သျှမ်းပြည် တောင်ကြီးခရိုင်၊ ပင်းတယမြို့နယ်မှ အမျိုးသမီးတဦး ဓားပြတိုက်ခံရသည့်အပြင် မုဒိမ်းပါ ပြုကျင်ခံရပြီး၊ ကျူးလွန်သည့် အမျိုးသား ထွက်ပြေးလွတ်မြောက်နေကြောင်း စုံစမ်းသိရသည်။
.
ဖြစ်စဥ်မှာ ပြီးခဲ့သည့် သြဂုတ်လ ၃ ရက် ညနေပိုင်း ၅ နာရီဝန်းကျင်တွင် ပင်းတယမြို့နယ် ကျုံးရွာအုပ်စုတွင် နေထိုင်သည့် အမျိုးသမီးတစ်ဦးသည် ရွာပြင်ဘက် ကျွဲသွားကျောင်းကာ အပြန်လမ်း ပင်းတယ – ရွာငံ သွားလမ်းဘေး၌ အမျိုးသားတဦးမှ ဓားထောက်ပြီး ဓားပြတိုက်သွားသည့်အပြင် မုဒိမ်းပါ ပြုကျင့်သွားခဲ့ကြောင်း ကျူးလွန်ခံရသည့် အမျိုးသမီး နှင့် နီးစပ်သူတစ်ဦးက သျှမ်းသံတော်ဆင့်ကိုပြောသည်။
ထိုကိစ္စ နှင့် ပတ်သက်ပြီး ရွာလူကြီး နှင့် မြို့နယ်အုပ်ချုပ်ရေး ဝာာဝန်ရှိသူများကို တိုင်ကြားထားသော်လည်း တာဝန်ယူမှု မရှိသည့်အပြင် ကျူးလွန်သူ အမျိုးသားက ထွက်ပြေး လွတ်မြောက်နေကြောင်း သိရသည်။
“အဲ့ဒီ အမျိုးသားမျက်နှာမှာ ပုဆိုးစလို ပုဝါနဲ့ စည်းထားတယ်၊ သူမ ဝတ်ထားတဲ့ ရွှေနားကပ် နဲ့ ဆွဲကြိုးကို ဓားပြ တိုက်ယူပြီး လူကိုလည်း ဓားထောက် မုဒိမ်းပြုကျင့်သွားတာ၊ ရွာထဲပြန်ပြောရင် အိမ်ထိလာ သတ်မှာလို့ ခြိမ်းခြောက်သွားတယ်။ မိန်းကလေးလည်း မိသားစုနဲ့ တိုင်ပင်ပြီးတော့ ရွာလူကြီးကို တိုင်ထားပေမဲ့ တရားခံ ကိုတော့ မဖမ်းမိသေးဘူး” ဟု ကျူးလွန်ခံရသူ အမျိုးသမီးနှင့် နီးစပ်သူ တစ်ဦးက သျှမ်းသံတော်ဆင့်ကို ပြောသည်။
အမျိုးသမီးဆီမှ ဓားပြတိုက်ယူသွားသည့် ရွှေနားကပ်ကို ပင်းတယမြို့၊ ကျူံးစံပြကျေးရွာတွင် အမျိုးသားတစ်ဦး လာရောက်ရောင်းချသွားသည်ကို သိရကြောင်းလည်း ကျူးလွန်သူ အမျိုးသမီးနှင့် နီးစပ် သူက ဆက်ပြောသည်။
ဖြစ်စဥ်သည် ရက်ပေါင်း ၂၀ ကျော် ကြာလာခဲ့သော်လည်း ကျူးလွန်သူ တရားခံကို ဖော်ထုတ်ဖမ်းဆီး နိုင်ခြင်း မရှိသေးသည့်အပြင် ကျူးလွန်ခံရသူ အမျိုးသမီးအတွက် စိတ်ပိုင်းဆိုင်ရာ ထိခိုက်မှု အကူအညီများ လိုအပ်နေကြောင်းသိရသည်။
“ရွှေနားကပ်ကို လာရောင်းသူရဲ့ လက်မှာ ကုတ်ရာတွေ၊ ကိုက်ရာတွေ ရှိတယ်တဲ့၊ အဲ့ဒါနဲ့ ကျနော်တို့ ဒီလူကို သံသယရှိသွားပြီး လိုက်ရှာတဲ့အချိန် သူက ထွက်ပြေး လွတ်မြောက်သွားပြီ၊ ရွာလူကြီးတွေ၊ သက်ဆိုင်ရာ တာဝန်ရှိသူတွေသာ နည်းနည်း အားစိုက်ပြီး လုပ်ပေးရင် တရားခံကို မမိနိုင်စရာ အကြောင်း မရှိဘူး၊ အခုက သာမာန်ဖြစ်ရိုးဖြစ်စဥ်လို နေနေတော့ ကျနော်တို့မှာ ကိုယ့်အားကိုယ်ကိုးပြီး မတရားမှုကို ရင်ဆိုင်နေရတာ” ဟု ဆွေမျိုးတော်စပ်သူ အမျိုးသားတစ်ဦးကလည်း သျှမ်းသံတော်ဆင့် ကို ပြောသည်။
ကျူးလွန်ခံရသူ အမျိုးသမီးတွင် ရုန်းကန်မှုများကြောင့် ပွန်းပဲ့ဒဏ်ရာ၊ ညိုမဲဒဏ်ရာများရရှိသွားသည့် အပြင် လက်ရှိတွင် ကိုယ်ဝန်ရှိ၊ မရှိကိုလည်း မသိရသေးကြောင်းလည်း အထက်ပါ ပုဂ္ဂိုလ်က ဆက်ပြောသည်။
လိင်ပိုင်းဆိုင်ရာ နှင့် ကျား – မ ကွဲပြားမှုပေါ် အခြေခံသည့် အကြမ်းဖက်မှုတိုးမြင့်လာကြောင်း ရှမ်းအမျိုးသမီးရေးရာ လှုပ်ရှားဆောင်ရွက်ရေး အသင်း (SWAN ) မှ သြဂုတ် ၁၈ ရက်တွင် ထုတ်ပြန်ထားသည်။
မေလ မှ ဇွန်လ အထိ ကောက်ယူထားသည့် စာရင်းအရ အိမ်တွင်းအကြမ်းဖက်မှု ၄ မှု၊ မုဒိမ်းမှု ၁၊ သက်ငယ် မုဒိမ်းမှု ၁ မှု၊ အသက်မပြည့်သေးသူ နှင့် ကာမစပ်ယှက်မှု ၁ မှု၊ မုဒိမ်းကျင့်ရန်ကြိုးစားမှု ၁ မှု နှင့် လိင်ပိုင်းဆိုင်ရာ အကြပ်ကိုင်မှု ၂ မှု ရှိလာကြောင်း SWAN ၏ ထုတ်ပြန်ချက်အရသိရသည်။
Leave a Comments