သျှမ်းပြည် မူဆယ်မြို့နယ် စယ်လန့်ကျေးရွာ အနီး ဖြစ်ပွားသည့် အာဏာသိမ်း စစ်ကောင်စီ တပ်ဖွဲ့ နှင့် တအာင်း (ပလောင်) အမျိုးသား လွတ်မြောက်ရေး တပ်မတော် TNLA တပ်ဖွဲ့တို့အကြား ထိတွေ့တိုက်ပွဲတွင် ပြည်သူ့စစ် ၁ ဦးသေ ၂ ဦး ထိခိုက်ဒဏ်ရာ ရသွားကြောင်း သိရသည်။
ယမန်နေ့ ဇူလိုင်လ ၂၃ ရက်နေ့ ညနေပိုင်းအချိန်တွင် စယ်လန့်ကျေးရွာ နမ့်မွမ်းကျေးရွာအနီး အာဏာသိမ်း စစ်ကောင်စီတပ်ဖွဲ့ နှင့် TNLA တပ်ဖွဲ့တို့ ထိတွေ့တိုက်ပွဲ ဖြစ်ပွားရာ ပြည်သူ့စစ်များ ထိခိုက်သေဆုံးခြင်း ဖြစ်ကြောင်း သိရသည်။
“တိုက်ပွဲဖြစ်ပုံက TNLA တပ်ဖွဲ့ အခွန်ကောက်နေတဲ့ နမ့်မွမ်းတံတားကို ပြည်သူ့စစ်ကားက ဖြတ်မလို့ ကပ်လာတာ ပေါ့။ ဒါပေမဲ့ TNLA က ကြိုပစ်လိုက်တာ။ အဲ့ကနေ စစ်ကောင်စီတပ်ကလည်း ဝင်ပစ်တယ်။ အဲ့ကြောင့် တိုက်ပွဲ ဖြစ်တာ။ ပြည်သူ့စစ် ၁ ဦးသေ၊ ၂ ဦး ဒဏ်ရာရသွားတယ်” ဟု ဒေသခံများက သျှမ်းသံတော်ဆင့်ကို ပြောသည်။
ထို့အပြင် ယင်းတိုက်ပွဲကြောင့် စယ်လန့်မှ ဒေသခံ နေအိမ်များလည်း ထိခိုက်ပျက်စီးရကြောင်းလည်း သိရသည်။
“စယ်လန့်ကျေးရွာမှာ နေအိမ်နှစ်လုံး ထိခိုက်ပျက်စီးတယ်။ မှန်ပြတင်းပေါက်တွေဆို အကုန်ကွဲတာ၊ အိမ်နံရံတွေ ကိုလည်း ထိတယ်။ ကားတွေကိုလည်း ထိတယ်။ တော်တော်များများ ထိခိုက်ပျက်စီးသွားတယ်” ဟု စယ်လန့် ဒေသခံ အမျိုးသား တစ်ဦးက သျှမ်းသံတော်ဆင့်ကို ပြောသည်။
ယင်းကဲ့သို့ ထိတွေ့တိုက်ပွဲ ဖြစ်ပွားသည့် အတွက် စယ်လန့်မှ နမ့်ခမ်းတက်လာသည့် ကားသမားလည်း လမ်းဘေးတွင် ထိုးရပ်ထားရသေးကြောင်း သိရသည်။
အဆိုပါ နမ့်မွမ်းတံတားသည် TNLA တပ်ဖွဲ့မှ အခွန်ကောက်ရန် လာစောင့်သည့် နေရာဖြစ်ပြီး နေ့စဥ်ရက်ဆက် ကောက်ယူတောင်းခံမှုကြောင့် ဒေသခံများ သွားရေးလာရေးအတွက်လည်း ခက်ခဲကြောင်း သိရသည်။
ထို ထိတွေ့တိုက်ပွဲ ဖြစ်ပွားရာ အနီးတစ်ဝိုက်တွင် စစ်ကောင်စီတပ်ဖွဲ့ နှင့် TNLA တပ်ဖွဲ့ အပြင်၊ ရှမ်းပြည်တိုးတက်ရေးပါတီ၊ ရှမ်းပြည်တပ်မတော် SSPP/SSA ၊ ကချင်လွတ်လပ်ရေးတပ်မတော် KIA တို့ကလည်း သွားလာ လှုပ်ရှားလေ့ရှိကြောင်း သိရသည်။
