စစ်ကောင်စီ လက်အောက်ခံ အမျိုးသား စည်းလုံး ညီညွတ်ရေး နှင့် ငြိမ်းချမ်းရေး ဖော်ဆောင်မှု ညှိနှိုင်းရေး ကော်မတီ NSPNC နှင့် ညီနောင်မဟာမိတ် (၃) ဖွဲ့ တို့ တွေ့ဆုံဆွေးနွေးမှုတွင် မတရားအသင်းမှ ပယ်ဖျက်ရေး ကိစ္စများ ပြောဆို ဆွေးနွေးဖြစ်ခဲ့ကြောင်း သိရသည်။

အဆိုပါ တွေ့ဆုံမှုကို ဇွန်လ ၁ ရက်နေ့တွင် စတင်ပြုလုပ်ခြင်းဖြစ်ပြီး သျှမ်းပြည် အထူးဒေသ (၄) မိုင်းလားမြို့၊ အရှေ့တိုင်း ဧည့်ရိပ်မွန် ဟိုတယ်မှာ ကျင်းပပြုလုပ်ခဲ့ကြောင်းလည်း သိရသည်။

NSPNC နှင့် မြောက်ပိုင်းညီနောင် သုံးဖွဲ့၏ တွေ့ဆုံမှုတွင် မတရား အသင်းမှ ပယ်ဖျက်ရေး အပါအဝင် ဖမ်းဆီးထားသူများ ပြန်လည်လွတ်မြောက်ရေး ကိစ္စများကိုလည်း ဆွေးနွေး ဖြစ်ခဲ့ကြောင်း စစ်ကောင်စီ၏ သတင်း စာမျက်နှာ ဖြစ်သည့် တပ်မတော် ကာကွယ်ရေး ဦးစီးချုပ်ရုံးမှ တစ်ဆင့် ထုတ်ပြန်ထားသည်။

ယင်း တွေ့ဆုံမှုကို ဇွန်လ (၁) ရက်နေ့မှ (၃) ရက်နေ့အထိ ပြုလုပ်မည်ဟု လျာထားသော်လည်း ယနေ့ ဇွန်လ (၂) ရက်နေ့ သောကြာတွင် ပြီးဆုံးနိုင်သည့် အကြောင်း ရက္ခိုင့်တပ်တော် AA ပြောခွင့်ရက ဗွီအိုအေ သတင်းဌာနကို ပြောဆိုထားသည်။

ထို့အပြင် ယခု တွေ့ဆုံ ဆွေးနွေးမှုမှ ငြိမ်းချမ်းရေးဆွေးနွေးပွဲ ကိစ္စအတွက် စစ်ကောင်စီ နှင့် ယုံကြည်မှု တည် ဆောက်ရေး အချိန်ယူရန် လိုအပ်နေကြောင်းကို “ကျနော်တို့ ကြားထဲမှာ ဆက်ပြီးတော့မှ အများကြီး ယုံကြည်မှု တည်ဆောက်ရေး ကိစ္စတွေနဲ့ ပတ်သက်ရင်လည်း ဒါ အများကြီး ရှေ့ဆက် ပြီးတော့မှ ဆွေးနွေးရမယ့် အနေအထားတွေ ရှိပါတယ်” ဟု ဗွီအိုအေ သတင်းဌာနကို ပြောဆိုထားသည်။

တွေ့ဆုံပွဲကို NSPNC ဥက္ကဋ္ဌ ဒုတိယ ဗိုလ်ချုပ်ကြီး ရာပြည့်၊ ညှိနှိုင်းရေးကော်မတီ ဒု – အတွင်းရေးမှူး ဗိုလ်ချုပ်ကြီး ဝင်းဗိုလ်ရှိန်၊ ကော်မတီ အဖွဲ့ဝင် ဒု – ဗိုလ်ချုပ်ကြီး ခင်ဇော်ဦး (အငြိမ်းစား)၊ တြိဂံဒေသတိုင်းစစ်ဌာနချုပ် ဒု – တိုင်းမှူး ဗိုလ်မှူးချုပ် ထွန်းမြတ်ရွှေ နှင့် မြန်မာနိုင်ငံ အမှန်တရားနှင့် တရားမျှတသော အမျိုးသားပါတီ (MNTJP/ MNDAA) ၊ ပလောင် ပြည်နယ်လွတ်မြောက်ရေးတပ်ဦး (PSLF/TNLA) နှင့် ရက္ခိုင့် အမျိုးသားအဖွဲ့ချုပ် (ULA/AA) တို့မှ ကိုယ် စားလှယ် များ တက်ရောက်ခဲ့ကြောင်း တပ်မတော်ကာကွယ်ရေး ဦးစီးချုပ်ရုံးမှ ထုတ်ပြန်ချက်အရ သိရသည်။

ဇွန်လ ၁ ရက် တွေ့ဆုံဆွေးနွေးမှုတွင် ပြည်ထောင်စုသမ္မတမြန်မာနိုင်ငံတော်တွင် ပါတီစုံ ဒီမိုကရေစီ နိုင်ငံရေး စနစ် ခိုင်မာစေရေးကိစ္စ၊ တိုင်းရင်းသား ပြည်သူတစ်ရပ်လုံး၏ လိုလားချက်ပန်းတိုင်ဖြစ်သည့် ဒီမိုကရေစီ နှင့် ဖက်ဒရယ် စနစ်တို့ကို အခြေခံသော ပြည်ထောင်စု တည်ဆောက်ရေးကိစ္စ၊ ပြည်ထောင်စု ငြိမ်းချမ်းရေး နှင့် ဖွံ့ဖြိုးတိုးတက်ရေး အတွက် လက်တွဲ ပူးပေါင်း အကောင်အထည် ဖော်နိုင်ရေးကိစ္စရေးများ အပါအဝင် ဆွေးနွေး ခဲ့သည်။

ထိုတွေ့ဆုံမှုသည် တရုတ်ပြည် ၊ ယူနန်ပြည်နယ်၏ နိုင်ငံခြားရေးရာ အထူးသံတမန် မစ္စတာ ကောပေါင်၏ ကြားဝင် ပေးမှုကြောင့် ညီနောင် သုံးဖော် တပ်ဖွဲ့ နှင့် စစ်ကောင်စီ လက်အောက်ခံ အမျိုးသား စည်းလုံး ညီညွှတ်ရေး နှင့် ဆွေးနွေးမှု ညှိနှိုင်းရေးမှူး ကော်မတီ (NSPNC) တို့ ပထမဆုံး အကြိမ် တွေ့ဆုံရခြင်း ဖြစ်သည် ။