စစ်ကောင်စီ၏ လေကြောင်းတိုက်ခိုက်မှု ခံစားနေရသည့် သျှမ်း – ကယားနယ်စပ် ဖယ်ခုံမြို့နယ် နှင့် ပင်လောင်းမြို့နယ်ရှိ စစ်ဘေးရှောင်များ အရေးပေါ် အကူညီလိုအပ်နေကြောင်း စစ်ဘေးရှောင်များထံမှ သိရသည်။

ပြီးခဲ့သည့် ဖေဖော်ဝါရီလပိုင်း မှစ၍ သျှမ်း – ကယားနယ်စပ်ဒေသရှိ ကျေးရွာများကို စစ်ကောင်စီမှ ပစ်မှတ်ထားပြီး လေကြောင်းဖြင့် ပိုမို တိုက်ခိုက်လာမှုကြောင့် ဖယ်ခုံမြို့နယ် နှင့် ပင်လောင်းမြို့နယ်ရှိ ကျေးရွာ ၁၁ ရွာခန့်မှ လူဦးရေ ၁၀၀၀ ကျော်သည် တောတောင်အတွင်းသို့ ထွက်ပြေးတိမ်းရှောင်နေခဲ့ရသည်။

လက်ရှိအချိန်ထိ ဖယ်ခုံ – ပင်လောင်းနယ်စပ်ဒေသတွင် စစ်ကောင်စီ နှင့် PDF ပူးပေါင်းတပ်ဖွဲ့တို့ တိုက်ပွဲပြင်းထန်နေဆဲ ဖြစ်သလို စစ်ကောင်စီမှ လေကြောင်းဖြင့် နေ့စဉ်နီးပါး ပျံဝဲပြီး ဗုံးကြဲနေသောကြောင့် စစ်ဘေးရှောင်များသည် ယနေ့ထက်ထိ နေရပ်မပြန်နိုင်သေးဘဲ တောတောင်အတွင်း ထွက်ပြေးတိမ်းရှောင်နေဆဲ ဖြစ်သည်။

“ အခု သူတို့ လေကြောင်း ပိုတိုက်ခိုက်လာတော့ လုံခြုံရေးအတွက် အရမ်းစိုးရိမ်ရတယ်။ တချို့နေအိမ်ထဲမှာ ဗုံးကြဲခံရတော့ တောတောင်ထဲကို ထွက်ပြေးကြရတယ်။ တချို့က ကလေးငယ်တွေနဲ့ အဆင်မပြေဘူး။ တောထဲမှာဆို မြွေ၊ ကင်းမြီးကောက် တို့ကို ကြောက်ရတယ်လေ။ အခု သူတို့ လေယာဉ်ဗုံးကြဲလာတာကလည်း မနက် ၃ နာရီ၊ ၄ နာရီ အဲ့လိုမျိုး လာကြဲတော့ ပိုပြီးခက်ခဲတယ် “ဟု ဖယ်ခုံ – ပင်လောင်းနယ်စပ်ရှိ စစ်ဘေးရှောင် အမျိုးသမီးတစ်ဦးက ပြောသည်။

အဆိုပါ တိုက်ပွဲပြင်းထန်သည့် နယ်မြေဒေသ ဖြစ်သောကြောင့် တောတောင်အတွင်း ထွက်ပြေးတိမ်းရှောင် နေရသည့် စစ်ရှောင်များသည် အလှူရှင်ထံမှ ထောက်ပံ့မှုများလည်း မရရှိကြောင်း သိရသည်။

တိုက်ပွဲပြင်းထန်စွာ ဖြစ်ပွားနေသည့် သျှမ်း – ကယားနယ်စပ်ဒေသတွင် စားနပ်ရိက္ခာ နှင့် ဆေးဝါး သယ်ယူခွင့်အတွက်ကလည်း စစ်ကောင်စီ စစ်ဆေးရေးဂိတ်၌ စစ်ဆေးမှု တင်းကြပ်လာခြင်း နှင့် အချို့နေရာ ဒေသတွင် ဖုန်းလိုင်းပြတ်တောက်ခံထားရခြင်းကြောင့် စစ်ဘေးရှောင်များသည် ဖြတ်လေးဖြတ် ဖြတ်ခံထားရသလို ခံစားနေရသည်။

“ အခု ကျမတို့ နေတဲ့နေရာမှာတော့ ဖြတ်လေးဖြတ် ဖြတ်ခံထားရသလို ခံစားနေရတယ်။ လမ်းကြောင်းတွေ အကုန်လုံး ပိတ်ထားတယ်။ အဲ့ကြောင့် အလှူရှင်တွေလည်း သိပ်မရှိဘူး။ အခု ကျမတို့ ကျေးရွာမှာ ဟင်းသီး၊ ဟင်းရွက်တွေက ပေါတယ်။ ဒါပေမယ့် ပြန်လို့ မရတဲ့ အခြေအနေတွေ ဖြစ်နေတယ်။ ဟင်းသီးဟင်းရွက်ရှိပေမယ့် သွားခူးလို့ မရတဲ့အနေခြေကြောင့် အခုကျွန်မတို့ စစ်ရှောင်တွေ ကုလားပဲနဲ့ နပန်းလုံး နေရတယ် “ ဟု ၎င်း စစ်ရှောင်အမျိုးသမီးတစ်ဦးက ထပ်လောင်းပြောသည်။

ထို့အပြင် ပြီးခဲ့သည့် ဧပြီလ ၂၅ ရက်တွင် ဖယ်ခုံမြို့နယ်ရှိ စစ်ဘေးရှောင်များ အားကိုးအသုံးပြုနေသည့် ဆောင်းဖွေးဆေးရုံကို စစ်ကောင်စီ တိုက်လေယာဉ်ဖြင့် ဗုံးကြဲတိုက်ခိုက်ခဲ့ပြီးနောက် ဆေးဝါးများသည် လိုသလောက် ကုသမှုမရှိကြောင်း ဆောင်းဖွေးဆေးရုံမှ တာဝန်ခံ ဆရာမတစ်ဦးက ပြောသည်။

“လူတွေက တစ်ယောက်တစ်နေရာ ရောက်ကုန်တယ်။ တချို့ သွားဖို့ နေရာမရှိတော့ အဲ့နေရာမှာဘဲ ပြန်နေကြတယ်။ ဆေးဝါးတွေကလည်း အခက်ခဲ ရှိနေတယ်။ လာလှူပေးမယ့် အလှူရှင်တွေလည်း မရှိဘူး။ ဆေးရုံ၊ ဆေးခန်းလည်း ပျက်သွားတော့ အဲ့မှာ မနေရဲကြတော့ဘူး။ ပိုက်ဆံကလည်း မရှိတော့ ဒီအတိုင်း တတ်နိုင်သလောက်ဘဲ ကုပေးနေရတယ် “ ဟု ၎င်း တာဝန်ခံတစ်ဦးက ပြောသည်။

စစ်တပ် အာဏာသိမ်းပြီးနောက်ပိုင်း သျှမ်း – ကယားနယ်စပ်ဒေသ တလျောက်ရှိ ပင်လောင်း၊ ဖယ်ခုံ နှင့် မိုးဗြဲ မြို့နယ်တွင် လက်နက်ကိုင် ခုခံမှုကို စစ်ကောင်စီတပ်ဖွဲ့မှ အပြင်းအထန် နှိမ်နင်းလာမှုကြောင့် ပြီးခဲ့သည့် ၂၆ လအတွင်း အရပ်သား ၄၅၂ ဦး သေဆုံးခဲ့ကြောင်း တိုးတက်သော ကရင်နီပြည်သူ့အင်အားစု PKPF က သတင်းထုတ်ပြန်ထားသည်။

အရပ်သားသေဆုံးမှု ဖြစ်စဉ်တွင် စစ်ကောင်စီမှ လက်နက်ကြီး နှင့် လေကြောင်းဖြင့်ပါ တိုက်ခိုက်မှုကြောင့် သေဆုံးရခြင်းဖြစ်ကြောင်း သိရသည်။

စစ်ကောင်စီ၏ လေကြောင်းတိုက်ခိုက်မှုကို PKPF ၏ စာရင်းမှတ်တမ်းအရ ၂၀၂၁ ခုနှစ်တွင် ၂ ကြိမ်၊ ၂၀၂၂ ခုနှစ်တွင် ၁၈၂ ကြိမ် နှင့် ယခု ၂၀၂၃ ခုနှစ် ပထမ (၄) လအတွင်းမှာ လေကြောင်းတိုက်ခိုက်မှု ၁၇၉ ကြိမ် မြင့်တက်လာကြောင်း သိရသည်။