သျှမ်းပြည် မူဆယ်မြို့နယ် စယ်လန့်ကျေးရွာအတွင်းသို့ စစ်ကောင်စီမှ ပစ်လိုက်သည့် လက်နက်ကြီး ကျရောက်ပေါက်ကွဲမှုကြောင့် မူကြိုကျောင်း နှင့် အရပ်သား ထိခိုက်မှုများ ရှိနေကြောင်း သတင်းသိရသည်။
.
ယနေ့ သြဂုတ်လ ၂၉ ရက် ညနေပိုင်း ၄ နာရီဝန်းကျင် အချိန်တွင် အာဏာသိမ်း စစ်ကောင်စီမှ ပစ်လိုက်သည့် လက်နက်ကြီးက စယ်လန့်ကျေးရွာတွင်းရှိ စဝ်ဆေခန်ဖ မူကြိုကျောင်းပေါ် ကျရောက်ပေါက်ကွဲခဲ့ကြောင်း ဒေသခံ အိုက်ယုံ (နာမည်လွဲ) က သျှမ်းသံတော်ဆင့်ကို ပြောသည်။
“စစ်ကောင်စီက လေယာဥ်နဲ့ လွိုင်တေးမိန်းကို ဗုံးကြဲတိုက်ခိုက်အပြီး မြေပြင်ပစ်ခတ်မှု တွေလည်း ရွာနဲ့ နီးလာ တယ်။ စကစ ကလက်နက်ကြီးနဲ့ ပစ်လိုက်လို့ ရွာထဲက မူကြိုကျောင်းပေါ် ကျကွဲတာ၊ ပျက်စီးမှု အသေးစိတ်ကို တော့ မသိရသေးဘူး၊ အခုည အချိန်ထိ ပစ်ခတ်သံတွေ ကြားနေရတုန်းမို့ ဘယ်သူမှလည်း အပြင်မထွက်ရဲဘူး” ဟု ဒေသခံ အိုက်ယုံ (နာမည်လွဲ) က သျှမ်းသံတော်ဆင့်ကို ပြောသည်။
တအာင်း (ပလောင်) အမျိုးသား လွတ်မြောက်ရေး တပ်မတော် (TNLA) နှင့် အာဏာသိမ်း စစ်ကောင်စီတပ်ဖွဲ့ တို့ စယ်လန့်ကျေးရွာအနီး ထိတွေ့တိုက်ပွဲဖြစ်ပွားနေမှုကြောင့် မူကြိုကျောင်းဆောင် လက်နက်ကြီး ထိမှန်သည့် အပြင် အရပ်သားလည်း ကျည်ဆန်ထိမှန်ကြောင်းလည်း သိရသည်။
တိုက်ပွဲသည် ရွာနှင့် နီးကပ်လာသည့်အတွက် အိမ်ပြင်ရပ်ထားသည့် ဆိုင်ကယ်ကို အထဲသွင်းရန် ပြင်ဆင်နေသည့် အသက် (၆၀) ကျော် စယ်လန့်ဒေသခံ အမျိုးသားတစ်ဦးကို သေနတ်ကျည်ဆံ လာရောက်ထိမှန်ကြောင်း အိုက်ယုံ (နာမည်လွဲ) က သျှမ်းသံတော်ဆင့်ကို ဆက်ပြောသည်။
“ဖြစ်စဥ်ကတော့ ၅ နာရီခွဲလောက်မှာ ဖြစ်တာ။ သေနတ်က တင်ပါးကို ဖောက်ဝင်သွားတယ်။ ဘယ်တပ်ဖွဲ့ရဲ့ ကျည်ဆန်လဲတော့ မသိရဘူး။ အဲ့လို ထိခိုက်လူနာရှိလို့ မူဆယ်က လူမှုကူညီရေးအသင်းကားတွေ ရောက်လာ လည်း လက်နက်ကိုင်တွေက ရွာထဲထိ ပေးမဝင်လို့ ဆိုင်ကယ်နဲ့ ရွာပြင်ထိ လိုက်ပို့ရပြီး အဲ့ကမှ တစ်ဆင့် လာကြို တဲ့ကားနဲ့ မူဆယ်ဆေးရုံကို သွားရတာ၊ အခုတော့ မူဆယ်ဆေးရုံကို ရောက်သွားပြီ” ဟု အိုက်ယုံ (နာမည်လွဲ) က သျှမ်းသံတော်ဆင့်ကို ဆက်ပြောသည်။
လက်ရှိ သတင်းရေးသား နေသည့်အချိန်ထိ (ည ၉ နာရီ) စယ်လန့်ကျေးရွာအတွင်း၌ ပစ်ခတ်သံများ ကြားနေလျက်ရှိပြီး၊ အချို့ဒေသခံများက မူဆယ်မြို့ပေါ်သို့ စစ်ရှောင်ထွက်ပြေးမှု ရှိသော်လည်း ရွာအတွင်း ပိတ်မိနေသေးသည့် ဒေသခံများလည်း အများအပြား ကျန်ရှိနေသေးကြောင်း သိရသည်။
စယ်လန့်တိုက်ပွဲအတွင်း စစ်ကောင်စီမှ လေယာဥ်ဖြင့် ဗုံးကြဲတိုက်ခိုက်မှုကြောင့် TNLA တပ်သားများ ထိခိုက်ကျဆုံးမှု ရှိနေကြောင်း သတင်းများ ထွက်ပေါ်နေသော်လည်း သျှမ်းသံတော်ဆင့် အနေဖြင့် သီးခြား အတည်ပြုချက်မရနိုင်သေးပေ။
အလားတူ မူဆယ် (၁၀၅) မိုင် အေးရှားဝေါလ် ဂိတ်အနီးတွင် စစ်ကောင်စီ နှင့် လက်အောက်ခံ ပြည်သူ့စစ်တို့ အချင်းချင်းကြား ပစ်ခတ်မှု ဖြစ်ပွားခဲ့ပြီး စစ်ကောင်စီ အရာရှိ အပါအဝင် ၃ ဦး သေဆုံးကာ ၂ ဦး ထိခိုက် ဒဏ်ရာရရှိခဲ့ကြောင်း ကားသမားအသိုင်းအဝန်းများထံမှ သိရသည်။
မူဆယ်မြို့နယ်အတွင်း စစ်ကောင်စီတပ် နှင့် TNLA တပ်ကြား စစ်ရေးတင်းမာမှုဖြစ်နေသည်မှာ တလနီးပါးရှိလာခဲ့ပြီး ယနေ့ (သြဂုတ် ၂၉) ရက်တွင် စစ်ရေးပြင်းထန်မှု ဖြစ်ပွားလာသည်။
