သျှမ်းပြည် မူဆယ်မြို့နယ် နမ့်အွမ်ကျေးရွာအုပ်စု ကောင်းဝိန်းကျေးရွာအနီးတွင် ရေခဲချောင်းရောင်းချနေသည့် အမျိုးသားတစ်ဦး ပစ်ခတ်ခံရပြီး ပွဲချင်းပြီးသေဆုံးသွားကြောင်း သတင်းရရှိသည်။
ယမန်နေ့ (စက်တင်ဘာလ ၃၀) ရက် မွန်းလွဲ ၂နာရီခွဲ တွင် သျှမ်းပြည် မူဆယ်မြို့နယ် နမ့်အွမ်ကျေးရွာ အုပ်စု မန်ဟောင်းကျေးရွာနှင့် ကောင်းဝိန်းကျေးရွာကြား ကောင်းဝိန်းကျေးရွာအနီး လမ်းမကြီးပေါ် တွင် အမည်မသိ လူတစ်စုမှ အ သက် ၄၀ ကျော်ဝန်းကျင် ရေခဲချောင်းရောင်းသည့် အမျိုးသားတစ်ဦးကို သေနတ်ဖြင့် ချောင်းမြောင်းပစ် ခတ်ခဲ့သည်။
ထို ပစ်ခတ်ခံရသည့် ဒဏ်ရာကြောင့် ပွဲချင်းပြီးသေဆုံးသွားခဲ့ကြောင်း၊ ၎င်းရုပ်အလောင်းကို လူမူ့ကူညီရေးအသင်းမှ မူဆယ်မြို့ဘက်သို့ ကားဖြင့်ကူညီသယ်ဆောင်သွားကြောင်း နမ့်အွမ်ကျေးရွာအုပ်စုမှ ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
” ရေခဲ့ချောင်းသည် ပစ်ခတ်ခံရတာဟုတ်ပါတယ်။အဲ့ဒီ ရေခဲချောင်းသယ်က ဒီဘက်မှာ ရေခဲလာလာရောင်းနေ ကြပါ အရင်ကတည်းကပေါ့ မျက်နှာတော့ရင်းနှီးတယ်။ အမည်တော့မသိဘူး ၁၀၅ မိုင်ဘက်နေလာတာ ဒီနေ့ကြ တော့ ကောင်းဝိန်းရွာနားမှာ ပစ်ခံရတာ” ဟု ဒေသခံအမျိုးသားက ဆိုသည်။
ပြီးခဲ့သည့် ဇူလိုင်လနှောင်းပိုင်းမှ စတင်ပြီး ယနေ့အချိန်ထိ မူဆယ်မြို့နယ် နမ့်အွမ်ကျေးရွာအုပ်စု ၊ စယ်လန့် ကျေးရွာအုပ်စု ၊ ပန်ခမ်းကျေးရွာအုပ်စု တွင် စစ်ကောင်စီတပ်နှင့် တအာင်း (ပလောင်) အမျိုးသားလွတ်မြောက်ရေးတပ်မတော် TNLA တပ်ဖွဲ့ တို့ တိုက်ပွဲပြင်းထန်း စွာဖြစ်ပွားခဲ့သည်။
ထိုတိုက်ပွဲကြား စစ်ကောင်စီဘက်မှ ဂျက်ဖိုက်တာ တိုက်လေယာဥ်ဖြင့် TNLA တပ်စခန်းရှိရာ သို့ ဗုံးကြဲတိုက်ခိုက်ခဲ့ကာ TNLA တပ်စခန်းအချို့ ပျက်စီးခံခဲ့ရသည်။
လက်ရှိအချိန်ထိ နှစ်ဖက်စစ်ရေးတင်းမာနေပြီး မကြာခဏ လက်နက်ကြီးဖြင့် ပစ်ခတ်တိုက်ခိုက်နေ သေးကြောင်း ဒေသခံများက ပြောသည်။
