သျှမ်းပြည် မူဆယ်မြို့နယ်အတွင်းတွင် အာဏာသိမ်း စစ်ကောင်စီ နှင့် တအာင်း (ပလောင်) အမျိုးသား လွတ်မြောက်ရေး တပ်မတော် (TNLA) တပ်ဖွဲ့ တို့ စစ်ရေးတင်းမာနေကြား TNLA မှ ဆက်ကြေး (အခွန်) ကောက် မပြတ်ကြောင်း မူဆယ်မြို့နယ်ဒေသခံများ ပြောပြချက်အရ သိရသည်။

.

မူဆယ်မြို့နယ် နှင့် နမ့်ခမ်းမြို့နယ်ကြား ဆက်သွယ်ထားသည့် စယ်လန့်ကျေးရွာအုပ်စု၏ ဖိုင်ကျောင်းရပ်မှ ကားလမ်းမကြီးပေါ်တွင် TNLA မှ ဆက်ကြေးကောက်နေကြောင်း ဒေသခံများက သျှမ်းသံတော်ဆင့်ကို ပြောသည်။

“အခွန်ကောက်နေတဲ့ နေရာက တိုက်ပွဲဖြစ်နေတဲ့ နေရာနဲ့ ၂ ဖာလုံလောက်ပဲ ကွာတာ၊ ဟိုဘက်က တိုက်ပွဲဖြစ်နေလည်း ဒီဘက်မှာက အခွန်ကောက် မပြတ်ဘူး၊ ဥပုသ်နေ့လည်း ကောက်တယ်၊ အိမ်စီးကား ဆိုရင်တော့ ၃ ထောင်ပေါ့၊ ကုန်တင်ကား နဲ့ လိုင်းကား အသေးဆိုရင် ၃ သိန်း ၊ ကားအကြီးဆိုရင် ၉ သိန်းတောင်းတာ” ဟု ဒေသခံများက သျှမ်းသံတော်ဆင့်ကို ပြောသည်။

အဆိုပါ TNLA အခွန်ကောက်နေသည့် နေရာသည် မူဆယ် – မန္တလေး ဆက်သွယ်ထားသည့် ပြည်ထောင်စု ကားလမ်းမကြီးလည်း ဖြစ်နေသည့်အပြင် စစ်ကောင်စီတပ်ဖွဲ့ နှင့် ထိတွေ့တိုက်ပွဲ ဖြစ်နေသည့် လွိုင်တေးမိန်းတောင်ခြေနှင့် ၂ ဖာလုံခန့် ကွာဝေးကြောင်းလည်း သိရသည်။

TNLA တပ်ဖွဲ့ တောင်းယူကောက်ခံနေသည့် အခွန်ပမာဏကို မပေးနိုင်သည့် ကားသမားများသည် စယ်လန့်ကျေးရွာအုပ်စု နောင်ဆိုင်ကျေးရွာတွင် ခေါ်ယူဖမ်းဆီးထားကြောင်းလည်း ကြုံတွေ့ရသူ ကားသမား တစ်ဦးက သျှမ်းသံတော်ဆင့်ကို ပြောသည်။

“သူတို့ တောင်းတာ မပေးနိုင်တဲ့ သူတွေကို ကားနဲ့အတူ နောင်ဆိုင်ရွာမှာ ဖမ်းခေါ်ထားတယ်၊ မိသားစုဝင် ဒါမှမဟုတ် တစ်ယောက်ယောက်က ပိုက်ဆံယူလာပေးမှ ပြန်လွတ်ပေးတာ၊ သူတို့တောင်းတဲ့ အခွန်ကလည်း တစ်ခေါက်စာပဲ ဖြစ်တယ်၊ တစ်နှစ်လုံးစာ မဟုတ်ဘူး။ အဲ့ကြောင့် ကားသမားတွေက အရမ်း ခက်ခဲရတယ်၊ ကြောက်လည်း ကြောက်ရတယ်” ဟု ကြုံတွေ့ရသူ ကားသမား တစ်ဦး က သျှမ်းသံတော်ဆင့်ကို ပြောသည်။

ယင်းကဲ့သို့ ထိတွေ့တိုက်ပွဲ ဖြစ်ပွားရာ အနီး ဆက်ကြေးကောက်မပြတ်ရှိနေသည့် TNLA တပ်ဖွဲ့နှင့် ပတ်သက်ပြီး ဒေသခံများအနေဖြင့် စစ်ရေးစစ်ဒဏ် အပြင်၊ အခွန်ပေးဆောင်ဖို့ရန်အတွက်ပါ ပူပန်သောက ရောက်နေရကြောင်းလည်း ဒေသခံများက ပြောဆိုသည်။

အထက်ပါ အခွန်ဆက်ကြေးကောက်ယူခြင်း ကိစ္စဖြစ်စဥ်နှင့် ပတ်သက်ပြီး TNLA တပ်ဖွဲ့၏ ပြောရေးဆိုခွင့် နှင့် ပြန်ကြားရေး တာဝန်ခံထံသို့ ဖုန်းဖြင့် အကြိမ်ကြိမ် ဆက်သွယ်မေးမြန်းခဲ့ပေမယ့် အဆက်အသွယ် မရခဲ့ပေ။

၂၀၂၃ ခုနှစ် အတွင်းတွင် TNLA တပ်ဖွဲ့ အခွန်ကောက်ယူမှု ပိုမိုများပြားလာသည့်အပြင် ပြီးခဲ့သည့် ဇွန်လ ၁ ရက်နေ့ မိုင်းလားမြို့မှာ ကျင်းပခဲ့သည့် စစ်ကောင်စီ ငြိမ်းချမ်းရေး အဖွဲ့ နှင့် ညီနောင်မဟာမိတ်တပ်ဖွဲ့ တွေ့ဆုံမှု အပြီးမှာလည်း စစ်ကောင်စီ နှင့် TNLA တပ်ဖွဲ့ကြား ထိတွေ့တိုက်ပွဲ ပြင်းထန်လာခဲ့သည်။