ကရင်နီ (ကယား) ပြည်ရှိ စစ်ဘေးရှောင်စခန်း (၂) နေရာကို စစ်ကောင်စီမှ ဗုံးကြဲတိုက်ခိုက်မှုကြောင့် ကလေးငယ် အပါအဝင် (၂) ဦး သေဆုံးပြီး (၄) ဦး ထိခိုက်ဒဏ်ရာ ရရှိခဲ့ကြောင်း စုံစမ်းသိရှိရသည်။
ယနေ့ ( ဇူလိုင် ၁၂) ရက် မနက် ၂ နာရီဝန်းကျင် အချိန်တွင် မြန်မာ – ထိုင်း နယ်စပ်ရှိ စစ်ရှောင်စခန်းတစ်ခုကို လေယာဉ်ဖြင့် ဗုံးကြဲ တိုက်ခိုက်ခဲ့၍ အမျိုးသား ၁ ဦး သေဆုံးပြီး အမျိုးသမီး ၂ ဦး ပြင်းထန်စွာ ဒဏ်ရာရရှိခဲ့ကြောင်း ကရင်နီ လူ့အခွင့်အရေးအဖွဲ့ Karenni Human Rights Group က ထုတ်ပြန်ထားသည်။
စစ်ကောင်စီ၏ ဗုံးကြဲတိုက်ခိုက်မှုကြောင့် စာသင်ကျောင်း၊ ဆေးခန်း၊ စစ်ရှောင် ပြည်သူ့နေအိမ်များ ထိခိုက်ပျက်စီးမှု ရှိခဲ့ကြောင်း သိရသည်။
အလားတူ ယမန်နေ့ ဇူလိုင် ၁၁ ရက် ညသန်းခေါင်ယံ အချိန်တွင် ဖားဆောင်းမြို့နယ်ရှိ စစ်ဘေးရှောင်စခန်း တစ်နေရာကို တိုက်လေယာဉ်ဖြင့် ဗုံးကြဲတိုက်ခိုက်ခဲ့သောကြောင့် ကလေးငယ် ၁ ဦး သေဆုံးသွားခဲ့ရပြီး ပြည်သူ ၂ ဦးလည်း ထိခိုက်ဒဏ်ရာရရှိခဲ့သည်။
ထို့ပြင် ဘာသာရေး အဆောက်အဦး နှင့် နေအိမ်များ ထိခိုက်ပျက်စီးသွားခဲ့ကြောင်း သိရသည်။
“စစ်ကောင်စီက စစ်ရှောင်စခန်းကို (၂) ရက်ဆက်တိုက် ဗုံးကြဲလာတဲ့အတွက် အသက် ၁၁ နှစ် အရွယ်တစ်ယောက် နဲ့ လူကြီး တစ်ယောက် ဆုံးတယ်ပြောတယ်။ အသေးစိတ် အပြည့်အစုံ သိဖို့က ဖုန်းဆက်လို့ မရသေးဘူး။ အခု စစ်ရှောင်တွေကို PDF မိသားစုတွေလို့ သူတို့ စွပ်စွဲပြီး တိုက်နေတာလေ။ ပြည်သူတို့ ဘာတို့လည်း မသတ်မှတ်တော့ဘူး “ ဟု သတင်းရင်းမြစ်မှ ရဲဘော် အမျိုးသမီးတစ်ဦးက ပြောသည်။
စစ်ကောင်စီ ဗုံးကြဲတိုက်ခိုက်မှု နှင့် ပတ်သက်ပြီး အသေးစိတ် သိနိုင်အောင် ဖုန်းဆက်သွယ်ခဲ့သော်လည်း မြေပြင်ဖုန်းလိုင်း ပြတ်တောက်မှုကြောင့် ဆက်သွယ်၍ မရခဲ့ပေ။
ထို့အပြင် ပြီးခဲ့သည့် ဇွန်လအတွင်း စစ်ကောင်စီ၏ လေကြောင်း တိုက်ခိုက်မှု အပါအဝင် စစ်ကြောင်းထိုးခြင်း၊ လက်နက်ကြီးဖြင့် တိုက်ခိုက်ခြင်းများကြောင့် အရပ်သား ၃၃ ဦး သေဆုံးမှုရှိခဲ့ကြောင်း ကရင်နီအမျိုးသားများ ကာကွယ်ရေးတပ် KNDF ကထုတ်ပြန်ထားသည်။
Leave a Comments