သျှမ်းပြည် ကွမ်းလုံ – သိန္နီ လမ်းပိုင်း တစ်လျှောက်တွင် တိုင်းရင်းသား လက်နက်ကိုင် တပ်ဖွဲ့များမှ ဆက်ကြေးကောက် များပြားနေကြောင်း စုံစမ်းသိရသည်။
.
ကချင်လွတ်လပ်ရေးတပ်မတော် (KIA) နှင့် တအာင်း (ပလောင်) အမျိုးသား လွတ်မြောက်ရေး တပ်မတော် (TNLA) တို့သည် သန္နီ နှင့် ကွမ်းလုံကြား လမ်းပိုင်းတစ်လျှောက်တွင် ဆက်ကြေးအဖြစ် ၁၀ ဘီးကား တစ်စီးလျှင် ငွေကျပ် ဆယ်သိန်းမှ သိန်း နှစ်ဆယ်ကျပ်ထိ ကောက်ယူ တောင်းခံနေကြောင်း သိရသည်။
ယမန်နေ့ (စက်တင်ဘာလ ၁၆ ) ရက် နံနက်ပိုင်း ၈ နာရီဝန်းကျင်မှ စတင်ကာ KIA တပ်ဖွဲ့ မှ သိန္နီ – ကွမ်းလုံလမ်းပိုင်းရှိ ဟိုနောင်ကျေးရွာ နှင့် ပိန်းကန်ကျေးရွာကြားတွင် စောင့်ဆိုင်းကာ ဆက်ကြေး ကောက်နေကြောင်း ကားသမား တစ်ဦးက သျှမ်းသံတော်ဆင့်ကို ပြောသည်။
“ကားကြီး ၁၂ ဘီးကား တစ်စီးဆိုရင် ငွေကျပ် ၇ သိန်းကနေ ၁၅ သိန်းထိ တောင်းတယ်၊ ၂၂ ဘီးကား ဆိုရင် ၁၀ သိန်းကနေ သိန်း ၂၀ ထိ တောင်းခံကြတော့ ကားသမားတွေ အခက်တွေ့ပြီပေ့ါ၊ ဆက်ကြေး စောင့်ကောက်တဲ့ နေရာမှာကို KIA ယူနီဖောင်းဝတ် စစ်သား ၁၅ ယောက်လောက် တွေ့ရတယ်” ဟု မန္တလေး – ချင်းရွှေဟော် ကားမောင်းသည့် ကားသမား တစ်ဦးက သျှမ်းသံတော်ဆင့်ကို ပြောသည်။
ယင်းကဲ့သို့ TNLA တပ်ဖွဲ့မှ အခွန်ကောက် စောင့်နေသည့်အတွက် မန္တလေး ဘက်မှ တက်လာသည့် ကုန်တင်ကားသမားမျာလည်း ရှေ့ဆက်မတိုးရဲကြဘဲ သိန္နီမြို့ အဝင် ပန်လော့ဂိတ် အနီးတွင် ရပ်နားထားရကြောင်းလည်း အထက်ပါ ကားသမားက ဆက်ပြောသည်။
“ကွမ်းလုံ – ချင်းရွှေဟော်ဘက်သွားမယ့် မန္တလေးဘက်ကနေ တက်လာတဲ့ ကားတွေ အခွန်ပေးရမယ့် ပမာဏ အရမ်းများကြလို့ ရှေ့ဆက်မတိုးရဲကြတာ၊ သိန္နီအဝင်နားမှာ ရပ်နားနေကြတာ အစီး ၁၀၀ နီးနီးရှိတယ်၊ ဒီနေ့အထိပဲ” ဟု အထက်ပါ မန္တလေး – ချင်းရွှေဟော် ကားမောင်းသည့် ကားသမားက ဆက်ပြောသည်။
ပြီးခဲ့သည့် စက်တင်ဘာလ ၁၄ ရက်နေ့မှာလည်း TNLA တပ်ဖွဲ့မှ သိန္နီ – ကွမ်းလုံကြား လမ်းပိုင်းကို ပုံမှန်အားဖြင့် ၁၀ ရက် တစ်ကြိမ် ဆက်ကြေးကောက် လာရောက် စောင့်ဆိုင်းလျက်ရှိကြောင်းလည်း သိရသည်။
လက်နက်ကိုင် တပ်ဖွဲ့များမှ ကောက်ယူတောင်းခံနေသည့် ဆက်ကြေး ပမာဏသည် ကုန်အမျိုးအစား အားဖြင့် ကွာခြား လျက်ရှိပြီး ဘိလပ်မြေ တင်ကား တစ်စီးလျှင် ငွေကျပ်နှစ်သိန်း၊ စက်သုံးဆီ တင်ကား တစ်စီးလျှင် ငွေကျပ် ငါးသိန်း စသဖြင့် ကောက်ယူ တောင်းခံကြကြောင်း ကားသမားများ ထံမှ သိရသည်။
