Monday, July 22, 2024

တောင်ကြီး တန်ဆောင်တိုင် ရိုးရာပွဲတော်ကို ပြန်လည်ကျင်းပမည်

Must read

သျှမ်းပြည် တောင်ကြီးမြို့တွင် နာမည်ကြီး တန်ဆောင်တိုင်ရိုးရာပွဲ (မီးပုံးပျံပွဲတော်) ကို ယခု ၂၀၂၃ ခုနှစ်အတွင်း ပြန်လည်စည်ကားစွာ ကျင်းပသွားမည်ဖြစ်ကြောင်း ရိုးရာမီးပုံးပျံ ပညာရှင်များအသင်းထံမှ သိရသည်။

ညမီးကြီး

ပြီးခဲ့သည့် ၂၀၁၉ ခုနှစ် ကိုဗစ် – ၁၉ ကူးစက်မှုရောဂါ ဖြစ်ပွားချိန်မှစပြီး ၃ နှစ်ကြာ ရပ်နားခဲ့ရသည့် တောင်ကြီးတန်ဆောင်တိုင်ရိုးရာပွဲ (မီးပုံးပျံပွဲတော်) ကို ယခု ၂၀၂၃ ခုနှစ်အတွင်း နိုဝင်ဘာလ နောက်ဆုံးပတ်မှစ၍ ပြန်လည်ကျင်းပသွားရန် ရည်ရွယ်ထားကြောင်း ရိုးရာမီးပုံးပျံ ပညာရှင်များအသင်းမှ လုပ်ငန်းကော်မတီ ပြန်ကြားရေးတာဝန်ခံက သျှမ်းသံတော်ဆင့်ကို ပြောသည်။

“ဒီနှစ် တန်ဆောင်တိုင်ပွဲ ပြန်လည်ကျင်းပသွားမယ်လို့ အပေါ်ကနေ အစည်းအဝေး ထိုင်ပြီးတော့မှ ထုတ်ထားတာဗျ။ ကျနော်တို့က အခုမှ ကြေညာထားတယ်ဆိုတော့ မှီပါသေးတယ်။ တကယ်တမ်း ပွဲကျင်းပတာက နိုဝင်ဘာလမှစပြီး ကျင်းပတာဗျ။ ဒီနှစ်တန်ဆောင်မုန်းလပြည့်က ၂၇ ရက်နေ့မှဆိုတော့ နိုဝင်ဘာလ နောက်ဆုံးပတ်လောက်မှပေါ့ ပွဲတော်ကျင်းပသွားမယ် “ ဟု ၎င်းမှ ဖြေကြားထားသည်။

အဆိုပါ တောင်ကြီးတန်ဆောင်တိုင်ရိုးရာပွဲ (မီးပုံးပျံပွဲတော်) ကို ယခုလို ပြန်လည် ကျင်းပလာရခြင်း၏ အဓိက ရည်ရွယ်ချက်မှာ ရိုးရာ အမွေအနှစ်ကို ပြန်လည်ထိန်းထိမ်းသည့်အနေဖြင့် အစဉ်အလာမပြတ် ပြန်လည်ကျင်းပ သွားရခြင်းဖြစ်ကြောင်း ၎င်းကဆက်ပြောသည်။

ထို့အပြင် ခေတ်ကာလ အခြေအနေ မကောင်းသည့်အချိန်၌ တောင်ကြီးမြို့တွင် တန်ဆောင်တိုင်ရိုးရာပွဲ (မီးပုံးပျံပွဲတော်) ကို ပြန်လည်စည်ကားစွာ ကျင်းပသွားမည်ဖြစ်ကြောင်း နှင့် ပတ်သက်၍ ဒေသခံများက ဝေဖန်နေကြောင်း သိရသည်။

“ပျော်စရာ ကောင်းနေတဲ့ အချိန်အခါမှ မဟုတ်တာ။ အခု ဒုက္ခကြုံတွေ့ ခံနေရတဲ့သူတွေ ကိုယ်ချင်းစာ စေချင်တယ်။ တချို့တွေ မိသားစု ထမင်းဝိုင်း မစုံတော့ နေစရာ အိမ်မရှိကြတော့အချိန် ပျော်ရမယ်ဆိုတာ မဖြစ်သင့်ပါဘူးဗျာ “ ဟု တောင်ကြီးမြို့ ဒေသခံ အသက် ၃၀ နှစ် အမျိုးသားတစ်ဦးက ပြောသည်။

အလားတူ ယမန်နှစ် နိုဝင်ဘာလ ၇ ရက်နေ့တွင် တောင်ကြီး တန်ဆောင်တိုင်ရိုးရာပွဲ (မီးပုံးပျံပွဲတော်) ကို စစ်ကောင်စီမှ ဦးစီးပြီး ပြုလုပ်ခဲ့ကာ ပွဲစည်ကားဖို့အတွက် တစ်ဦးကို ကျပ်ငွေ (၅,၀၀၀) ကျပ်မှ (၂၀,၀၀၀) ကျပ်အထိ ဈေးတင်ပေးပြီး လူငှားခေါ်ခဲ့ကြောင်း သိရသည်။

သျှမ်းပြည်တောင်ပိုင်း ရိုးရာ မီးပုံးပျံပညာရှင်များအသင်းမှ ကြေညာထားချက်အရ ယခုနှစ် တန်ဆောင်တိုင်ပွဲတော်အတွင်း ညမီးကြီး မီးပုံးပျံ၊ စိန်နားပန် မီးပုံးပျံ နှင့် နေ့လွှတ်အရုပ် ခြေ (၂) ချောင်း ခြေ (၄) ချောင်း အရုပ်စုများကို လွှတ်တင်သွားမည်ဖြစ်သလို ပွဲတော်၏ အစီစဉ် အသေးစိတ်ကိုလည်း ပွဲရက်ကာလ အနီးရောက်လျှင် တစ်ဖန်ကြေညာသွားဖြစ်ကြောင်း သိရသည်။

Leave a Comments

- Advertisement -spot_img

Latest article