သျှမ်းပြည် လားရှိုးခရိုင်၊ သိန္နီမြို့နယ်အတွင်း ယနေ့ (အောက်တိုဘာ ၈)ရက် တွင် ကချင်လွတ်လပ်ရေး တပ်မတော် ( KIA )တပ်မှ ကားလမ်းပိတ်ပြီး ဆက်ကြေး ထပ်မံ ကောက်ခံနေကြောင်း သတင်းရရှိသည်။
ယနေ့ အောက်တိုဘာလ ၈ ရက် နံနက်ပိုင်း ၇ နာရီဝန်းကျင်တွင် KIA စခန်းချ နေထိုင်ရာ သိန္နီမြို့နယ်၊ ကွန်ကောက်ကျေးရွာအုပ်စု၊ ကွန်ကောက်ဘုန်းကြီးကျောင်းရှေ့ ၌ ကုန်တင် ကားများကို လမ်းကန့်လန့်ဖြတ် ရပ်နားစေပြီး ကားသမားများထံမှ ဆက်ကြေးကောက်ခံနေကြောင်း အသက် (၂၀) ကျော် ဒေသခံ အမျိုးသား တစ်ဦးက သျှမ်းသံတော်ဆင့်ကို ပြောသည်။
“KIA က ဆက်ကြေးလာကောက်တာ၊ သူတို့ ဆက်ကြေးကောက်တဲ့ အချိန် တခြား ကားတွေ ဖြတ်သွားဖြတ်လာ လုပ်လို့ မရအောင်လည်း ကုန်တင်ကားတွေကို လမ်းပိတ်ရပ်ခိုင်းထား တယ်၊ သူတို့ဆီ ဆက်ကြေး မပေးမချင်း ရှေ့ဆက်သွားလို့လည်း မရဘူး” ဟု အမည်မဖော်လိုသူ ဒေသခံ လူငယ် အမျိုးသား တစ်ဦးက သျှမ်းသံတော်ဆင့်ကို ပြောသည်။
KIA တပ်ဖွဲ့သည် ကုန်တင်ကားသမားများထံမှ တစ်နှစ်စာ ဘီးလိမ့်ခွန်ကို မြန်မာငွေကျပ် ၁၀ သိန်း နှင့် အထက် တောင်းခံပြီး၊ သယ်ဆောင်လာသည့် ကုန်ပစ္စည်းအမျိုးအစားပေါ် မူတည်ကာ မြန်မာငွေကျပ် သိန်း ၂၀ မှ ၈၀ (၁၀၀ နီးပါး) အထိ ထပ်မံပေးဆောင် စေကြောင်းလည်း သိရသည်။
အဆိုပါ KIA ဆက်ကြေးကောက်ယူနေသည့် လမ်းပိုင်းသည် သိန္နီ- ကွန်လုံ- ချင်းရွှေဟော် ဆက်သွယ်ထားသည့် လမ်းဖြစ်ပြီး၊ ချင်းရွှေဟော်သည် တရုတ်နယ်စပ်မြို့၊ နယ်စပ် ကုန်သွယ်ရေးဇုံ ရှိသည့်မြို့ဖြစ်ကာ ကုန်တင်ကားများ သွားလာဖြတ်သန်းသည့် လမ်းပိုင်းလည်းဖြစ်သည်။
ထို့ပြင် ယနေ့ (အောက်တိုဘာလ ၈) ရက် တွင် ပစ်ခတ်မှု မရှိသော်လည်း KIA တပ်ဖွဲ့သည် ကုန်ကောက်ကျေး ရွာမှ ပြောင်းရွှေ့ကာ တန့်ခန်ကျေးရွာ (ဝၢၼ်ႈတၢင့်ၶၢၼ်) နှင့် နောင်မောင်းကျေးရွာ (ဝၢၼ်ႈၼွင်မွင်း) ကြားတို့၌ ဆက်ကြေး ဆက်လက်ကောက်ခံ နေလျက်ရှိကြောင်းလည်း ဒေသခံ အမျိုးသားက သျှမ်းသံတော်ဆင့်ကို ဆက်ပြောသည်။
“KIA ပြောင်းသွားတဲ့ နေရာက သိန္နီ ကနေ ကွန်လုံကို သွားတဲ့ လမ်းမကြီး ဘေးမှာပဲ၊ အဲ့ဒါက ဟိုဘက် (ကွန်လုံ) ထွက်တဲ့လမ်းနဲ့ ပိုပြီး နီးသွားတာပေ့ါ၊ မနေ့က စစ်ကောင်စီ ကလည်း လက်နက်ကြီးနဲ့ ပစ်ကြတော့၊ အဲ့ဒါကို ရှောင်တာလည်း ဖြစ်နိုင်တယ်၊ အကောင်းဆုံးကတော့ သူတို့ရှိတဲ့ နေရာကို မသွားတာပဲ၊ သွားရင်လည်း ပိုက်ဆံပေးရမှာ” ဟု အထက်ပါ အမျိုးသားက ဆက်ဆိုသည်။
ယမန်နေ့ အောက်တိုဘာလ (၇) ရက်နေ့ ၁၀ နာရီဝန်းကျင်တွင် သိန္နီမြို့နယ် ၊ ကွန်ကောက်ကျေးရွာ အတွင်း အခွန် ကောက်နေသည့် KIA တပ်နှင့် စစ်ကောင်စီ တပ်တို့သည် လက်နက်ကြီးဖြင့် အပြန် အလှန်ပစ်ခတ်မှု ဖြစ်ပြီး ကွန်ကောက်ဘုန်းကြီး ကျောင်းဝန်းအတွင်း လက်နက်ကြီးကျကွဲပြီး ဘုန်းကြီးကျောင်း ထိခိုက်ပျက်စီးမှုလည်း ရှိခဲ့သည်။
ယင်းကဲ့သို့ လက်နက်ကြီးဖြင့် အချင်းချင်း ပစ်ခတ်မှုများကြောင့် ကွန်ကောက်ကျေးရွာ (ဝၢၼ်ႈၵုၼ်ၵွၵ်ႇ) မန်ဟေကျေးရွာ(မၢၼ်ႈႁေ)၊ တန့်ခန်ကျေးရွာ (ဝၢၼ်ႈတၢင်ႉၶၢၼ်) နှင့် နောင်မောင်းရွာ (ဝၢၼ်ႈၼွင်မွင်း) စသည့် ကျေးရွာများနှင့် အနီးပတ်ဝန်းကျင်မှ ဒေသခံများ စုစုပေါင်း (၅၀၀)ကျော်သည်လည်း စစ်ရှောင်ထွက်ပြေးရကြောင်း သိရသည်။
အဆိုပါ စစ်ရှောင်များသည် ဟိုမိန်းဘုန်းကြီးကျောင်း၊ ဖိုင်ခမ်း ဘုန်းကြီးကျောင်း နှင့် မြို့ပေါ်ရှိ နီးစပ်ရာ ဆွေမျိုးများထံသို့ ရောက်ရှိခိုလှုံနေရကြောင်းလည်း သိရသည်။
Leave a Comments