သျှမ်းပြည် မူဆယ်မြို့ပေါ်အတွင်း ယနေ့ (သြဂုတ် ၂) ရက် နံနက် ၁၁ နာရီခွဲဝန်းကျင်တွင် လက်နက်ကြီး (၁၀) ကြိမ်ဆက်တိုက် ပေါက်ကွဲသံကြီး ထွက်ပေါ်လာကြောင်း စုံစမ်းသိရသည်။
ယနေ့ (သြဂုတ် ၂) ရက်တွင် သျှမ်းပြည် မူဆယ်မြို့နယ် စယ်လန့်ကျေးရွာရှိ လွိုင်တေးမိန်း တောင်ခြေတွင် စစ်ကောင်စီ နှင့် တအာင်း (ပလောင်) အမျိုးသား လွတ်မြောက်ရေးတပ်မတော် (TNLA) တို့ တိုက်ပွဲဖြစ်ပွားခဲ့ပြီး၊ ထိုတိုက်ပွဲဖြစ်ပွားသည့် နေရာသည် မူဆယ်မြို့ပေါ် နှင့် ၇ မိုင်သာ ကွာဝေးကြောင်း မူဆယ်မြို့ အသက် ၄၀ ကျော်အရွယ်ရှိ အမျိုးသားတစ်ဦးက သျှမ်းသံတော်ဆင့်ကို ပြောသည်။
“ ဒီမနက်ပိုင်းမှာ မူဆယ်မြို့ပေါ်ထိ လက်နက်ကြီး ၁၆ ကြိမ်လောက် ကြားရတယ်။ သိရသလောက်ကတော့ မူဆယ်မြို့ ပေါ်မှာရှိတဲ့ စစ်ကောင်စီတပ်ဖွဲ့က လွိုင်တေးမိန်းဘက်ကို လက်နက်ကြီးတွေ ပစ်ကူနေတာ။ မူဆယ်မြို့ထဲမှာ အသံက တော်တော်ကျယ်တယ် “ ဟု ၎င်း အမျိုးသား က ဆိုသည်။
ထို့အပြင် ယနေ့ (သြဂုတ်လ ၂ ) ရက် နံနက်ပိုင်းတွင်လည်း မူဆယ်မြို့နယ် တုန်ခန်ကျေးရွာအုပ်စုရှိ အထက်တုန်ခန် နှင့် အောက်တုန်ခန်ရွာအကြား ကျင်ဆန်းကျော့ အနီး နှစ်ဖက် ပစ်ခတ်သံများ ထွက်ပေါ်လာပြီး လူနေကျေးရွာအတွင်း လက်နက်ကြီး ကျရောက်ပေါက်ကွဲမှုလည်း ရှိကြောင်း ဒေသခံများက ပြောသည်။
“ဘယ်အဖွဲ့နဲ့ အဖွဲ့ ပစ်နေကြတာလည်းတော့ မသိရဘူး၊ ဒါပေမဲ့ ပစ်ခတ်မှုကတော့ တော်တော် ကြမ်းတယ်၊ အောက်တုန်ခန် ထဲကိုလည်း လက်နက်ကြီး ကျကွဲတာ ရှိတယ်လို့ သိရတယ်။ အတိအကျတော့ မသိရသေးဘူး” ဟု ဒေသခံများက သျှမ်းသံတော်ဆင့်ကို ပြောသည်။
ကျင်ဆန်းကျော့ဘက်မှ တိုက်ပွဲတွင် မည်သည့်လက်နက်ကိုင်များ ဖြစ်ကြောင်း နှင့် ထိခိုက်ပျက်စီးမှုများကို သျှမ်းသံတော်ဆင့် အနေဖြင့် သီးခြား အတည်ပြုနိုင်ခြင်း မရှိသေးပေ။
ယမန်နေ့ (သြဂုတ် ၁) ရက်တွင် TNLA စစ်ကြောင်း တစ်ခုသည် မူဆယ်မြို့နယ်၊ စယ်လန့်ကျေးရွာအုပ်စုရှိ လွိုင်တေးမိန်းတောင်သို့ ရောက်ရှိလာပြီး တောင်ပေါ်ကျောင်းစောင့် ဘုန်းကြီးကျောင်းမှ ဦးဇင်း ကိုလည်း တောင်အောက် ဆင်းခိုင်းခဲ့ကြောင်း သိရသည်။
အာဏာသိမ်း စစ်ကောင်စီ တပ်ဖွဲ့ နှင့် တအာင်း (ပလောင်) TNLA တပ်ဖွဲ့တို့သည် ပြီးခဲ့သည့် ဇူလိုင်လ ၂၃ ရက်မှ စတင်ကာ မူဆယ်မြို့နယ်အတွင်း ထိတွေ့တိုက်ပွဲ ပြင်းထန်လာခဲ့ ခြင်း ဖြစ်သည်။
ယင်းကဲ့သို့ ဒေသအတွင်း ထိတွေ့တိုက်ပွဲ ဖြစ်ပွားမှုများနှင့် ပတ်သက်ပြီး မေးမြန်းရန် အတွက် တအာင်း (ပလောင်) အမျိုးသား တပ်မတော် TNLA ၏ ပြန်ကြားရေး နှင့် ပြောရေး ဆိုခွင့် ရှိသူထံသို့ ဖုန်းဖြင့် ဆက်သွယ်ခဲ့သော်လည်း အဆက်အသွယ်မရခဲ့ပေ။
