သျှမ်းပြည် တောင်ကြီးခရိုင်ရှိ ရွာငံမြို့နယ်၊ ပင်းတယမြို့နယ် နှင့် ရပ်စောက်မြို့နယ်တို့မှ ဒေသခံ လူငယ် ၁၅ ဦးထက်မနည်းကို တော်လှန်ရေး နှင့် ပတ်သက်သည်ဟုဆိုပြီး စစ်ကောင်စီက လာရောက် ဖမ်းဆီးခြင်းဖြစ် ကြောင်း သတင်းရရှိသည်။
.
ပြီးခဲ့သည့် သြဂုတ်လ ၁ ရက်မှ ၇ ရက်အထိ ဒေသအတွင်းမှ စစ်ကောင်စီ တပ်သားများနှင့် ၎င်းတို့၏ လက်အောက်ခံ ပျူစောထီးများသည် သေနတ်ကိုယ်စီဖြင့် လူငယ်များကို လာရောက်ဖမ်းဆီး သွားကြောင်း ဒေသခံများထံမှ သတင်းသိရသည်။
ပြီးခဲ့သည့် သြဂုတ်လ ၆ ရက်တွင် ရပ်စောက်မြို့နယ် ကောင်းဘိုရွာမှ မိသားစုတစ်ခုကို တော်လှန်ရေး တပ်ဖွဲ့ထံ ထောက်ပံ့နေသည်ဆိုသည့် စွပ်စွဲချက်ဖြင့် အိမ်သားအားလုံးကို ဖမ်းဆီးသွားကြောင်း အမည် မဖော်လိုသူ တစ်ဦးက သျှမ်းသံတော်ဆင့်ကို ပြောသည်။
“PDF တွေကို ထောက်ပို့ လုပ်ပေးနေတယ်ဆိုပြီး လာဖမ်းတာတဲ့၊ အမှန်တော့ ပျူစောထီးက လုပ်ကြံပြီး ပြောတာပါ၊ သူတို့ သာမာန် မိသားစုပါပဲ၊ အဖေ အမေ နဲ့ သားနှစ်ယောက် အားလုံးကို ဖမ်းသွားပြီးတော့ အိမ်ကိုလည်း သစ်သားပြား နဲ့ ကြက်ခြေခတ် ပိတ်သွားတယ်” ဟု အမည် မဖော်လိုသူ ဒေသခံ တစ်ဦးက သျှမ်းသံတော်ဆင့်ကို ပြောသည်။
ဖမ်းဆီးခံရသူများသည် ဒေသအတွင်း ပျူစောထီးများ၏ မလိုမုန်းတီးမှုတွေကြောင့် မဟုတ်မှန် စွပ်စွဲချက်ဖြင့် ဖမ်းဆီးခံရခြင်းဖြစ်ကြောင်း ဒေသခံများက သျှမ်းသံတော်ဆင့်ကို ပြောသည်။
ထို့အပြင် ပင်းတယမြို့နယ်မှ အသက် ၂၀ ကျော် လူငယ် ၃ ဦး နှင့် ရွာငံမြို့နယ်မှ ဒေသခံ အမျိုးသား ၈ ဦး ထက်မနည်းကို ဓနုပြည်သူ့တော်လှန်ရေးတပ်ဦး (DPLF) နှင့် ပတ်သက်သည်ဟုဆိုကာ ဖမ်းဆီးသွား ကြောင်းလည်း သိရသည်။
“DPLF ဖွဲ့စည်းကြောင်း ထုတ်ပြန်လာပြီးတဲ့နောက်မှာ ပင်းတယဘက်ကို စစ်ကောင်စီ စစ်ကြောင်း ပိုများလာတယ်။ အရင်က ရွာငံဘက်စခန်းချနေတဲ့ တပ်ဖွဲ့ကလည်း ပင်းတယဘက်ကို ရောက်လာကြတယ်။ ဖမ်းဆီးခံသွားရတဲ့သူတွေထဲက တချို့ကလည်း မိသားစုဝင်နဲ့ အဆက်အသွယ်မရ၊ တွေ့ခွင့်မရကြဘူး” ဟု အထက်ပါ ပုဂ္ဂိုလ်က သျှမ်းသံတော်ဆင့်ကို ပြောသည်။
ဓနုပြည်သူ့တော်လှန်ရေးတပ်ဦး (DPLF) ဖွဲ့စည်းကြောင်းကို ဇူလိုင်လ (၂၉) ရက်နေ့တွင် ထုတ်ပြန်လာပြီးသည့်နောက် စစ်ကောင်စီတပ်ဖွဲ့သည် ပျူစောထီးများကို သေနတ်နှင့် ကျည်ဆန် ပေးအပ်မှု ပိုမိုများလာကြောင်းလည်း ဒေသခံများထံမှ သိရသည်။
ပြီးခဲ့သည့် ဇူလိုင်လ (၃၁) ရက်နေ့မှာလည်း ရွာငံမြို့နယ်မှ လွှစင်ကျေးရွာ နှင့် ပဲရင်းတောင်ကျေးရွာမှ အမျိုးသား (၄) ဦးကို DPLA နှင့် ပတ်သက်မိသည် ဆိုသည့် စွပ်စွဲချက်ဖြင့် ဖမ်းဆီးသွားသည့်အပြင် နေအိမ်ကိုလည်း မီးရှို့ဖျက်ဆီးမှု ပြုလုပ်သွားခဲ့သည်။
စစ်အာဏာသိမ်းမှု မရှိခင် အချိန်တွင် ရွာငံမြို့နယ်၊ ပင်းတယမြို့နယ်တို့သည် စစ်တပ်အခြေစိုက် လှုပ်ရှားမှု မရှိသည့် ငြိမ်းချမ်းသည့် ဒေသဖြစ်ခဲ့သော်လည်း စစ်အာဏာသိမ်းနောက်ပိုင်းတွင် စစ်ကောင်စီ တပ်အပြင် ၊ ပျူစောထီး နှင့် ဒလန်များကြောင့် ပြည်သူများ ဖမ်းဆီးခံရမှုတစ်နေ့တစ်ခြား များပြားလာကြောင်းလည်း သိရသည်။
