သျှမ်း – ကရင်နီ (ကယား) နယ်စပ် မိုးဗြဲမြို့ပေါ် လူနေအိမ်ရပ်ကွက်ကို စစ်ကောင်စီမှ လေကြောင်းဖြင့် ဗုံးကြဲသည့်အပြင် လက်နက်ကြီးဖြင့် ပစ်ခတ်တိုက်ခိုက်မှုကြောင့် ကလေးငယ် ၁ ဦး သေဆုံးပြီး ပြည်သူ ၄ ဦး ထိခိုက်ဒဏ်ရာရရှိခဲ့ကြောင်း သတင်းရရှိသည်။
ယမန်နေ့ (မေလ ၂၇) ရက် နံနက် ၅ နာရီအချိန်မှစပြီး မိုးဗြဲမြို့ပေါ်ရှိ လူနေအိမ်ရပ်ကွက်ကို စစ်ကောင်စီမှ တိုက်လေယာဉ် နှစ်စင်းဖြင့် ၉ ကြိမ်ထက်မနည်း ပစ်ခတ်ခဲ့သည့်အပြင် အဝေးပစ် လက်နက်ကြီးဖြင့် ထပ်ဆင့် ပစ်ခတ်ခဲ့သောကြောင့် အသက် ၃ နှစ်ခွဲ ကလေးငယ်တစ်ဦး သေဆုံးပြီး ပြည်သူ ၄ ဦး ထိခိုက်ဒဏ်ရာ ရရှိခဲ့ကြောင်း မိုးဗြဲဒေသခံတစ်ဦးက အတည်ပြုသည်။
“ မနေ့က သူတို့လာကြဲသွားတဲ့နေရာက အတော်များတယ်။ မိုးဗြဲမြို့ပေါ်မှာ ကြဲတာတွေ၊ မိုးဗြဲအရှေ့ဖက်ခြမ်း တောင်ပေါ်ရွာ၊ တောင်ခြေရဲ့အောက်က ရွာတွေမှာကော လာကြဲတယ်။ သူတို့လာကြဲတာ အခေါက်ရေ တော်တော်များတယ်။ ဒဏ်ရာပြင်းထန်တဲ့သူက ၄ ယောက်ရှိတယ်။ ဒဏ်ရာအနည်းငယ်ရတဲ့ သူတွေတော့ ၇ ယောက်လောက်ရှိတယ်။ ၃ နှစ်ခွဲ ကလေးငယ်တစ်ယောက်လည်း ဆုံးတယ် “ ဟု ၎င်းက ပြောသည်။
အလားတူ ယနေ့ (မေလ ၂၈) ရက် နံနက် ၄ နာရီခွဲအချိန်၌ မိုးဗြဲအနောက်ဖက်ခြမ်းရှိ စစ်ဘေးရှောင်များနေသည့် စစ်ရှောင်စခန်းတစ်နေရာကို စစ်ကောင်စီမှ တိုက်လေယာဉ်ဖြင့် ၂ ကြိမ်တိုင် လာရောက် ဗုံးကြဲတိုက်ခိုက်ရာ ပြည်သူ (၄) ဦး ထိခိုက်ဒဏ်ရာရပြီး နေအိမ် ၃ လုံး ပျက်စီးခဲ့ကြောင်း MBPDF ယနေ့ မေ (၂၈) ရက်တွင် ထုတ်ပြန်ထားသည်။
စစ်ကောင်စီသည် ၎င်းတို့ကို ခုခံတော်လှန်တိုက်ခိုက်နေသည့် ပြည်သူ့ကာကွယ်ရေးတပ်ဖွဲ့ PDF ပူးပေါင်းတပ်ဖွဲ့ကို အပြင်းထန် နှိမ်နင်းလာတင်မက ပြည်သူတွေကိုပါ ကြောက်လှန့်တုန်လှုပ် ခြောက်ခြားသွားစေရန် အရပ်သားနေအိမ်၊ စစ်ဘေးရှောင်စခန်းများကို တိုက်လေယာဉ်ဖြင့် ဗုံးကြဲခြိမ်းခြောက်နေကြောင်း မိုးဗြဲဒေသခံ က ယခုလို သုံးသပ်ထားသည်။
“ သူတို့က ရည်ရွက်ချက်ရှိရှိနဲ့ ဗုံးလာကြဲနေတာ။ လာတိုက်နေတာ။ ကျနော်တို့က နည်းနည်း လှုပ်ရှားမှုရှိပြီဆိုတာနဲ့ လူထုတွေကို နည်းနည်းကြောက်လှန့်သွားအောင် ဆိုပြီးတော့ လူထုတွေကို ရည်ရွယ်ပြီးတော့ ဗုံးနဲ့လာကြဲတယ်လို့ပဲ သုံးသပ်မိတယ် “ ဟု ၎င်းက ပြောသည်။
အဆိုပါ စစ်ကောင်စီမှ အရပ်သားနေအိမ်၊ စစ်ဘေးရှောင်တွေပါ ပစ်မှတ်ထားပြီး ဗုံးကြဲတိုက်ခိုက်မှု ပြုလုပ်သောကြောင့် လက်ရှိ ပြည်သူများသည် လုံခြုံရေးအတွက် စိုးရိမ်မှု မြင့်တက်နေကြောင်း သိရသည်။
ထို့အပြင် စစ်ကောင်စီ အသုံးပြုသည့် တိုက်လေယာဉ်များကို မြေပြင်မှ ပစ်ခတ်နိုင်သော လေယာဉ် ပစ်လက်နက်ကို နိုင်ငံတကာမှ ကူညီထောက်ပံ့ပေးစေလိုကြောင်း မိုးဗြဲမြို့ဒေသခံ အသက် ၅၀ နှစ်အရွယ် အမျိုးသားတစ်ဦးက ထပ်လောင်းပြောသည်။
“ အခု ကျနော်တို့ ခံစားနေရတဲ့ ပြဿနာပေါင်းစုံကို ကမ္ဘာကို သိစေချင်တယ်။ နိုင်ငံတကာကိုလည်း တောင်းဆိုချင်တယ်။ လက်ရှိ စစ်ကောင်စီ လေယာဉ်ပျံသန်းတဲ့ နယ်မြေတွေမှာ လေယာဉ်ကို ပစ်နိုင်တဲ့ လက်နက်ပို့ပေးစေချင်တယ်။ မနှစ်ကလိုမျိုးဆိုရင် အကြိမ်ပေါင်းမနည်းဘူး၊ အနီးကပ်ကနေ ပျံသန်းလာရင် အနီးကပ်ကို ဝင်တွယ်တာ။ အခုမှာ ကျနော်တို့ဆီမှာ လေယာဉ်ကိုပစ်နိုင်တဲ့ လက်နက်မရှိဘူး “ ဟု ၎င်းက ပြောသည်။
စစ်ကောင်စီ၏ လေကြောင်းတိုက်ခိုက်မှုကို PKPF ၏ စာရင်းမှတ်တမ်းအရ ၂၀၂၁ ခုနှစ်တွင် ၂ ကြိမ်၊ ၂၀၂၂ ခုနှစ်တွင် ၁၈၂ ကြိမ် နှင့် ယခု ၂၀၂၃ ခုနှစ် ပထမ (၄) လအတွင်းမှာ လေကြောင်းတိုက်ခိုက်မှု ၁၇၉ ကြိမ် မြင့်တက်လာကြောင်း သိရသည်။
Leave a Comments