးရွာအုပ်စုမှ ဒေသခံများ ဖြစ်ကြသည့် ကျေးရွာ (၅) ရွာမှ စစ်ဘေးရှောင်များ စိုးရိမ်စိတ်ဖြင့် နေရပ်ပြန်ရသည်။
ထိုစစ်ရှောင်များ ပြန်သည့် ကျေးရွာအနီးတွင်စစ်တပ်မှ နေရာယူထားသဖြင့် တိုက်ပွဲဖြစ်ပွားမည်ကို စိုးရိမ်နေကြောင်း စစ်ရှောင်ကူညီပေးနေသည့် အမျိုးသားတစ်ဦးက သျှမ်းသံတော်ဆင့်ကိုပြောသည်။
“တိုက်ပွဲတော့ ထပ်မဖြစ်တော့ဘူးလေ။ အဲ့ကြောင့် ပြောင်းဖူးတွေ ချိုးဖို့၊ လယ်တွေကို ကြည့်ဖို့၊ ကျွဲ နွားတွေ ပြန်ရှာဖို့ စတဲ့ စိုးရိမ်စိတ်တွေလည်း ရှိကြတော့ ပြန်သွားကြပြီ။ တချို့လည်း မနေ့ကတည်းက ပြန်သွားကြတာ။ ဒီနေ့တော့ အကုန်လုံး ပြန်သွားကြပြီ” ဟု စစ်ရှောင် ကူညီပေးသူ အမျိုးသားက ပြောသည်။
လက်ရှိတွင် ပစ်ခတ်မှု မရှိသောကြောင့် စစ်ရှောင်များက နေရပ်ပြန်သွားကြသော်လည်း စစ်ကောင်စီ တပ်နှင့် (KIA) တပ်တို့က ကျေးရွာအနီး ဆက်လက်နေရာယူထားကြောင်းလည်း အသက် (၄၀) ကျော်ရှိ ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
“စစ်ကောင်စီကတော့ ပါကန်းရွာ (ဝၢၼ်ႈပႃၵၢင်း) နား အနီးတစ်ဝိုက်မှာ ရှိနေတုန်းပဲ၊ KIA ကတော့ နောင်မောင်းရွာ (ဝၢၼ်ႈၼွင်မွင်း) ဘက်မှာပေါ့။ ဦးဇင်းတွေက အခြေအနေမကောင်းရင် ပြန်လာကြဖို့ စစ်ရှောင်တွေကို ပြောသွားပါတယ်။ ဒေသခံတွေလည်း အလုပ်တွေပျက်၊ စစ်ရှောင်တာ ရက်ကြာလို့ နေရပ်ပဲ ပြန်ချင်ကြတာပေါ့” အသက် (၄၀) ဝန်းကျင် အမျိုးသားက သျှမ်းသံတော်ဆင့်ကို ပြောသည်။
နေရပ်ပြန်သွားသည့် စစ်ဘေးရှောင်များသည် ကွန်ကောက်ကျေးရွာအုပ်စုမှ ဝမ်ဟေကျေးရွာ (ဝၢၼ်ႈႁေႈ)၊ နောင်မောင်းကျေးရွာ (ၼွင်မွင်း)၊ ပိန်းဟုန်းကျေးရွာ (ပဵင်းႁုင်း)၊ ပိန်းကန်းရွာ (ပဵင်းၵၢင်း) နှင့် ကွန်ကောက်ကျေးရွာ (ၵုၼ်ၵွၵ်ႇ) တို့ ဖြစ်ကြသည်။
အာဏာသိမ်းတပ်နှင့် (KIA) တပ်တို့သည် ပြီးခဲ့သည့် အောက်တိုဘာလ (၇) ရက်နေ့တွင် လက်နက်ကြီး ဖြင့် အချင်းချင်း ပစ်ခတ်မှု စတင်ခဲ့ရာ ကျေးရွာအတွင်း လက်နက်ကြီး ကျရောက်ပေါက်ကွဲပြီး လူနေအိမ် ထိခိုက်ပျက်စီးခြင်း၊ ဘုန်းကြီးကျောင်း ထိမှန် ပျက်စီးခြင်း နှင့် အရပ်းသားများလည်း ထိခိုက်ဒဏ်ရာရမှု ရှိခဲ့သည်။
လက်ရှိတွင် နေရပ်မပြန်ရသေးသေည့် မြို့ပေါ်ရှိ အမျိုးများထံသို့ စစ်ရှောင်နေသည့် ဒေသခံများ ကလည်း ၁၀၀ ကျော်နီးပါး ရှိနေကြောင်းလည်း သိရသည်
Leave a Comments