သျှမ်းပြည် မူဆယ်ခရိုင်၊ မူဆယ်မြို့နယ်၊ စယ်လန့်ကျေးရွာအနီး အာဏာသိမ်း စစ်ကောင်စီ နှင့် တအာင်း (ပလောင်) အမျိုးသား လွတ်မြောက်ရေး တပ်မတော် (TNLA) တို့ တိုက်ပွဲကြား ဒေသခံ ၆၀၀ ကျော် စစ်ရှောင် ထွက်ပြေး နေရကြောင်း သတင်းရရှိသည်။

.

စယ်လန့်ကျေးရွာအနီးတွင် ဩဂုတ်လ ၂၉ ရက် နံနက်ပိုင်းမှစပြီး သြဂုတ်လ ၃၀ ရက် မွန်းလွဲပိုင်း ၁ နာရီထိ တိုက်ပွဲဖြစ်ပွားခဲ့သည့်အတွက် စယ်လန့်ကျေးရွာ နှင့် အနီးပတ်ဝန်းကျင်ရှိ ဒေသခံ ၆၀၀ နီးပါး စစ်ရှောင်ထွက်ပြေး နေရကြောင်း စယ်လန့်ကျေးရွာနေ အမည်မဖော်လိုသူ အမျိုးသားတဦးက သျှမ်းသံတော်ဆင့်ကို ပြောသည်။

“သက်ကြီးရွယ်အိုတွေ၊ အမျိုးသမီး နဲ့ ကလေးမိခင်တွေကတော့ စစ်ရှောင်ထွက်ပြေးကြပြီ၊ ရွာထဲမှာက လူငယ်လူရွယ် အမျိုးသားပဲ အများစု ကျန်နေကြတယ်။ အိမ်စောင့်လည်း မထားလို့ မရလို့ အိမ်စောင့် အဖြစ် ကျန်ခဲ့တာမျိုးပေါ့” ဟု ၎င်းက ဆိုသည်။

စစ်ရှောင်ထွက်ပြေးရသည့် ဒေသခံများသည် စယ်လန့်ရွာ၊ ဂေါင်ရာရွာသစ်၊ မန်ကန်ရွာ၊ မိုင်းဆတ်ရွာ၊ နမ့်ကတ်ရွာစသည့် ကျေးရွာများမှ ဒေသခံများ ဖြစ်ကြပြီး မူဆယ်မြို့ပေါ် ဟိုနား ရပ်ကွက်၊ စွမ်စော် ရပ်ကွက်၊ တင်းလုံရပ်ကွက် ၊ ပန်ခမ်းရွာ နှင့် နမ့်ခမ်းမြို့နယ် တုန်ခွမ်ရွာတို့ရှိ အမျိုးအိမ်များသို့ စစ်ရှောင် ခိုလှုံနေကြကြောင်း သိရသည်။

ထို့အပြင် မူဆယ်မြို့နယ် နောင်နောင်းကျေးရွာအုပ်စုရှိ မန့်နိမ်ကျေးရွာ ဘုန်းကြီးကျောင်းသို့လည်း စစ်ဘေးရှောင် ၂၀၀ ကျော် ရောက်ရှိနေပြီး စစ်ရှောင်များအတွက် စားဝတ်နေရေး နှင့် နေရာထိုင်ခင်းများ အတွက် အကူအညီများ လိုအပ်နေကြောင်း လည်း သိရသည်။

“အခုမှာ တစ်ရက်/တစ်ရက်ပဲ ရှိနေသေးတော့ ဆွေမျိုးတွေ ဘုန်းကြီးကျောင်းတွေ ကူညီထောက်ပံ့နိုင် သေးပေမဲ့ ရက်ကြာလာရင် မလွယ်လောက်တော့ဘူး။ ဆွေမျိုးဆိုလည်း အားနာရတယ်။ ဒါကြောင့် ဒီစစ်ရှောင်တွေအတွက် ကူညီထောက်ပံ့ပေးမယ့် အလှူရှင်တွေရှိရင် ကောင်းတာပေါ့” ဟု အသက် ၃၀ ဝန်းကျင် မူဆယ်ဒေသခံ အမျိုးသား တစ်ဦးက သျှမ်းသံတော်ဆင့်ကို ပြောသည်။

စယ်လန့်တိုက်ပွဲအတွင်းတွင် စစ်ကောင်စီတပ်မှ အမှတ် (၉၉) ခြေမြန်တပ်မ ဌာနချုပ် လက်အောက်ခံ ခလရ ၄၂၀၊ ၄၁၇ တပ်ရင်း အပြင် နမ်းခမ်းမြို့မ ပြည်သူ့စစ်နဲ့ တခြားပြည်သူ့စစ်တပ်ဖွဲ့များကိုလည်း အသုံးပြုခဲ့ကြောင်း သိရသည်။

ယင်းကဲ့သို့ ထိတွေ့တိုက်ပွဲ ဖြစ်ပွားခြင်း နှင့် ပတ်သက်ပြီး စယ်လန့်ကျေးရွာအတွင်း တိုက်ပွဲ ဖြစ်ပွားခြင်း မရှိကြောင်း နှင့် လက်နက်ကြီးရန်ကြောင့် ဒေသခံများ စစ်ရှောင်ထွက်ပြေးရကြောင်း TNLA ၏ ပြောရေးဆိုခွင့် ဒုတိယ ဗိုလ်မှူးကြီး တားအိုက်ကျော်က သျှမ်းသံတော်ဆင့်ကို ပြောသည်။

“အဓိက ကတော့ လက်နက်ကြီး ရန်ကြောက်လို့ပေါ့နော်။ တကယ့် တကယ်တော့ တိုက်ပွဲက ရွာထဲမှာ မဖြစ်ဘူး။ ဒါပေမဲ့လည်း ရွာထဲကို လက်နက်ကြီးတွေက ရွာထဲ က ကျတော့ စစ်ရှောင်ထွက်ပြေးရတာပေါ့။” ဟု ဒုတိယ ဗိုလ်မှူးကြီး တားအိုက်ကျော်က သျှမ်းသံတော်ဆင့်ကို ပြောသည်။

လက်ရှိအချိန်တွင် စယ်လန့်ကျေးရွာအုပ်စုအတွင်း စစ်ကောင်စီ နှင့် TNLA တပ်တို့ စစ်ရေး တင်းမာမှု ရှိနေသေးသည့်အတွက် စစ်ရှောင်များလည်း နေရပ်ပြန်သွားရန် အဆင်မပြေနိုင်သေးပေ။

အလားတူပင် ဩဂုတ်လ ၂၉ ရက်နေ့ မနက် ၁၁ နာရီဝန်းကျင်မှာလည်း ကွတ်ခိုင်မြို့နယ် နှင့် မူဆယ်မြို့နယ် အကြား ခိုမုန်းကျေးရွာအနီး စစ်ကောင်စီ၏ စကခ – ၁၇၊ ခမရ – ၅၇၇၊ ရမခ/ခရလ – ၄၅ တပ်တို့ ထိုးစစ်ဆင် လာတာကြောင့် နှစ်ဖက် ထိတွေ့တိုက်ပွဲ ပြင်းထန်ခဲ့ကြောင်းလည်း TNLA မှ သတင်း ထုတ်ပြန်ထားသည်။