သျှမ်းပြည် မူဆယ်မြို့ စက်မှုရပ်ကွက်အတွင်းရှိ ခေါက်ဆွဲဆိုင်တစ်ဆိုင်တွင် ယနေ့ ( ဇွန် ၁၆) ရက် နံနက်ပိုင်း ၉ နာရီဝန်းကျင်၌ ပြည်သူ့စစ်တပ်ဖွဲ့တစ်ဦး သေနတ်ပစ်ခတ်ခံရပြီး သေဆုံးသွားကြောင်း စုံစမ်းသိရသည်။
ယနေ့ ဇွန်လ ၁၆ ရက် နံနက်ပိုင်း ၉ နာရီဝန်းကျင်တွင် စက်မှု ရပ်ကွက်ရှိ ခေါက်ဆွဲဆိုင်တစ်ဆိုင်တွင်း အသက် ၅၀ ဝန်းကျင် ပြည်သူ့စစ်တပ်ဖွဲ့တစ်ဦးကို ဆိုင်ကယ်နှစ်စီး နှင့် လူ ၄ ဦးက ဝင်လာပြီး သေနတ်ဖြင့် ပစ်ခတ်ခဲ့ကြောင်း မူဆယ်မြို့ အသက် ၃၀ ကျော် အမျိုးသားတစ်ဦးက သျှမ်းသံတော်ဆင့်ကို ပြောသည်။
“ဘယ်အဖွဲ့ လာပစ်သွားမှန်း မသိဘူး။ ခေါက်ဆွဲဆိုင်ထဲဝင်ပြီး သေနတ် နဲ့ လာပစ်သွားတာ။ ပစ်ခံရတဲ့သူက မန်ဂျယ် ပြည်သူ့စစ်တပ်ဖွဲ့ဝင်က လို့ကြားတယ်။ သေနတ် ၃ ချက် ထိသွားတယ်။ ပါးစပ်နားလေးထိတယ်သွားလို့ ပြောတယ်။ ပေါက်သွားလားတော့ မသိဘူး။ ပုခုံး နဲ့ နံရိုး တွေ ထိသွားတယ် “ ဟု ၎င်း ဒေသခံ အမျိုးသားတစ်ဦးက ပြောသည်။
အဆိုပါ သေနတ်ဖြင့် ပစ်ခတ်ခံရပြီးနောက် မူဆယ်ပြည်သူ့ဆေးရုံသို့ ဆေးဝါးကုသရန် ပို့ဆောင်ခဲ့ရာမှာ ပြင်းထန်စွာ ဒဏ်ရာ၊ ဒဏ်ချက်ကြောင့် သေဆုံးသွားခဲ့ကြောင်း သိရသည်။
ထို စက်မှုရပ်ကွက်အတွင်းရှိ ပစ်ခတ်မှုသည် ယခုတစ်ကြိမ် အပါအဝင် ဒုတိယအကြိမ် ပစ်ခတ်မှု ဖြစ်ပွားနေပြီး ဆက်ကြေးကောက်ခံခြင်း နှင့် ပတ်သက်၍ ပြည်သူ့စစ်တပ်ဖွဲ့ အချင်းချင်း လုပ်ကြံမှုလည်း ဖြစ်နိုင်ကြောင်း ဒေသခံများကပြောဆိုသည်။
“ဒီနေရာမှာ အရင်ကလည်း ဖြစ်ဖူးတယ်။ ဒီတစ်ခါနဲ့ဆိုရင် နှစ်ကြိမ်ရှိပြီ။ အခု ပစ်ခတ်ခံရတာတော့ ဆက်ကြေး ကောက်တာ နဲ့ ပတ်သက်ပြီး သူတို့ အချင်းချင်းက လုပ်ကြံပြီး ပစ်တာလည်း ဖြစ်နိုင်တယ် “ ဟု အသက် ၅၀ ကျော် အမျိုးသားတစ်ဦးက ပြောသည်။
စစ်တပ်က အာဏာသိမ်းပြီးနောက်ပိုင်း မူဆယ်မြို့တွင် ပစ်ခတ်တိုက်ခိုက်မှု၊ ဗုံးပေါက်ကွဲမှု မကြာခဏ ဖြစ်ပွားနေလျက်ရှိပြီး စစ်ကောင်စီတပ်ဖွဲ့ အပါအဝင် ပြည်သူ့စစ်တပ်ဖွဲ့များလည်း မကြာခဏဆိုသလို ပစ်ခတ်ခံရပြီး သေဆုံးနေလျက်ရှိကြောင်း သိရသည်။
