သျှမ်းပြည် လားရှိုးမြို့လယ်ရှိ အမှတ် (၂) ရဲစခန်း အပါအဝင် စစ်ကောင်စီ တပ်ဖွဲ့ စခန်း (၂) နေရာကို ကိုးကန့်လက်နက်ကိုင် တပ်ဖွဲ့က ဝင်ရောက် ပစ်ခတ် လိုက်ကြောင်း စုံစမ်းသိရသည်။
ယနေ့ ဇွန်လ ၅ ရက် နံနက်ပိုင်း ၃ နာရီဝန်းကျင်တွင် လားရှိုးမြို့လယ်၊ ကန်မိန်းကျောင်းအတွင်းသို့ ကိုးကန့်တပ်ဖွဲ့ (MNDAA ) က ဝင်ရောက်လာပြီး ရပ်ကွက် ၁၂ ရှိ စစ်ကောင်စီ လက်အောက်ခံ အမှတ် (၂) ရဲစခန်းကို ပစ်ခတ် တိုက်ခိုက်လိုက်ကြောင်း ဒေသခံများက သျှမ်းသံတော်ဆင့်ကို ပြောသည်။
“၃ နာရီလောက်မှာ ပစ်ခတ်သံတွေ စတင်ထွက်လာတယ်။ ကိုးကန့်အင်အား ၈၀ ကျော်လောက်က ကန်မိန်း ကျောင်း အနီးမှာ နေရာယူပြီးတော့ အမှတ် (၂) ရဲစခန်းကို ပစ်တာ။ ပစ်ခတ်မှုက နာရီဝက်လောက်တော့ ကြာသွားတယ်၊ ရဲစခန်းဘက်က ထိခိုက်သေဆုံးမှုတွေ ရှိမယ်ထင်တယ်၊ အသေးစိတ်တော့ မသိရသေးဘူး” ဟု လားရှိုးမြို့ ဒေသခံ အသက် (၄၀) ဝန်းကျင် အမျိုးသမီးတစ်ဦးက သျှမ်းသံတော်ဆင့်ကို ပြောသည်။
အဆိုပါ အမှတ် (၂) ရဲစခန်း ပစ်ခတ်မှုတွင် လက်နက်ကြီး လက်နက်ငယ် အသုံးပြုမှု ရှိပြီး ရဲစခန်း တံခါးပေါက် နှင့် အုတ်တံတားများ၌ ကျည်ဆန်များ ထိမှန်သည့် အပေါက်များ ရှိနေကြောင်းလည်း သိရသည်။
အမှတ် (၂) ရဲစခန်းဘက် ပစ်ခတ်သံများသည် နာရီဝက် နီးပါးကြာမြင့်ပြီး ယင်းပစ်ခတ်သံ ထွက်ပေါ်လာပြီး မရှေ့မနှောင်းတွင် လားရှိုးမြို့နယ် မန်အိုင်ကျေးရွာ ဘက်တွင်လည်း ပစ်ခတ်သံများ ထွက်ပေါ်လာကြောင်း သိရသည်။
“မန်အိုင်ဘက်ကို တက်လာတဲ့ ကိုးကန့်တပ်ဖွဲ့က ကုန်းညောင်လမ်းကြောင်းကနေ တက်လာတာ။ ကင်းစောင့်တဲ့ စစ်ကောင်စီ တပ်ဖွဲ့ကို သေနတ်နဲ့ အချက် ၁၀ ချက်လောက်၊ လက်နက်ကြီး ၂ လုံးလောက် ပစ်ပြီးတော့ ပြန်ဆုတ်သွားတယ်။ ဒါပေမဲ့ စစ်ကောင်စီက လူနေအိမ် ရွာတွေထဲ နေရာယူပြီးတော့ တစ်ဖက်သတ် ဆက်ပစ်တာ ၁၀ မိနစ် ကျော်သွားတယ်” ဟု လားရှိုးမြို့နေ အမျိုးသားတစ်ဦးက သျှမ်းသံတော်ဆင့်ကို ပြောသည်။
စစ်ကောင်စီ တပ်ဖွဲ့သည် မန်အိုင်ကျေးရွာ အတွင်း ဝင်ရောက်နေရာယူကာ ကိုးကန့်တပ်ဖွဲ့ MNDAA ကို လိုက်လံ ပစ်ခတ်မှုကြောင့် ကျေးရွာအတွင်းတွင် ကျည်ဆံများ၊ လက်နက် ဗုံးခွံများကိုလည်း မြင်တွေ့ရကြောင်း ဒေသခံ များက ဆက်ပြောသည်။
မန်အိုင်ကျေးရွာဘက်မှ ပစ်ခတ်မှုများ ဖြစ်ပေါ်လာခြင်း နှင့် ပတ်သက်ပြီး မန်အိုင်ဘက်မှ ကိုးကန့်တပ်ဖွဲ့သည် ကန်မိန်းကျောင်းနားရှိ အဖွဲ့ကို ထွက်ပေါက်လွယ်ကူစေရန် စစ်ကူ သဘောမျိုးဖြင့် လာရောက်ပစ်ခတ်ခြင်း ဖြစ်နိုင်ကြောင်းလည်း ၎င်း အမျိုးသားက ဆက်ပြောသည်။
“ကျနော်တို့ အထင်ပြောရတာပေါ့နော်။ ဘာလို့လဲဆိုရင် အမှတ် (၂) ရဲစခန်း နဲ့ မန်အိုင်ရွာက တောင်နဲ့ မြောက်လို ဖြစ်နေတယ်။ ဆိုတော့ ကိုးကန့်တပ်ဖွဲ့က မြို့တွင်း (ကန်မိန်းကျောင်း) မှာ ရှိတဲ့ အဖွဲ့တွေ ပြန်ထွက်ရလွယ်အောင်၊ စစ်ကောင်စီ ပျာများအောင် လုပ်လိုက်တဲ့ သဘောလို့ပဲ မြင်မိတယ်။ ကိုးကန့်လို့ ပြောနိုင်တာလည်း သူတို့ ဘက်တံဆိပ်တို့ကို တွေ့ရတယ်လေ” ဟု အထက်ပါ အမျိုးသားက ဆက်ဆိုသည်။
စစ်ကောင်စီ နှင့် လားရှိုးမြို့တွင်း ထိတွေ့တိုက်ပွဲ ဖြစ်ပွားသည့် ကိုးကန့်တပ်ဖွဲ့ MNDAA သည် ပြီးခဲ့သည့် ဇွန်လ ၁ နှင့် ၂ ရက်အထိ ညီနောင်မဟာမိတ် သုံးဖွဲ့ နှင့်အတူ မိုင်းလားမြို့၌ စစ်ကောင်စီ လက်အောက်ခံ NSPNC နှင့် တွေ့ဆုံဆွေးနွေးမှု ရှိခဲ့သည်။
ထို့အပြင် စစ်ကောင်စီ တပ်ဖွဲ့သည် တစ်နှစ်ကြာ အပစ်ရပ်ထားကြောင်း ထုတ်ပြန်ကြေညာထားသော်လည်း လက်ရှိ အချိန်ထိ တိုင်းရင်းသားလက်နက်ကိုင်တပ်ဖွဲ့များကို ထိုးစစ်ဆင်တိုက်ခိုက်မှု ရှိနေဆဲ ဖြစ်သည်။
Leave a Comments