ထိုင်းနိုင်ငံ ဝန်ကြီးချုပ်အသစ်အတွက်နာမည်ကြီးနေတဲ့ Move Forward Party ခေါင်းဆောင် ဖိထား လင့်ဂျရုန်းရတ် ကို လွှတ်တော်တွင်း မဲခွဲဆုံးဖြတ်ရာမှာ သတ်မှတ်ထားတဲ့ မဲပမာဏ မပြည့်တဲ့အတွက် ရှုံးနိမ့်ခဲ့ပါတယ်။

ဝန်ကြီးချုပ်ဖြစ်ဖို့အတွက် လွှတ်တော်ကသတ်မှတ်ထားတဲ့ မဲပမာဏက (၃၇၆) မဲ ဖြစ်ပြီး ကနေ့လွှတ်တော်အမတ် ၇၀၀ ကျော်က ဝင်ရောက် မဲခွဲဆုံးဖြတ်ရာမှာ (၃၂၀) ကျော် သာ ထောက်ခံမဲရရှိခဲ့ပြီး ကန့်ကွက်မဲ (၁၄၈) မဲ၊ အထက်လွှတ်တော်ကိုယ်စားလှယ်မဲ (၁၂) မဲ နဲ့ ကြားနေမဲ (၁၉၈) မဲ ရှိခဲ့ပါတယ်။

စစ်တပ်က ခန့်အပ်ထားတဲ့ အထက်လွှတ်တော် အမတ် (၂၅၀) ထဲက အမတ် (၂၁၆) ဦးပဲ လွှတ်တော် တက်ရောက်ခဲ့တာဖြစ်ပါတယ်။

ထိုင်းဘုရင်စနစ်ကို အကာအကွယ်ပေးထားတဲ့ ဥပဒေကို ပြင်မယ်လို့ ကြုံးဝါးထားတဲ့ Move Forward Party ခေါင်းဆောင် ဖိထား ကို ထိုင်းဒီမိုကရေစီစနစ်ကို ဖျက်လိုဖျက်ဆီး လုပ်နေတယ်ဆိုပြီး စစ်တပ်ရဲ့အထက်လွှတ်တော်အမတ်တွေက စွပ်စွဲပြီး တခြားသောအမှုတွေတဲ့ အရေးယူဖို့ လုပ်နေကြတာဖြစ်ပါတယ်။

ဒါ့အပြင် ဖိထား လင့်ဂျရုန်းရတ် ကို ဖျက်သိမ်းခံရပြီဖြစ်တဲ့ မီဒီယာကုမ္ပဏီ တစ်ခုမှာ အစုရှယ်ယာဝင်ထားသူဖြစ်လို့ ရွေးကောက်ပွဲ စည်းကမ်းကို ဖောက်ဖျက်တယ်၊ ရွေးကောက်ပွဲမှာ ပါဝင်ဖို့ အရည်အချင်း မပြည့်မှီဘူး ဆိုပြီး အစိုးရဟောင်းအဖွဲ့က ဝိုင်းပြီး တိုင်ကြားတာတွေလည်း ရှိနေပါတယ်။

ပြီးခဲ့တဲ့မေလက ရွေးကောက်ပွဲမှာမဲအများဆုံးနဲ့အနိုင်ရခဲ့တဲ့ ဖိထားတို့ပါတီကို ဝန်ကြီးချုပ်ဖြစ်ခွင့်မပေးတဲ့အပေါ် ထိုင်းလူထုတရပ်လုံးက မကျေမချမ်းဖြစ်နေကြပြီး လူထုအုံကြွမှုကိုကာကွယ်ဖို့အတွက် ကနေ့ညနေပိုင်းမှာတော့ ထိုင်းနိုင်ငံမြို့ကြီးတော်တော်များများရဲ့ လူစုလူဝေးဖြစ်လွယ်မယ့်နေရာတွေမှာ ထိုင်းရဲတွေက လုံခြုံရေးတိုးမြင့်ချထားတာတွေလည်း မြင်တွေ့နေရပါတယ်။

ဖိထားအနေနဲ့ လက်ရှိ လွှတ်တော်မှာ ဝန်ကြီးချုပ်ဖြစ်ရေးမဲပမာဏမမှီပေမယ့် ကန့်ကွက်မဲထက် မဲများနေတာကြောင့်လာမယ့် ၁၉ ရက်နေ့မှာလည်း ယခုလိုအလားတူ မဲခွဲမှုထပ်လုပ်ဉီးမယ်လို့လည်း သတင်းတွေထွက်နေပါတယ်။