သျှမ်းပြည် တောင်ကြီးခရိုင်၊ ညောင်ရွှေမြို့နယ် အင်းလေးဒေသမှ စစ်တပ်ထွက် စစ်မှုထမ်းဟောင်း အမျိုးသား တစ်ဦးကို အာဏာသိမ်း စစ်ကောင်စီ တပ်က ဖမ်းဆီးထားကြောင်း စုံစမ်းသိရသည်။
အင်းလေးဒေသ၊ ကျွန်းကြီးမြောက်ရွာနေ ကိုထက်အောင် ဆိုသည့် တပ်ထွက် စစ်မှုထမ်းဟောင်းအမျိုးသားကို အောက်တိုဘာ (၈)ရက်တွင် မေးမြန်းစရာရှိသည် ဟုဆိုကာ ညောင်ရွှေရဲခန်းမှ ဖုန်းဆက်ခေါ်သည့် အတွက် ညောင်ရွှေမြို့ရှိ ရွှေဒင်္ဂါး လက်ဘက်ရည်ဆိုင်၌ သွားရောက်တွေ့ဆုံခဲ့ရကြောင်း နီးစပ်သူ အမျိုးသား တစ်ဦးက သျှမ်းသံတော်ဆင့်ကို ပြောသည်။
“လက်ဘက်ရည်ဆိုင်မှာ နှစ်နာရီလောက် ဆွေးနွေးစကားပြောကြပြီးတော့၊ စခန်းကိုသွားကြရအောင် ဆိုလို့ ၁၁ နာရီကနေ ၂ နာရီအထိ ညောင်ရွှေရဲစခန်းမှာ သူ့ကို သီးသန့်အခန်းထဲ ခေါ်ပြီး စစ်ဆေးမေးမြန်းကြတယ်။ အဲ့ချိန်မှာ အဖော်ပါ သွားတဲ့သူတွေက အပြင်ကနေပဲ စောင့်ရတာ၊ ပြီးတော့ အရာရှိတစ်ယောက်က ထွက်လာပြီး သူ(ကိုထက်အောင်) ကို ကျနော်ခေါ်ထားရမယ်၊ ခင်ဗျားတို့ ပြန်လို့ရပြီ ဆိုပြီး လာပြောတာ”ဟု နီးစပ်သူ အမျိုးသား တစ်ဦးက သျှမ်းသံတော်ဆင့်ကို ပြောသည်။
ယင်းကဲ့သို့ ကိုထက်အောင်ကို ဖမ်းဆီးခြင်း မပြုခင် ရှေ့တစ်ရက် (စက်တင်ဘာလ ၇) ရက် ညနေပိုင်းတွင်လည်း ကိုထက်အောင် နေအိမ်၌ မရှိချိန် အင်းလေးပျူစောထီး နှင့် ညောင်ရွှေရဲစခန်းမှ ရဲတပ်ဖွဲ့ဝင်များသည် နေအိမ်သို့ ရောက်ရှိလာခဲ့ပြီး ဖုန်းနံပါတ် တောင်းသွားခဲ့ကြောင်းလည်း သိရသည်။
လက်ရှိတွင် ကိုထက်အောင်၏ အမျိုးသမီး နှင့် အသက် (၃) နှစ်အရွယ် သားလေးတစ်ယောက်တို့သည် အလုပ် လက်မဲ့ ဖြစ်နေကြသည့်အတွက် ကိုထက်အောင် မရှိပါက စားဝတ်နေရေးအတွက် အခက်အခဲရှိ ကြောင်းလည်း နီးစပ်သူ အမျိုးသားက ဆက်ပြောသည်။
“ပျူစောထီးနဲ့ရဲတွေ အိမ်ကိုလာတုန်းက တိုင်တဲ့သူရှိလို့တဲ့၊ သူ့ကို မေးမြန်းစရာရှိလို့ လာရှာတာလို့ပဲ ပြောတယ်။ အခု သူ့ကိုဖမ်းထားတော့ သူ့အမျိုးသမီး နဲ့ ကလေးက ခိုကိုးရာမဲ့သွားတယ်၊ လုပ်ကိုင်စားသောက်ဖို့ဆိုလည်း ကလေးတစ်ဖက် နဲ့ ဘယ်လို အဆင်ပြေမလဲ၊ ပြီးတော့ အကြောင်းရင်း မသိရပဲနဲ့ အဖမ်းခံရတာတာ” ဟု နီးစပ်သူ အမျိုးသားက သျှမ်းသံတော်ဆင့်ကို ဆက်ပြောသည်။
ကိုထက်အောင်သည် စစ်တပ်အာဏာသိမ်းမှု မဖြစ်ခင် ၂၀၁၉ ခုနှစ်နောင်းပိုင်း အချိန်ကတည်းက တပ်မှ နှုတ်ထွက်ခဲ့သူဖြစ်ကြောင်း နှင့် လက်ရှိ အချိန်တွင်လည်း မိသားစု နှင့်အတူ နွားမွေးမြူရေးလုပ်ငန်း လုပ်ကိုင်နေသူ ဖြစ်ကြောင်းသိရသည်။
လက်ရှိတွင် ကိုထက်အောင်ကို ညောင်ရွှေရဲစခန်းမှ တောင်ကြီးမြို့ရှိ အရှေ့ပိုင်းတိုင်း စစ်ဌာနချုပ် (ရပခ) ထံသို့ ပို့ဆောင်ထားကြောင်းလည်း သိရသည်။
စစ်တပ်က အာဏာသိမ်းပြီးနောက်ပိုင်း အင်းလေးဒေသတွင် ပြည်သူများ၏ လုံခြုံရေး အခြေအနေသည် ၈၉ ရာခိုင်နှုန်း မရှိကြောင်း အင်းလေးဒေသ အဖွဲ့အစည်းဖြစ်သည့် JMC- Innlay မှ စုစည်းထားသည့် သတင်းအချက်အလက် သိရသည်။
Leave a Comments