သျှမ်းပြည် သိန္နီ-ကွမ်လုံ ကားလမ်းပိုင်းတွင် လက်နက်ကိုင်တပ်ဖွဲ့များစောင့်ပြီး အခွန် (ဆက်ကြေး) ကောက်ခံမှုကြောင့် ပြောင်းစိုက်တောင်သူများအပေါ် ပြောင်းဈေးနှုန်းရိုက်ခတ်လာနေကြောင်း စုံစမ်းသိရသည်။

ယခု သီတင်းပတ်အတွင်း သိန္နီ-ကွမ်လုံ ကားလမ်းပိုင်းတွင် ကချင်လွတ်မြောက်ရေးတပ်မတော် (KIA) မှ ကုန်တင်ကားကြီးများကို ကားဘီး ၁ ဘီးလျှင် ၁၀ သိန်းမှ ၁၅ သိန်းအထိ ကောက်ခံနေကြောင်း သိန္နီမြို့ဒေသခံ ပြောင်းစိုက်တောင်သူ တစ်ဦးက သျှမ်းသံတော်ဆင့်ကို ပြောသည်။

“ ကွန်ကောက်ရွာမှာ KIO/ KIA တွေလာနေပြီး အခွန်ကောက်နေတာ ၇ ရက်ကျော်နေပြီ။ အိမ်စီးကားတွေတော့ သူတို့မကောက်ဘူး။ ကုန်တင်ကားကြီးတွေ ကောက်နေတာ။ ကုန်တင်ကားတွေက သူတို့ကားဘီးနဲ့ တွက်ပြီး ၁ ဘီးကို ၁၀ သိန်းကနေ ၁၅ သိန်းအထိ တောင်းတယ်။ ကုန်များများတင်ရင် သူတို့များများတောင်းတယ် “ ဟု ၎င်းက ပြောသည်။

အဆိုပါ ကုန်တင်ကားလမ်းပိုင်းအတွင်း အခွန် (ဆက်ကြေး) ကောက်ခံမှုကြောင့် ပြောင်းကုန်သည်များအပေါ် ထိခိုက်ခဲ့ရာ ပြောင်းစိုက်တောင်သူများကို ပြောင်းဈေးနှုန်း နှိမ်ပြီးဝယ်ယူမှုတွေ ရှိနေကြောင်း သိရသည်။

“ အခုမြေသြဇာတွေက တရုတ်၊ ထိုင်းကနေ လာတော့ဈေးကြီးပေးပြီး ဝယ်ရတယ်။ အဲ့အပြင် လုပ်အားခ စရိတ်တွေကလည်း ပေးရသေးတယ်။ ကုန်သည်တွေကတော့ သူတို့မမြတ်ရင် သူတို့မလုပ်ဘူးလေ။ လမ်းမှာအခွန်တွေ များများဆောင်ရရင် သူတို့လည်းအမြတ်ရဖို့က သိပ်မရှိတော့ ပြောင်း ၁ ပိဿကို ၁ ထောင်ကျပ်နဲ့ ပေးဝယ်မယ့်အစား ၁ ပိဿကို ၉၀၀ ကျပ်လောက် ဈေးနိမ်ပြီး ဝယ်တော့တာ “ ဟု ပြောင်းစိုက်တောင်သူတစ်ဦးက ထပ်လောင်းပြောသည်။

လက်ရှိမှာ သိန္နီမြို့နယ်အတွင်း စစ်ကောင်စီနှင့် ကချင်လွတ်မြောက်ရေးတပ်မတော် (KIO/KIA) တို့အကြား စစ်ရေး တင်းမာနေလျက်ရှိသောကြောင့် ကုန်တင်ကားများလည်း ပိတ်မိနေကြောင်း သိရသည်။