သျှမ်းပြည် လားရှိုးခရိုင် တန့်ယန်းမြို့နယ်၊ မိုင်းတွမ်းကျေးရွာအုပ်စုရှိ ကုန်စုံဆိုင်တွင် မီးလောင်မှု ဖြစ်ပွားပြီး စုစုပေါင်းတန်ဖိုး ငွေကျပ်သိန်း ရာချီ ဆုံးရှုံးမှု ရှိနေကြောင်း သိရသည်။

ယမန်နေ့ (ဇူလိုင် ၃) ရက် ညပိုင်း ၉ နာရီဝန်းကျင်တွင် တန့်ယန်းမြို့နယ် မိုင်းတွမ်းကျေးရွာအုပ်စု၊ ပန်အုမ်ကျေးရွာရှိ ကုန်စုံဆိုင်သည် မီးလောင်မှု ဖြစ်ပွားခဲ့ကြောင်း ဒေသခံများက သျှမ်းသံတော်ဆင့်ကို ပြောသည်။

“ခြင်ဆေးခွေ ထွန်းထားလို့ မီးပွားတာလို့ ထင်ပါတယ်။ ဆိုင်ထဲမှာလည်း တော်တော်များများက ကုန်အခြောက်တွေ ဆိုတော့ မီးကူးလွယ်တယ်လေ။ တစ်ဆိုင်လုံး မီးထဲပါသွားတယ်။ ဘာမှ မယူနိုင်ဘူး။ နောက်တစ်ဆိုင်ကိုတော့ မီးကူးသေးတယ်။ အဲ့ဒါကိုတော့ အချိန်မှီ မီးသတ်နိုင်ခဲ့တယ်၊ အဲ့ကုန်စုံဆိုင် မီးလောင်မှုကြောင့် ကျပ်သိန်း ၄၀၀ ကျော် ရှုံးတယ်” ဟု ဒေသခံများက သျှမ်းသံတော်ဆင့်ကို ပြောသည်။

မိုင်းတွမ်းကျေးရွာ အုပ်စုသည် လားရှိုးမြို့နယ် နှင့် တန့်ယန်းမြို့နယ် ကြားရှိ တည်ရှိသည့် ကျေးရွာဖြစ်ကြောင်း သိရသည်။

“မီးလောင်မှု ဖြစ်တဲ့နေရာက မြို့နဲ့လည်း ဝေးနေတော့ မီးသတ်ကားတွေကလည်း အချိန်မှီမရောက်နိုင်ဘူးပေါ့၊ ပြီးတော့ လမ်းကလည်း ခက်ပါတယ်၊ အဲ့ဒါကြောင့်မို့ ပျက်စီးဆုံးရှုံးမှုတွေက များရတာ။ နောက်တစ်ခုကလည်း လာရောက် ကူညီပေးမယ့် အဖွဲ့တွေ ရွာထဲ အထိ ရောက်နိုင်ဖို့က မလွယ်ဘူး” ဟု ဒေသခံများက သျှမ်းသံတော်ဆင့်ကို ဆက်ပြောသည်။

မီးလောင်မှု ဖြစ်ပွားသည့် ကုန်ဆုံဆိုင်သည် တစ်ထပ်အုတ်တိုက် ဖြစ်ပြီး ဆိုင်ခန်း တစ်ခု နှင့် တစ်ခု ချိတ်ဆက်လျက်ရှိသည့် အတွက် မီးများ ကူးသွားကြောင်း၊ မီးကူးသည့် ဆိုင်ခန်းကို ရွာသားများ ဝိုင်းဝန်းကူညီ ငြိမ်းသတ်သည့်အတွက် အချိန်မှီ မီးငြိမ်းသတ်နိုင်သော်လည်း မီးစလောင်သည့် ဆိုင်ခန်းကိုမူ တစ်ဆိုင်လုံးပြာကျသွားကြောင်းသိရသည်။

အဆိုပါ ဇူလိုင်လ ၃ ရက်တွင် သျှမ်းပြည် တောင်ကြီးခရိုင် အောင်ပန်းမြို့နယ် အမှတ် (၃) ရပ်ကွက် နယ်မြေ (၉) ရပ်ကွက်အတွင်းရှိ တော်ဝင်ပညာရေး မိသားစု အဆောင် မီးလောင်မှု ဖြစ်ပြီး ကျောင်းသုံး အထောက်အကူပြု ပစ္စည်းများစွာ ဆုံးရှုံးသွားကြောင်းလည်း သိရသည်။