သျှမ်းပြည်မြို့တော် တောင်ကြီးတွင် မြို့ပေါ်ရပ်ကွက်အတွင်း ဒုတိယအကြိမ် မီးလောင်မှုထပ်မံဖြစ်ပွားခဲ့ကြောင်း တောင်ကြီးမြို့ခံများထံမှ သတင်းရရှိသည်။
ယနေ့ (မတ်လ ၁၆ ရက်) နေ့လည် ၁၂ ခန့်အချိန်တွင် တောင်ကြီးမြို့ ညောင်ရွှေဟော်ကုန်းရပ် မြကန်သာပန်းခြံအနီး၊ နန်းထိုက်ရွှေစင်ကွန်ဒိုနှင့် မိဘအရိပ်ကွန်ဒိုအနီးရှိ လျှပ်စစ်ထရန်စဖော်မာမှ ဝါယာရှော့ဖြစ်ပြီး မီလောင်မှုဖြစ်ပွားခဲ့ကြောင်း မြို့ခံများကပြောသည်။
“မနေ့ကလည်း ရတနာသီရိထဲမှာလောင်တယ်၊ ဒီနေ့လည်း ထပ်လောင်တယ်၊ ဝါယာရှော့ဖြစ်တာ၊ မီးကမမှန်တော့ ဆွဲအားများပြီး လောင်တာထင်တယ်” ဟု မြို့ခံတစ်ဦးက သျှမ်းသံတော်ဆင့်သို့ပြောသည်။
လက်ရှိတွင် မီးသတ်ကားများရောက်လာပြီး မီးငြိမ်းသတ်သွားပြီဖြစ်ကြောင်း သိရသည်။ ယမန်နေ့ (မတ်လ ၁၅ ရက်) နေ့လည်ပိုင်းကလည်း တောင်ကြီးမြို့ ရတနာသီရိရပ်ကွက်အတွင်း မီးလောင်မှုဖြစ်ပွားခဲ့ပြီး နေအိမ်တစ်လုံးပျက်စီးဆုံးရှုံးခဲ့သေးသည်။
ယခုကာလသည် ခြောက်သွေ့ရာသီဖြစ်သည့်အပြင် လျှပ်စစ်မီးမှန်ကန်စွာမရရှိခြင်း၊ မီးအားမနိုင်ခြင်းတို့ကြောင့် ဝါယာရှော့ဖြစ်ကာ မီးဘေးအန္တရာယ်များဖြစ်ပွားနိုင်သဖြင့် ပြည်သူများအထူးဂရုစိုက်သင့်သည့် ကာလဖြစ်သည်။
တောင်ကြီးမြို့ ရွှေဘုန်းပွင့်တောင်ပေါ်တွင်လည်း မတ်လ ၁၄ ရက်နှင့် ၁၅ ရက်အတွင်း တောမီးလောင်မှု နှစ်ရက်ဆက်တိုက်ဖြစ်ပွားခဲ့ပြီး တောင်စောင်းအနီးတဝိုက်တွင် နေထိုင်သည့် ပြည်သူများလည်း စိုးရိမ်ထိတ်လန့်ခဲ့ရကြောင်း သိရသည်။
Leave a Comments