သျှမ်းပြည် သိန္နီမြို့နယ်အတွင်း အာဏာသိမ်း စစ်ကောင်စီ တပ်ဖွဲ့က စစ်အင်အားထပ်မံ ဖြည့်တင်း နေပြီး စစ်ရှောင်များ နေရပ်မပြနိုင်ကြသေးကြောင်း စုံစမ်းသိရသည်။
ယနေ့( စက်တင်ဘာလ ၁၀) ရက် နံနက်ပိုင်း ၈ နာရီဝန်းကျင်တွင် သိန္နီမြို့နယ်၊ စယ်အူကျေးရွာ အုပ်စု၊ ဆာမိုင်ရွာ (ဝၢၼ်ႈသႃႇမႂ်ႇ) အတွင်းသို့ စစ်ကောင်စီ စစ်ကြောင်း ဖြတ်သွားကြောင်း ဒေသခံ အမျိုးသား တစ်ဦးက သျှမ်းသံတော်ဆင့်ကို ပြောသည်။
“စုစုပေါင်း အင်အား (၅၀) လောက်တော့ ရှိတယ်၊ သေနတ်ကိုယ်စီနဲ့ တချို့လည်း လက်နက်ကြီးထမ်းပြီး တော့ ရွာထဲကို ဖြတ်လျှောက်သွားတာ၊ ကွန်ကောက်ကျေးရွာဘက်ကို ဦးတည်သွားတာ တွေ့ရတယ်။ အားလုံးက လမ်းလျှောက်သွားကြတာ” ဟု ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
စယ်အူကျေးရွာ နှင့် ကွန်ကောက်ကျေးရွာအုပ်စုသည် (၁၀) မိုင်ခန့်သာကွာဝေးပြီး ကား ၊ ဆိုင်ကယ်ဖြင့် မောင်းနှင်ပါက တစ်နာရီပင် မရှိကြောင်းလည်း သိရသည်။
လက်ရှိတွင် ကွန်ကောက်ကျေးရွာအုပ်စု တန့်ခန်ကျေးရွာ (ဝၢၼ်ႈတၢင့်ၶၢၼ်) နှင့် နောင်မောင်းကျေးရွာ (ဝၢၼ်ႈၼွင်မွင်း) ကျေးရွာကြား၌ KIA တပ်ဖွဲ့လည်း ရှိနေသည့်အတွက် နှစ်ဖက်တပ်ဖွဲ့ အကွာအဝေးက မြေပြင်ထိတွေ့မှု ဖြစ်နိုင်ကြောင်းလည်း အထက်ပါ ဒေသခံက သျှမ်းသံတော်ဆင့်ကို ဆက်ပြောသည်။
“KIA တပ်က ကွန်ကောက်ရွာထဲကနေ ဆုတ်သွားပြီး တုန့်ခန် နဲ့ နောင်မောင်းကြား တောအစပ်မှာစခန်းချ နေနေတယ်။ ဒါပေမဲ့ ရွာနဲ့ နီးပါတယ်။ စစ်ကောင်စီဘက်က စစ်အင်အားတွေ ထပ်ပြီးဖြည့်လာနေတော့ မြေပြင်ထိတွေ့တိုက်ပွဲဖြစ်မှာကြောက်တယ်။ အရင်နေ့တွေက လက်နက်ကြီးပဲ သုံးကြတာတောင် လူနေအိမ်တွေ၊ အရပ်သားတွေ ထိမှန်ကြတယ်လေ” ဟု အထက်ပါ အမျိုးသား ဆက်ပြောသည်။
ယင်းကဲ့သို့ စစ်ရေးတင်းမာမှု အခြေအနေများကြောင့် စစ်ရှောင်ထွက်ပြေးနေရသည့် ကွန်ကောက် ကျေးရွာ အုပ်စု၊ ကျေးရွာ (၅) ရွာက ဒေသခံ (၅၀၀) နီးပါးကလည်း နေရပ်မပြန်နိုင်သေးဘဲ ဘုန်းကြီး ကျောင်း နှင့် နီးစပ်ရာ ဆွေမျိုးအိမ်များသို့ ခိုလှုံနေလျက်ရှိ ကြောင်းသိရသည်။
စစ်ဘေးတိမ်းရှောင်နေရသည့် ဒေသခံများ အနေဖြင့် စားဝတ်နေရေး အခက်အခဲများ နှင့် ပြောင်းဖူးယူ ရန် ရှိနေသည့်အတွက် နေရပ်ပြန်လိုကြောင်းလည်း ဆာမိုင်ကျေးရွာဘက်သို့ စစ်ရှောင်ရောက်ရှိလာ သည့် နောင်မောင်းရွာခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။
“ကျမတို့ရွာထဲကို လက်နက်ကြီးကျလို့ ထွက်ပြေးလာပါ။ ထွက်ပြေးလာတုန်းကတော့ အရေးကြီး ပစ္စည်း တချို့ပဲ ယူလာနိုင်ခဲ့တယ်။ အခုလည်း အမျိုးအိမ်မှာ နေနေရတယ်ဆိုပေမဲ့ လူပေါင်း (၁၀) ယောက်ကျော်ဆိုတော့ နေထိုင်စားသောက်ရေးအပိုင်းမှာ သူတို့ကို အားနာမိတာပေါ့၊ ပြီးတော့ ပြောင်းဖူးတွေလည်း မယူရသေးဘူး။ စပါးတွေလည်း ဝါနေပြီ၊ ဒါတွေကို တွေးမိရန် အရမ်းအိမ်ပြန် ချင်တယ်” ဟု စစ်ရှောင်လာသည့် နောင်မောင်းရွာခံအမျိုးသမီးက သျှမ်းသံတော်ဆင့်ကို ပြောသည်။
အောက်တိုဘာလ (၆) ရက်မှ စတင်ပြီး သိန္နီမြို့နယ်၊ ကွန်ကောက်ကျေးရွာအုပ်စုအတွင်း၌ စစ်ကောင်စီ နှင့် ကချင်လွတ်လပ်ရေး တပ်ဖွဲ့တို့က လက်နက်ကြီးဖြင့် အပြင်အလှန် ပစ်ခတ်မှု ရှိခဲ့သည့် အတွက် ဒေသခံ (၅၀၀) နီးပါးက စစ်ရှောင်နေရပြီး အရပ်သား အိမ် (၂) လုံးလည်း ထိခိုက်ပျက်စီးခဲ့သည်။
ထို့အပြင် စစ်ကောင်စီမှ ပစ်လိုက်သည့် လက်နက်ကြီး ကျကွဲမှုကြောင့် ကွန်ကောက်ဘုန်းကြီး ကျောင်းဆောင် ပျက်စီးရပြီး ကောင်းချိုကျေးရွာ (ဝၢၼ်ႈၵွင်းၶဵဝ်) မှ ကိုယ်ဝန်သည်အမျိုးသမီးတစ်ဦး လည်း လက်နက်ကြီးစ ထိမှန်ဒဏ်ရာရမှု ရှိခဲ့သည်။
Leave a Comments