သျှမ်းပြည် မူဆယ်မြို့နယ် တီးမကျေးရွာရှိ တီးမစျေးအတွင်း နေအိမ်ဆိုင်ခန်းတစ်ခု မီးလောင်မှုဖြစ်ပွားပြီး ဆိုင်ခန်းအတွင်းသိုလှောင်ထားသည့် ကုန်ပစ္စည်းများ ပျက်စီးဆုံးရှုံးခဲ့ကြောင်း သတင်းရရှိသည်။
စက်တင်ဘာလ ၃၀ ရက် ည ၁၁နာရီအချိန်တွင် မူဆယ်မြို့နယ် တီးမ ကျေးရွာအုပ်စု တီးမစျေးအတွင်းနေထိုင်သူ ဒေါ်ကြာမွေးခေါ် အသက် ၆၀ ကျော်အမျိုးသမီး၏ နေအိမ်တွင် အိမ်သုံး ဂတ်စ်အိုး ပေါက်ကွဲရာမှမီးလောင်မှုဖြစ်ပွားခဲ့ကြောင်း ဒေသခံ အမျိုးသားတစ်ဦးက သျှမ်းသံတော်ဆင့်ကိုပြောသည်။
နေအိမ်စျေးဆိုင် မီးလောင်မှုကြောင့် ဆိုင်အတွင်း သိုလှောင်ထားသည့် ရောင်းကုန်ပစ္စည်းတန်ဖိုးသိန်း (၅၀) ဝန်းကျင်ခန့် ဆုံးရှူံးသွားပြီး အချိန်မှီ မီးငြိမ်းနိုင်ခဲ့သည့်အတွက်ကြောင့် နေအိမ်စျေးဆိုင် အဆောက်အဦး အချို့သာ ပျက်စီးသွားကြောင်း မီးကူငြိမ်းပေးသည့် ဒေသခံ တစ်ဦးကဆိုပါတယ်။
” မီးလောင်ရတဲ့အကြောင်းရင်းတော့ အိမ်ထဲက ဂတ်စ်အိုး ပေါက်ပြီး ဘေးနားက ဘက်ထရီ အိုးကိုထိသွားတာ အဲ့ဒါနဲ့ မိုင်းကွဲသလို ထပေါက်ပြီး မီးလောင်သွားတာ ကျနော်တို့လည်း ကြားကြားချင်း မိုင်းကွဲတယ်လို့ထင်တာ ထကြည့်တော့ အိမ်ထဲမီးလှောင်နေလို့ မီးကိုဝိုင်းငြိမ်းကြတယ် ကုန် ပစ္စည်းတော်တော်များတော့လှောင်တာပေါ့ နေအိမ်ဆိုင်ခန်းတော့ လေးပုံ တစ်ပုံလောက်ပဲ ပျက်သွားတာ ပေါ့ ” ဟု ဒေသခံတစ်ဦးက ပြောသည်။
မူဆယ်မြို့နယ် တီးမ ကျေးရွာအုပ်စုတွင် လျှပ်စစ် မီး ပုံမှန်မလာသည့်ပြသာနာကြောင့် ချက်ပြုတ်လုပ်ငန်းသုံးအတွက် ဒေသခံ ပြည်သူများက ဂတ်စ်အိုးများကို ပိုမိုအသုံးပြုရကြောင်းသိရသည်။
CJ ပေးပို့လာသည့် သတင်းဖြစ်သည်။
Leave a Comments