သျှမ်းပြည်ပြန်လည်ထူထောင်ရေးကောင်စီ၊ သျှမ်းပြည်တပ်မတော် (RCSS/SSA) ၏ (၆) လပတ် အဖွဲ့အစည်းမှ ဆုံးဖြတ်ချက်အရ တစ်နိုင်ငံလုံး ပစ်ခတ်တိုက်ခိုက်မှု ရပ်စဲရေး သဘောတူစာချုပ် ( NCA) စာချုပ်ကို ဆက်လက် စွဲကိုင်ထားကြောင်း သတင်းရရှိသည်။

.

အဆိုပါ အစည်းအဝေးကို သြဂုတ် (၁၈- ၂၀) ရက်ထိ ဗဟိုဌာနချုပ်ရှိရာ လွယ်တိုင်းလျန်းမှာ ကျင်းပပြုလုပ်ခဲ့ပြီး သက်ဆိုင်ရာ တာဝန်ရှိ ပုဂ္ဂိုလ် (၂၆၀) ဦး တက်ရောက်ခဲ့ကြောင်း သိရှိရသည်။

တစ်နိုင်ငံလုံး ပစ်ခတ်တိုက်ခိုက်မှုရပ်စဲရေး သဘောတူစာချုပ် (NCA) သည် အစိုးရ၊ တပ်မတော်၊ လွှတ်တော်၊ တိုင်းရင်းသားလက်နက်ကိုင် တော်လှန်ရေး အဖွဲ့အစည်းများ (EAOs) ပါဝင်လက်မှတ်ရေးထိုးခဲ့သည်သာမက ကုလသမဂ္ဂ (UN) ၊ ဥရောပ သမဂ္ဂ (EU) ၊ တရုတ်နိုင်ငံ၊ အိန္ဒိယနိုင်ငံ၊ ထိုင်းနိုင်ငံ၊ ဂျပန်နိုင်ငံတို့က အသိသက်သေအဖြစ် ပါဝင်လက်မှတ်ရေးထိုးခဲ့သည့် သဘောတူစာချုပ် ဖြစ်၍ NCA သည် တွေ့ဆုံဆွေးနွေးခြင်း လမ်းကြောင်းမှ တဆင့် တိုင်းပြည်၏ အုပ်ချုပ်ရေးစနစ်ကို ပြုပြင်ပြောင်းလဲရန် ဖြစ်သော်လည်း အလျှော့အတင်း မလုပ်နိုင်သဖြင့် NCA အကောင်အထည်ဖော်ဆောင်ခြင်း လုပ်ငန်းအများ ရှေ့မတိုးနိုင်ခဲ့ခြင်း ဖြစ်သည်။

RCSS အနေဖြင့် ယနေ့ ကာလအထိ NCA ၏ အနှစ်သာရ ကို စွဲကိုင်ထားဆဲဖြစ်ကြောင်း ယနေ့ သြဂုတ် (၂၁) ရက်မှာ ထုတ်ပြန်ချက်တွင် ရေးသားထားသည်။

တွေ့ဆုံ ဆွေးနွေးခြင်းနည်းလမ်းဖြင့် ဖက်ဒရယ် ဒီမိုကရေစီ ပြည်ထောင်စုကို တည်ဆောက်ရမည်ဖြစ်သောကြောင့် အဖက်ဖက်အနေဖြင့် တွေ့ဆုံဆွေးနွေးကြရန်လည်း တိုက်တွန်းထားသည်။

ဦးသိန်းစိန် အစိုးရလက်ထက်က ရေးထိုးခဲ့သည့် NCA စာချုပ်သည် တိုင်းရင်းသားလက်နက်ကိုင် တပ်ဖွဲ့ (၁၀) ဖွဲ့ လက်မှတ်ရေးထိုးခဲ့ပြီး စစ်အာဏာသိမ်းပြီးနောက်ပိုင်း NCA လက်မှတ်ရေးထိုးထားသည့် KNU တိုင်းရင်းသားလက်နက်ကိုင်တပ်ဖွဲ့သော်လည်းကောင်း၊ CNF တပ်ဖွဲ့ သော်လည်းကောင်း စစ်ကောင်စီ နှင့် အပြင်းအထန် တိုက်ပွဲဖြစ်ပွားခဲ့သည်။

ငြိမ်းချမ်းရေး လုပ်ငန်းစဥ် ဦးဆောင်အဖွဲ့ ဖြစ်သည့် PPST အဖွဲ့ဝင် NCA – S- EAO တပ်ဖွဲ့သည် စစ်ကောင်စီ လက်အောက်ခံ အမျိုးသား စည်းလုံးညီညွတ်ရေး နှင့် ငြိမ်းချမ်းရေး ဖော်ဆောင်မှု ညှိနှိုင်းရေး ကော်မတီ (NSPNC) နှင့်လည်း တွေ့ဆုံဆွေးနွေးမှု မကြာခဏ ပြုလုပ်ခဲ့သည်။

လက်ရှိတွင် PPST ၏ တင်းပြည့် အဖွဲ့ဝင်အဖြစ် ရခိုင်ပြည်လွတ်မြောက်ရေးပါတီ (ALP)၊ ဒီမိုကရေစီ အကျိုးပြု ကရင့် တပ်မတော် (DKBA)၊ ကရင် အမျိုးသားအစည်းအရုံး/ကရင်အမျိုးသား လွတ်မြောက်ရေး တပ်မတော် ငြိမ်းချမ်းရေးကောင်စီ (KNU/ KNLA-PC) ၊ လားဟူဒီမိုကရက်တစ် အစည်းအရုံး (LDU)၊ ပအိုဝ်း အမျိုးသား လွတ်မြောက်ရေး အဖွဲ့ချုပ် (PNLO) တို့ဖြစ်ကြပြီး ပူးပေါင်းအဖွဲ့ဝင် အဖြစ် မွန်ပြည်သစ်ပါတီ (MNSP) နှင့် သျှမ်းပြည် ပြန်လည်ထူထောင်ရေးကောင်စီ၊ သျှမ်းပြည် တပ်မတော် RCSS/SSA တို့ ဖြစ်ကြသည်။

ချင်းအမျိုးသားတပ်ဦး (CNF) ၊ မြန်မာနိုင်ငံလုံးဆိုင်ရာ ကျောင်းသားများ ဒီမိုကရက်တစ် တပ်ဦး (ABSDF) နှင့် ကရင်အမျိုးသားအစည်းအရုံး (KNU) တို့ သည် စစ်အာဏာသိမ်းပြီးနောက်ပိုင်း PPST အဖွဲ့တွင်းသို့ ပါဝင် လှုပ်ရှားမှု မရှိတော့ကြောင်းလည်း သိရသည်။

စစ်တပ်၏ မတရားအာဏာသိမ်းမှုကြောင့် တစ်နိုင်ငံလုံး အပစ်အခတ်ရပ်စဲရေးသဘောတူစာချုပ် NCA ပျက်ပြယ် သွားပြီဟု ကေအဲန်ယူ – ကရင်အမျိုးသားအစည်းအရုံး၏ အထွေထွေအတွင်းရေးမှူးချုပ်ဖြစ်သူ ပဒိုစောတာဒိုမူးက ဩဂုတ်လ (၁၀) ရက်တွင် ပြုလုပ်သည့် (၁၇)ကြိမ်မြောက် အစည်းအရုံး ကွန်ဂရက်အပြီး ပထမဦးဆုံး ရက် (၁၀၀) အတွင်း လုပ်ဆောင်ခဲ့မှုဆိုင်ရာ သတင်းစာရှင်းလင်းပွဲတွင် ပြောကြားလိုက်သည်။