သျှမ်းပြည် ကျောက်မဲခရိုင်၊ နမ္မတူမြို့နယ်အတွင်း တအာင်း (ပလောင်) အမျိုးသား လွတ်မြောက်ရေး တပ်မတော် (TNLA) မှ တပ်သားသစ်အတွက် လိုက်လံစုဆောင်းနေမှုကြောင့် ဒေသခံများ ထွက်ပြေး နေရကြောင်း စုံစမ်းသိရသည်။
နမ္မတူမြို့နယ်၊ ဆိုင်းခေါင်ကျေးရွာအုပ်စု၊ ကောင်းဆာကျေးရွာအတွင်းသို့ စက်တင်ဘာလ (၁၉) ရက် နှင့် (၂၃) ရက်တို့သည် TNLA တပ်မှ တပ်သားသစ်အတွက် ဒေသခံများကို ဝင်ရောက်ဖမ်းဆီးခြင်း ပြုလုပ်ခဲ့ ကြောင်း ဒေသခံ အမျိုးသား တစ်ဦးက သျှမ်းသံတော်ဆင့်ကို ပြောသည်။
“သားနှစ်ယောက်မရှိတဲ့ အိမ်ထောင်စုတွေဆို အဖေကို ခေါ်သွားတယ်၊ တချို့က သား ၂ နှစ်ယောက် ရှိပေမဲ့ အိမ်ထောက်ကျပြီး ခွဲနေကြလည်း သမီးဖြစ်သူ ဖခင်ဖြစ်သူကို ဖမ်းခေါ်သွားကြတာ၊ အဲ့တာတွေကြောင့် ကျန်တဲ့ အိမ်ထောင်စု တော်တော်များများက ထွက်ပြေးနေကြပြီ” ဟု အမည်မဖော်လိုသူ ဒေသခံ အမျိုးသား တစ်ဦးက သျှမ်းသံတော်ဆင့်ကို ပြောသည်။
စက်တင်ဘာ ၂၃ ရက် ည ၉ နာရီဝန်းကျင်အချိန်တွင် ဆိုင်းခေါင်အုပ်စုမှ ကောင်းဆာကျေးရွာနေ နန်းအေးမွန်း၏ အမျိုးသားကို နေအိမ်၌ မတွေ့ရသည့် အတွက် နန်းအေးမွန်းကို TNLA တပ်ဖွဲ့က ဖမ်းခေါ် သွားခဲ့ကြောင်း သိရသည်။
အလားတူပင် စက်တင်ဘာလ ၁၉ ရက်၌ ကောင်းဆာကျေးရွာနေ အသက် (၅၀) ကျော်ရှိ လုံးယီကို စစ်သားလုပ်ရန် အတွက်ဟုဆိုကာ အင်အား (၁၀) ယောက်နီးပါး ရှိသည့် TNLA တပ်ဖွဲ့မှ လာရောက် ဖမ်းဆီးခေါ်ဆောင် သွားခဲ့ကြောင်းလည်း သိရသည်။
ယင်းကဲ့သို့ TNLA တပ်မှ ဒေသခံများကို တပ်သားသစ်အတွက် ဖမ်းဆီးခေါ်ဆောင်ခြင်း နှင့် ပတ်သက်ပြီး ကျန်ရှိသည့် ဒေသခံများက စစ်မှုမထမ်းလိုသည့်အတွက် ထွက်ပြေးတိမ်းရှောင်ခြင်း ရှိနေကြောင်း အသက် (၄၀) ဝန်းကျင် တအာင်း အမျိုးသား တစ်ဦးက သျှမ်းသံတော်ဆင့်ကို ပြောသည်။
“ကျား ၂ ယောက်မရှိတဲ့ အိမ်ရော၊ သမီးနှစ်ယောက်ပဲ ရှိတဲ့ အိမ်ရော သူတို့လိုချင်တိုင်း ဖမ်းခေါ် သွားတော့ တခြားသူတွေလည်း ကြောက်ပြီး ထွက်ပြေးကြတာ၊ အဲ့လိုထွက်ပြေးတဲ့ အချိန်မှာဆိုရင် ကျောင်းနေတဲ့ ကလေးတွကိုပါ ခေါ်ပြီး သွားကြတော့ ကလေးတွေရဲ့ အခွင့်အရေးတွေလည်း ဆုံးရှုံးရတာပေါ့၊ နောက်တခုက သူတို့ ယာတွေ၊ ပြောင်းတွေဆိုလည်း ပစ်ပြီးသွားရတယ်” ဟု ဒေသတွင်းက တအာင်း အမျိုးသား တစ်ဦးက သျှမ်းသံတော်ဆင့်ကို ပြောသည်။
ဆိုင်းခေါင်အုပ်စုမှ ကောင်းဆာကျေးရွာသည် တအာင်းလူမျိုး နှင့် သျှမ်းလူမျိုး အများစု နေထိုင်ကြသည့် အိမ်ခြေ ၅၀ နီးပါး၊ ကျား (၉၉) ဦး၊ မ (၁၂၃) ဦး စုစုပေါင်း လူဦးရေ ( ၂၂၂ ) ဦး ရှိနေသည့်ရွာ ဖြစ်နေကြောင်းလည်း သိရသည်။
ယင်းကိစ္စဖြစ်စဥ် နှင့် ပတ်သက်ပြီး တအာင်း (ပလောင်) အမျိုးသား လွတ်မြောက်ရေး တပ်မတော် (TNLA) ပြောရေးဆိုခွင့်နှင့် ဆက်သွယ်မေးမြန်းခဲ့ရာ အသက် (၁၈) နှစ်ပြည့် တအာင်း အမျိုးသားများ စစ်မှုထမ်းရန် တပ်ဖွဲ့ ပေါ်လစီ ရှိနေကြောင်း TNLA ၏ ပြောရေးဆိုခွင့် ရှိသူ ဒု – ဗိုလ်မှူးကြီး တားအိုက်ကျော်က သျှမ်းသံတော်ဆင့်ကို ပြောသည်။
“အသက် (၁၈) နှစ်ပြည့် သား နှစ်ယောက်ရှိတဲ့ ကျနော်တို့ တအာင်းလူမျိုး မိသားစုထဲက တစ်ယောက် ဟာ စစ်မှုထမ်းရမယ်ဆိုတဲ့ မူဝါဒ ရှိပါတယ်။ အမျိုးသမီးတွေကိုတော့ ကျနော်တို့ မယူပါဘူး။ သူတို့ စိတ်ဆန္ဒအရ လာလုပ်တာဆိုရင်တော့ ကျနော်တို့ လက်ခံပါတယ်၊ ခုပြောတဲ့ နမ္မတူမြို့နယ်ထဲက ကိစ္စ တော့ ကျနော်တို့ မသိဘူး” ဟု ဒုဗိုလ်မှူးကြီး တားအိုက်ကျော်က သျှမ်းသံတော်ဆင့်ကို ပြောသည်။
လက်ရှိ TNLA တပ်ဖွဲ့ အနေဖြင့် အာဏာသိမ်း စစ်ကောင်စီ တပ်ဖွဲ့ အပြင် ရှမ်းပြည်တိုးတက်ရေးပါတီ၊ ရှမ်းပြည် တပ်မတော် (SSPP/SSA) တို့နှင့်လည်း စစ်ရေး တင်းမာမှု ရှိနေသည့် အချိန်လည်း ဖြစ်သည်။
Leave a Comments