Thursday, June 20, 2024

မူဆယ်မြို့နယ်အတွင်း ညအချိန် ပစ်ခတ်သံကြောင့် ဒေသခံများ ထိတ်လန့်

Must read

သျှမ်းပြည် မူဆယ်မြို့နယ်အတွင်း ညဘက် လူခြေတိတ်ချိန်တွင် ပစ်ခတ်သံများ ဖြစ်ပေါ်သည့်အတွက် ဒေသခံများမှ ထိတ်လန့်တုန်လှုပ်ရကြောင်း စုံစမ်းသိရသည်။

ယမန်နေ့ (အောက်တိုဘာလ ၃) ရက် ည ၁၀ နာရီဝန်းကျင်တွင် မူဆယ်မြို့ပေါ် လက်နက်ကြီး အသံ နှစ်ချက် ရှေ့ဆင့်နောက်ဆင့် ထွက်ပေါ်လာပြီး အချင်းချင်း ပစ်ခတ်သည့် သေနတ်သံများလည်း ထွက်ပေါ်လာကြောင်း မူဆယ်ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

“လက်နက်ကြီးအသံ နှစ်ချက် ရှေ့ဆင့်နောက်ဆင့် ထွက်လာတာ၊ အဲ့နောက်မှာ နှစ်ဖက် အပြန်အလှန် ပစ်ခတ်သံတွေလည်း ထွက်ပေါ်လာတယ်။ ၁၀ မိနစ်ကျော်လောက်မှာ အသံတွေက ပြန်ငြိမ်သွားတယ်။ အသံကတော့ မြို့ရဲ့ တောင်ဘက်ကနေ ထွက်လာတာ၊ ကောင်းမူးတုံဘက် ဖြစ်မယ်ထင်တယ်” ဟု မူဆယ်ဒေသခံ အမျိုးသား တစ်ဦးက သျှမ်းသံတော်ဆင့်ကို ပြောသည်။

ယင်းကဲ့သို့ ညအချိန် ပစ်ခတ်သံများ ထွက်ပေါ်လာမှုကြောင့် ဒေသခံများ ထိတ်လန့်ရသည့် အပြင် ပစ်ခတ်မှု ဖြစ်ပေါ်သည့် အချိန်တိုင်း စစ်ကောင်စီဘက်မှ လက်နက်ကြီးဖြင့် ရမ်းသမ်းပစ်ခတ်မှု ပြုလုပ်လေ့ရှိသည့်အတွက် လက်နက်ကြီး ရန်လည်း ကြောက်ရကြောင်း အထက်ပါ ဒေသခံအမျိုးသားက ဆက်လက်ပြောဆိုထားသည်။

“စစ်ကောင်စီက လက်နက်ကြီးတွေ ရမ်းပစ်ပြီး သူတို့က လူထိလား၊ အိမ်ထိလားတွေ ဂရုမစိုက်တော့ဘူး။ မနေ့ ညကလည်း ပစ်ခတ်သံတွေ ငြိမ်သွားပြီးနောက် စစ်ကောင်စီက လက်နက်ကြီးနဲ့ လှမ်းပစ်လား ဆိုပြီး စိုးရိမ်လို့ အခြေအနေတွေ စောင့်ကြည့်တာနဲ့ တော်တော် အိပ်မပျော်နိုင်ခဲ့ဘူး” ဟု မူဆယ်မြို့ခံက ဆက်လက်ပြော ဆိုသည်။

အဆိုပါ ပစ်ခတ်မှုသည် မူဆယ်မြို့ အခြေစိုက် ပြည်သူ့စစ်တပ်ဖွဲ့ နှစ်ဖွဲ့မှ နားလည်မှု လွဲမှားမှုကြောင့် ဖြစ်သည်ဟု ဒေသအတွင်းက သတင်းများထွက်ပေါ်နေသော်လည်း သျှမ်းသံတော်ဆင့်မှ သီးခြားအတည်ပြုချက် မရသေးပေ။

မူဆယ်မြို့နယ်သည် မြန်မာ – တရုတ်နယ်စပ်မြို့ ဖြစ်သည့်အလျောက် လူမျိုးပေါင်းစုံ ဝင်ထွက်သွားလာမှု၊ လက်နက်ကိုင် တပ်ဖွဲ့ များစွာ အခြေစိုက် လှုပ်ရှားမှုတို့ကြောင့် ပစ်ခတ်မှုများ၊ လုယက်မှုများလည်း မကြာခဏ ဖြစ်ပွားလေ့ရှိသည့် ဒေသဖြစ်သည်။

ပြီးခဲ့သည့် သြဂုတ်လ နှောင်းပိုင်းမှ စတင်ကာ မူဆယ်မြို့နယ်အတွင်း၌ စစ်ကောင်စီ နှင့် တအာင်း (ပလောင်) အမျိုးသား လွတ်မြောက်ရေး တပ်မတော် (TNLA) တို့ စစ်ရေးပြင်းထန်မှုရှိခဲ့ပြီး ဌာနေပြည်သူ့စစ်တပ်ဖွဲ့များမှ စစ်ကောင်စီဘက် စစ်ကူ ပစ်ခတ်တိုက်ခိုက်မှုလည်း ရှိခဲ့ကြောင်း စုံစမ်းသိရသည်။

Leave a Comments

- Advertisement -spot_img

Latest article