သျှမ်းပြည် မူဆယ်မြို့နယ် စယ်လန့်ကျေးရွာအနီး ယနေ့ (ဇူလိုင် ၃၀)ရက် တွင် တအာင်း (ပလောင်) အမျိုးသားလွတ်မြောက်ရေးတပ်မတော် (TNLA)နှင့် စစ်ကောင်စီတို့ ကြားတိုက်ပွဲဖြစ်ပွားနေကြောင်း သတင်းရရှိသည်။
ယနေ့ (ဇူလိုင် ၃၀)ရက်ထိ စယ်လန့်ကျေးရွာအနီးတိုက်ပွဲဖြစ်ပွားမှုကြောင့် စယ်လန့်စျေးနေ့ဖြစ်သော်လည်း စျေးပိတ်ထားရကြောင်း စယ်လန့်ဒေသခံအမျိုးသား တစ်ဦးက သျှမ်းသံတော်ဆင့်ကိုပြောသည်။
“ တိုက်ပွဲက ဒီနေ့မနက်ထိ ကြားနေရတာ။ စယ်လန့်စျေးနေ့တောင် စျေးပိတ်ထားရတဲ့အဆင့်ပဲ။ တိုက်ပွဲက ထပ်ဖြစ်အုံးမယ်ထင်တယ်။ ကျေးရွာကလူတွေအများစုက မူဆယ်ဘက်တိမ်ရှောင်သွားကြပြီ” ဟု စယ်လန့်ဒေသခံ အမျိုးသားက ဆိုသည်။
မူဆယ်မြို့နယ် စယ်လန့်ကျေးရွာအနီးတွင် တိုက်ပွဲများဖြစ်လာသည်မှာ ရက်ဆက်ဖြစ်နေပြီး TNLA တပ်သားများနှင့် စစ်ကောင်စီတပ်သားများသည် အရပ်သားနေအိမ်ထဲ ဝင်ရောက်နေထိုင်သဖြင့် အချို့ ဒေသခံများက ကျေးရွာအတွင်း တိုက်ပွဲဖြစ်လာမည်ကို စိုးရိမ်နေကြသည်။
“ ၂ဖက် တပ်သားတွေက ကျေးရွာအိမ်တွေမှာ လာနေကြတယ်။ ရွာထဲ လက်နက်ကြီးကျတာတွေ တိုက်ပွဲဖြစ်မှာတွေကို ကြောက်နေရတယ်။ မူဆယ်မြို့ပေါ် ဆွေမျိုးရှိတဲ့သူတွေကတော့ ရှောင်တိမ်းသွားပြီ” ဟု ၎င်းဒေသခံအမျိုးသားက ဆိုပြန်သည်။
တိုင်းရင်းသားလက်နက်ကိုင် တပ်ဖွဲ့ ညီနောင်မဟာမိတ် (၃)ဖွဲ့ နှင့် စစ်ကောင်စီ လက်အောက်ခံ အမျိုးသား စည်းလုံး ညီညွတ်ရေး နှင့် ငြိမ်းချမ်းရေး ဖော်ဆောင်မှု ညှိနှိုင်းရေးကော်မတီ NSPNC တို့ သည် ဇွန်လ(၁)ရက်မှ (၂)ရက်ထိ သျှမ်းပြည် အထူးဒေသ (၄) မိုင်းလားမြို့တွင် တွေ့ဆုံခဲ့သည်။
ထိုတွေ့ဆုံမှုပြီးနောက်ပိုင်း သျှမ်းပြည် လားရှိုးမြို့နယ်၊ ကျောက်မဲမြို့နယ် ၊ကွတ်ခိုင်မြို့နယ်နှင့် မူဆယ်မြို့နယ်တို့အတွင်း စစ်ကောင်စီနှင့် TNLA တို့ကြား တိုက်ပွဲဖြစ်ပွားလာခဲ့သည်။
Leave a Comments