သျှမ်းပြည် လွိုင်လင်ခရိုင် လဲချားမြို့နယ်အတွင်း စစ်ကောင်စီတပ် နှင့် ရှမ်းပြည်တိုးတက်ရေးပါတီ၊ ရှမ်းပြည်တပ်မတော် (SSPP/SSA) ကြား တိုက်ပွဲကြောင့် စစ်ရှောင်ထွက်ပြေးနေရသည့် ပရဟိတ ကျောင်းမှ ကလေးငယ်များ ယနေ့ထိ စာသင် ခွင့်မရခဲ့သေးကြောင်း သိရသည်။

.

ပြီးခဲ့သည့် သြဂုတ်လ ၆ ရက်တွင် လဲချားမြို့နယ်တွင်း၌ စစ်ကောင်စီ နှင့် SSPP/SSA တပ်တို့ တိုက်ပွဲ ဖြစ်ခဲ့ရာ စစ်ကောင်စီဘက်မှ ပစ်လိုက်သည့် လက်နက်ကြီးများသည် လဲချားမြို့ တောင်ဘက်ရှိ ကောင်းဝိုးလုံ ပရဟိတကျောင်းအနီးသို့ ကျရောက်ထိမှန်ကြောင်း ဒေသခံများထံမှ သိရသည်။

ယင်းကဲ့သို့ လက်နက်ကြီး ကျရောက်သည့်အတွက် ကောင်းဝိုးလုံ ပရဟိတကျောင်းမှ ကျောင်းသူ တစ်ဦး သတိလစ် မေ့မျောသွားခဲ့ပြီး ကျောင်းသား/သူများအားလုံးက လဲချားမြို့ပေါ် ရပ်ကွက် (၄) ရှိ ကမ္မဌာန်းကျောင်းသို့ စစ်ရှောင်ခိုလှုံနေရကြောင်း စစ်ရှောင်ကူညီသူက သျှမ်းသံတော်ဆင့်ကို ပြောသည်။

“လက်နက်ကြီးက ကျောင်းနားကို အရမ်းကပ်ကျတော့ ကျောင်းသူ တစ်ဦး ကြောက်လန့်ပြီး သတိလစ် သွားတယ်၊ အဲ့ဒီအချိန်မှာ တချို့က ကျောင်းသူကို ပြုစုရင်း တချို့က စစ်ရှောင်ဖို့ ပြင်ဆင်ကြတာပေါ့၊ အခုတော့ ကျောင်းသား/သူ စုစုပေါင်း ၆၆ ယောက်နဲ့ ဆရာ/မပေါင်း ၇ ယောက်က မြို့ပေါ် စစ်ရှောင်ခဲ့တာ” ဟု စစ်ရှောင်ကူညီပေးနေသူ အမျိုးသား တစ်ဦးက သျှမ်းသံတော်ဆင့်ကို ပြောသည်။

လက်ရှိတွင် ကောင်းဝိုးလုံပရဟိတ ကျောင်းသား / သူ (၆၆) ဦး နှင့် ဆရာ/ဆရာမ ၇ ဦး၊ ကျောင်းထိုင် ဘုန်းကြီး ၁ ပါး တို့သည် လဲချားမြို့ပေါ် ရပ်ကွက် (၄) ရှိ ကမ္မဌာန်းကျောင်းတိုက်တွင် စစ်ရှောင်ရောက်ရှိ နေကြကြောင်းသိရသည်။

စစ်ရှောင် ကျောင်းသား/သူများအနက် ဖျားနာသည့် ကျောင်းသူ (၃) ဦး၊ အနာစိမ်းပေါက်သည့်အတွက် ခွဲစိတ်ရသည့် ကျောင်းသား ၁ ဦးလည်း ပါဝင်ကြောင်းလည်း သိရသည်။

“ဖျားနာတဲ့ သူတွေကို ကျန်းမာရေး စောင့်ရှောက်မှုပေးနေတယ်၊ ခွဲစိတ်ရတဲ့ ကျောင်းသားကလည်း ခွဲစိတ်အောင်မြင်ပြီး လက်ရှိတော့ ဆေးရုံမှာပါ။ ဒါပေမဲ့ ကျောင်းသားတွေကတော့ စာမသင်ရသေးဘူး၊ နေရပ်လည်း မပြန်နိုင်ကြသေးဘူး။ စစ်ရေးတင်းမာနေတုန်းမို့ အခြေအနေကို စောင့်ကြည့်နေရတုန်း” ဟု စစ်ရှောင်ကို ကူညီပေးနေသူက သျှမ်းသံတော်ဆင့်ကို ဆက်ပြောသည်။

လဲချားမြို့နယ်အတွင်း ဖြစ်ပွားခဲ့သည့် တိုက်ပွဲကြောင့် ကောင်းဝိုးလုံ ပရဟိတကျောင်းအပြင် မက်လန်းကျေးရွာ နှင့် တိုက်ပွဲဖြစ်ပွားရာ အနီးရှိ ဒေသခံများ ရာနဲ့ချီ စစ်ရှောင်ထွက်ပြေးရကြောင်းလည်း သိရသည်။

သြဂုတ်လ ၆ ရက်နေ့ နောက်ပိုင်း ဒေသအတွင်း ပစ်ခတ်သံများ ထပ်မကြားရသေးသော်လည်း စစ်ကောင်စီဘက်မှ အင်အားဖြည့်တင်းမှု ဆက်လက်ရှိနေသေးသည့်အကြောင်း ၊ စစ်ရေးတင်းမာမှု ရှိနေသေးသည့် အကြောင်း ဒေသခံများထံမှ သိရသည်။

ယင်းကဲ့သို့ စစ်ရေးတင်းမာမှု ရှိနေသည့်အတွက် လူနေကျေးရွာအနီး၊ စာသင်ကျောင်း အနီး တိုက်ပွဲ မဖြစ်ကြရန် ဒေသအတွင်းက သံဃာတော်များ အရပ်သား ဒေသခံများကလည်း မေတ္တာရပ်ခံ တောင်းဆိုလိုကြောင်းလည်း ပြောဆိုကြသည်။