ငြိမ်းချမ်းရေး လုပ်ငန်းစဥ် ဦးဆောင်အဖွဲ့ PPST အဖွဲ့ဝင် NCA-S EAO (၅) ဖွဲ့သည် စစ်ကောင်စီ လက်အောက်ခံ အမျိုးသား စည်းလုံး ညီညွတ်ရေး နှင့် ငြိမ်းချမ်းရေး ဖော်ဆောင်မှု ညှိနှိုင်းရေး ကော်မတီ NSPNC နှင့် တွေ့ဆုံ ဆွေးနွေးမည် ဖြစ်ကြောင်း သိရသည်။
ပြီးခဲ့သည့် ဇွန်လ ၁၇ ရက် ချင်းမိုင်တွင် ပြုလုပ်သည့် တစ်နိုင်ငံလုံး ပစ်ခတ်တိုက်ခိုက်မှု ရပ်စဲရေး သဘောတူ စာချုပ်ကို လက်မှတ် ရေးထိုးထားသော တိုင်းရင်းသား လက်နက်ကိုင် တော်လှန်ရေး အဖွဲ့အစည်းများ (NCA-S EAO) ၏ မျက်နှာစုံညီ အစည်းအဝေး၌ ဆုံးဖြတ် ဖြစ်ခဲ့ကြောင်း သိရသည်။
ယခုတစ်ကြိမ် NCA-S EAO (၅) ဖွဲ့သာ တက်ရောက်မည် ဖြစ်ကြောင်း PPST ၏ ပြောရေးဆိုခွင့် ရှိသူ ဗိုလ်မှူးကြီး စောကျော်ညွန့် က သျှမ်းသံတော်ဆင့်ကို ပြောသည်။
“ကျနော်တို့ NCA-S EAO (၇) ဖွဲ့ မျက်နှာစုံညီ အစည်းအဝေးက ရရှိတဲ့ သဘောတူ ဆုံးဖြတ်ချက်တစ်ခုလို့ ပြောရမှာ ပေါ့နော်။ ဒီ အစည်းအဝေးမှာ PPST အနေနဲ့ မပြီးပြတ်သေးတဲ့ ကိစ္စရပ်တွေကို ပြန်လည် သုံးသပ်တာရော၊ NSPNC ကနေ သူတို့ နဲ့ နောက်တစ်ခေါက်တွေ့ဖို့ ဖိတ်ခေါ်တာရော ဆွေးနွေး ဖြစ်ခဲ့ပါတယ်။ လာမယ့် NSPNC နဲ့ တွေ့ဆုံမှု မှာ RCSS နဲ့ MNSP တို့က မလိုက်ဖြစ်တော့ဘူး၊ သူတို့ သီးသန့်အဖွဲ့ အနေ နဲ့ သွားမယ်တဲ့” ဟု ဗိုလ်မှူးကြီး စောကျော်ညွန့်က သျှမ်းသံတော်ဆင့် ကိုပြောသည်။
အဆိုပါ NCA-S EAO နှင့် NSPNC တို့၏ တွေ့ဆုံ ဆွေးနွေးမှုတွင် NCA-S EAO မှ (၅) ဖွဲ့သာ တက်ရောက်မည် ဖြစ်ကြောင်း နှင့် သျှမ်းပြည်ပြန်လည်ထူထောင်ရေးကောင်စီ၊ သျှမ်းပြည် တပ်မတော် (RCSS/SSA) ၊ မွန်ပြည်သစ် ပါတီ (MNSP) တို့က သီးသန့် သွားတွေ့ဆုံမည်ဟု ဗိုလ်မှူးကြီး စောကျော်ညွန့်က ပြောသည်။
NCA-S EAO (၅) ဖွဲ့ နှင့် NSPNC တို့၏ တွေ့ဆုံမှုသည် ဇွန်လ ၂၆ ရက်နေ့မှ ၂၈ ရက်နေ့အထိ ၃ ရက်ကြာ နေပြည်တော်တွင် ပြုလုပ် သွားမည် ဖြစ်ကြောင်းသိရသည်။
“RCSS နဲ့ MNSP တို့က သီးသန့်သွားမယ်ဆိုပေမယ့်လည်း ကျနော်တို့ EAO ကြားမှာ (၇) ဖွဲ့လုံး သဘောတူညီ ထားတဲ့ အတိုင်း တူတာကို တွဲလုပ်မယ်၊ မတူတာကို ခွဲလုပ်မယ် ဆိုပြီးတော့ ငြိမ်းချမ်းရေးလုပ်ငန်းစဥ်တွေကို ရှေ့ဆက် လုပ်ဆောင်သွားမှာပါ။ NCA လက်မှတ်ရေးထိုးတုန်းက အကုန်မပါသေးသလို NCA ကို အကောင်အထည် ဖော်နေတဲ့ ကာလမှာလည်း အကုန်မပါနိုင်တာ ရှိနေတယ်၊ ဒါကတော့ ကျနော်တို့အတွက် အဆန်းတကျယ်တော့ မဟုတ်တော့ပါဘူး” ဟု ဗိုလ်မှူးကြီး စောကျော်ညွန့် က ဆက်ပြောသည်။
လက်ရှိတွင် PPST ၏ တင်းပြည့် အဖွဲ့ဝင်အဖြစ် ရခိုင်ပြည်လွတ်မြောက်ရေးပါတီ (ALP)၊ ဒီမိုကရေစီ အကျိုးပြု ကရင့် တပ်မတော် (DKBA)၊ ကရင် အမျိုးသားအစည်းအရုံး/ကရင်အမျိုးသား လွတ်မြောက်ရေး တပ်မတော် ငြိမ်းချမ်းရေးကောင်စီ (KNU/ KNLA-PC) ၊ လားဟူဒီမိုကရက်တစ် အစည်းအရုံး (LDU)၊ ပအိုဝ်း အမျိုးသား လွတ်မြောက်ရေး အဖွဲ့ချုပ် (PNLO) တို့ဖြစ်ကြပြီး ပူးပေါင်းအဖွဲ့ဝင် အဖြစ် မွန်ပြည်သစ်ပါတီ (MNSP) နှင့် သျှမ်းပြည် ပြန်လည်ထူထောင်ရေးကောင်စီ၊ သျှမ်းပြည် တပ်မတော် RCSS/SSA တို့ ဖြစ်ကြသည်။
ပြီးခဲ့သည့် မတ်လ ၂၈ ရက်နေ့တွင် NCA-S-EAO (၇) ဖွဲ့ နှင့် NSPNC တို့ နေပြည်တော်တွင် အလွတ်သဘော တွေ့ဆုံ ဆွေးနွေးခဲ့သည်။
