သျှမ်းပြည် မူဆယ်မြို့နယ်၊ စယ်လန့်ကျေးရွာ အတွင်း၌ အာဏာသိမ်း စစ်ကောင်စီ နှင့် တအာင်း (ပလောင်) အမျိုးသား လွတ်မြောက်ရေး တပ်မတော် (TNLA) တပ်သားများ ဝင်ရောက်နေထိုင် ကြကြောင်း စုံစမ်းသိရသည်။

ယနေ့ (ဇူလိုင်လ ၂၇) ရက်တွင် စယ်လန့်ကျေးရွာအုပ်စုအတွင်း၌ အာဏာသိမ်း စစ်ကောင်စီ တပ်သားများက ကျေးရွာအတွင်းရှိ ပြည်သူ့အိမ်ဝန်းများအတွင်း လာရောက်စခန်းချနေကြောင်း ဒေသခံများက သျှမ်းသံတော်ဆင့်ကို ပြောသည်။

“စစ်ကောင်စီဘက်က အင်အားထပ်တိုးလာပြီးတော့ စယ်လန့်ကျေးရွာထဲက လူနေအိမ်ဝန်းတွေထဲမှာ ဝင်ပြီး နေရာ ယူထားတယ်၊ တဖက်ကလည်း TNLA တပ်ဖွဲ့ကလည်း စစ်ကောင်စီ နဲ့ မနီးမဝေးနေရာမှာ နေရာယူထားတယ်။ နှစ်ဖက်တပ်ဖွဲ့ရဲ့ နေရာက တော်တော်ကို နီးပါတယ်” ဟု လုံခြုံရေးအရ အမည်မဖော်လိုသူ တစ်ဦးက သျှမ်းသံတော်ဆင့်ကို ပြောသည်။

လက်ရှိ တအာင်း (ပလောင်) အမျိုးသား လွတ်မြောက်ရေး တပ်မတော် TNLA က ကောင်းထိုလင် အနီး တစ်ဝိုက်တွင် နေရာယူထားသည့်အတွက် စစ်ကောင်စီ နေရာယူထားသည့်နေရာနှင့် မလှမ်းမကမ်း အကွာအဝေးတွင် ရှိနေကြောင်း ဒေသခံများက သျှမ်းသံတော်ဆင့်ကို ပြောသည်။

ယင်းကဲ့သို့ စစ်သားများ ကျေးရွာအတွင်း ဝင်ရောက်နေထိုင်မှုတွေကြောင့် တချို့သော သက်ကြီးရွယ်အိုများသည် မူဆယ် နှင့် နမ့်ခမ်းမြို့ပေါ်သို့ ရှောင်တိမ်းသွားရကြောင်း နှင့် ကျန်ရှိနေသည့် ဒေသခံများကလည်း အိမ်တံခါးများ ပိတ်ကာ နေထိုင်ကြရကြောင်း သိရသည်။

“အခုချိန်ထိ စစ်ရေးတင်းမာမှုက ရှိနေသေးတော့ တိုက်ပွဲတွေ ဖြစ်မှာကြောက်တာပေါ့၊ တချို့ စစ်သားတွေ ကလည်း အိမ်ဝန်းထဲ ဝင်နေတာတွေ ရှိတော့ တချို့က အိမ်တံခါးတွေကို ပိတ်ပြီး အိမ်ထဲ တိတ်တိတ်နေကြတာမျိုးတွေ လုပ်ရတယ်” ဟု ဒေသခံများက ပြောသည်။

လက်နက်ကိုင် တပ်ဖွဲ့များမှ လူနေကျေးရွာအတွင်း ရပ်ရွာအတွင်း ဝင်ရောက်နေထိုင်ခြင်း၊ လူထု နှင့် အတူ ရောနှော နေထိုင်ခြင်းတို့သည် ဂျီနီဗာကော (Geneva Call) ဥပဒေ နှင့် ဆန့်ကျင်သည့်အပြင် စစ်ရာဇဝတ်မှု မြောက်ကြောင်း လည်း သိရသည်။

ပြီးခဲ့သည့် ဇူလိုင်လ ၂၃ ရက်နေ့မှ စတင်ကာ စစ်ကောင်စီတပ်ဖွဲ့သည် တအာင်း (ပလောင်) အမျိုးသား လွတ်မြောက်ရေး တပ်မတော် TNLA နှင့် ထိတွေ့တိုက်ပွဲ ပြင်းထန်လာခဲ့ပြီး လေကြောင်းဖြင့်ပါ တိုက်ခိုက်မှု အပြင် လက်နက်ကြီး/ငယ်ဖြင့်လည်း တစ်ဖက်သတ် ရမ်းသမ်းမှု ပြုလုပ်လာခဲ့သည်။