သျှမ်းပြည် မူဆယ်မြို့နယ်အတွင်း ယနေ့ (စက်တင်ဘာ ၁၇) ရက် နံနက်ပိုင်းတွင် အာဏာသိမ်း စစ်ကောင်စီတပ်ဖွဲ့ နှင့် တိုင်းရင်းသား လက်နက်ကိုင်တပ်ဖွဲ့တို့ အကြား ပစ်ခတ်တိုက်ခိုက်သံများ ပြန်လည် ထွက်ပေါ် လာသည့်အတွက် စစ်ရေး ပိုပြင်းထန်မှာကို စိုးရိမ်ရကြောင်း သိရသည်။
.
ယနေ့ (စက်တင်ဘာလ ၁၇) ရက် နံနက်ပိုင်း ၉ နာရီဝန်းကျင်မှ စတင်ကာ မူဆယ်မြို့နယ်၊ စွမ်စော်ရပ်ကွက်ဘက်မှ လက်နက်ကြီး လက်နက်ငယ် ပစ်ခတ်သံများ ထွက်ပေါ်လာကြောင်း အသက် (၃၀) ဝန်းကျင် မူဆယ်မြို့ခံ အမျိုးသား တစ်ဦးက သျှမ်းသံတော်ဆင့်ကို ပြောသည်။
“ဒီနေ့ မနက်မှာ လက်နက်ကြီး/လက်နက်ငယ် အသံတွေ ဆူညံနေတာပဲ၊ စစ်ကောင်စီ နဲ့ TNLA တပ် ထိတွေ့ပြီး ပစ်ခတ်ကြတာလို့ ပြောကြတယ်။ အတိအကျတော့ မသိရဘူး၊ အခုချိန်ထိ လက်နက်ကြီးနဲ့ ပစ်တဲ့ အသံ ရံဖန်ရံခါ ကြားနေရတုန်းပဲ” ဟု မူဆယ်မြို့ခံ အသက် (၃၀) ဝန်းကျင် အမျိုးသားက သျှမ်းသံတော်ဆင့်ကို ပြောသည်။
ယင်းပစ်ခတ်မှု နှင့် ပတ်သက်ပြီး အသေးစိတ် အချက်အလက်များကို သျှမ်းသံတော်ဆင့်မှ ဆက်လက်စုံစမ်းနေဆဲ ဖြစ်သည်။
ယမန်နေ့ (စက်တင်ဘာလ ၁၆) ရက် မွန်းလွဲပိုင်း ၂ နာရီဝန်းကျင်တွင်လည်း မူဆယ်မြို့နယ်၊ ၁၀၅ မိုင် နယ်စပ်ကုန်သွယ်ရေးဇုန်ဘက်မှ လက်နက်ကြီး လက်နက်ငယ်သံများ ထွက်ပေါ်လာခဲ့ကြောင်းလည်း သိရသည်။
စစ်ကောင်စီတပ် နှင့် တအာင်း (ပလောင်) အမျိုးသား လွတ်မြောက်ရေး တပ်မတော် TNLA တပ်တို့သည် ပြီးခဲ့သည့် သြဂုတ်လ ၂၈ ရက်မှ ၃၁ ရက်အထိ မူဆယ်မြို့နယ်၊ စယ်လန့်ကျေးရွာအနီးတွင် တိုက်ပွဲပြင်းထန်ခဲ့ပြီးနောက် နှစ်ဖက်ပစ်ခတ်သံများက ငြိမ်သက်သွားခဲ့ရာမှ လက်ရှိတွင် ပစ်ခတ်သံများ ပြန်လည်ကြားရခြင်းဖြစ်ကြောင်း သိရသည်။
“တိုက်ပွဲသံ ငြိမ်တာကတော့ ၁၀ ရက်ကျော်လာခဲ့ပြီပေါ့ ၊ ဒီကြားထဲမှာ စစ်ကောင်စီဘက်က လက်နက်ကြီး နဲ့ တစ်ဖက်သတ် ရမ်းပစ်တဲ့ အသံတွေတော့ ကြားရတယ်၊ အခုလို နှစ်ဖက် ပစ်ခတ်သံကတော့ မနေ့ကမှ ပြန်ပြီး ကြားရတာ” ဟု မူဆယ်မြို့နေ အမျိုးသမီး တစ်ဉီးကလည်း သျှမ်းသံတော်ဆင့်ကို ပြောသည်။
ယင်းကဲ့သို့ ပစ်ခတ်သံများ ပြန်လည်ထွက်ပေါ်လာခြင်း နှင့် ပတ်သက်ပြီး ထိတွေ့တိုက်ပွဲ ပြန်လည် ပြင်းထန်လာမှာကို စိုးရိမ်ရကြောင်း နှင့် တိုက်ပွဲကို မဖြစ်ပွားစေလိုကြောင်း ဒေသခံများက တောင်းဆိုနေကြသည်။
ပြီးခဲ့သည့် သြဂုတ်လ အတွင်းက စစ်ကောင်စီ နှင့် TNLA တို့ စယ်လန့်ကျေးရွာအနီး တိုက်ပွဲကြောင့် အရပ်သား ထိခိုက်ဒဏ်ရာရသည့်အပြင် နေအိမ် အဆောက်အဦးများလည်း ပျက်စီးရပြီး ဒေသခံ ၆၀၀ ကျော်က နေရပ်စွန့်ခွာ စစ်ရှောင် နေခဲ့ရသည်။
တိုက်ပွဲအတွင်း လက်နက်ကြီး နှင့် ကျည်ဆန်ထိပြီး ပျက်စီးသွားရသည့် နေအိမ် နှင့် အဆောက်အအုံများကိုလည်း မပြုပြင်နိုင်သေးသည့် အကြောင်း နှင့် ပျက်စီးမှုများအတွက် ပြန်လည်ပြုပြင်နိုင်ရန် အကူအညီများလည်း လိုအပ်နေကြောင်း ဒေသခံများထံမှ သိရသည်။
