ကရင်နီပြည် (ကယား) ဒီမော့ဆို အနောက်ဖက်ခြမ်းရှိ စစ်ဘေးရှောင်စခန်း နှင့် ဒေသခံ နေအိမ်ကို စစ်ကောင်စီတပ်ဖွဲ့မှ တိုက်လေယာဉ်ဖြင့် စဉ်ဆက်မပြတ် ဗုံးကြဲတိုက်ခိုက်နေကြောင်း စုံစမ်း သိရှိရသည်။
ယနေ့ (ဧပြီလ ၂၉ ရက်) နံနက်ပိုင်း ၉ နာရီမှ စပြီး ဒီမော့ဆို အနောက်ဘက်ခြမ်းရှိ စစ်ရှောင်စခန်း အိမ် အပါအဝင် ဒေသခံနေအိမ်ရှိ ၁၁ မိုင်ကုန်းကို စစ်ကောင်စီတပ်ဖွဲ့မှ တိုက်လေယာဉ်ဖြင့် စဉ်ဆက်မပြတ် ဗုံးကြဲတိုက်ခိုက်နေကြောင်း ဒီမော့ဆို အနောက်ဖက်ခြမ်းရှိ ဒေသခံတစ်ဦးက သျှမ်းသံတော်ဆင့်ကို ပြောသည်။
“ ဟုတ်တယ်။ ဒီနေ့ မနက် ၉ နာရီလောက်ကစပြီး လာကြဲသွားတာ။ ၁၁ မိုင်ကုန်းတစ်နေရာကို လက်နက်ကြီးနဲ့ကော လေယာဉ်နဲ့ကော လာကြဲသွားတာဗျ။ အဲ့နေရာမှာ ဒေသခံတွေ အများစုရှိတယ်။ စစ်ရှောင်စခန်းတွေလည်း ရှိတယ် “ ဟု ၎င်းက ပြောသည်။
အဆိုပါ စစ်ကောင်စီမှ တိုက်လေယာဉ်ဖြင့် ဗုံးကြဲတိုက်ခိုက်မှုကြောင့် ထိခိုက်ဒဏ်ရာ ရသူများ ရှိသော်လည်း အသေးစိတ်ကို လက်ရှိအချိန်ထိ မသိရှိရသေးပေ။
ထို့အပြင် စစ်ကောင်စီသည် ဒီမော့ဆို အနောက်ဖက်ခြမ်းရှိ ၁၁ မိုင်ကုန်းကို ယခုတစ်ကြိမ် အပါအဝင် တိုက်လေယာဉ်ဖြင့် ဗုံးကြဲတိုက်ခိုက်ရာမှာ ၅ ကြိမ်မြောက် ရှိနေပြီဖြစ်ကြောင်း ဒေသခံ အမျိုးသမီးတစ်ဦးက ထပ်လောင်းပြောသည်။
“ ၁၁ မိုင်ကုန်းကို လေယာဉ်နဲ့ ဗုံးကြဲတာ ၄ ကြိမ်ရှိပါပြီ။ ပြည်သူတွေလည်း ထိခိုက်မှုများနေပြီဗျ။ စစ်ရှောင်တွေ ထွက်ပြေးစရာ မြေမရှိတော့ဘူး။ မကြာခင် မိုးတွင်းရောက်တော့မှာ တဲထိုးဖို့ မိုးကာတွေ လိုမယ်။ အခုလည်း ရေပြဿနာ ဖြစ်နေလို့ ၅ ရက်မှ တစ်ခါ ရေချိုးကြရတာ “ ဟု ၎င်းအမျိုးသမီးတစ်ဦးက ပြောသည်။
စစ်တပ်က အာဏာသိမ်းပြီးနောက်ပိုင်း သျှမ်း – ကယားနယ်စပ် ဒေသတလျောက်ရှိ ဒီမော့ဆို ၊ ဖယ်ခုံ နှင့် မိုးဗြဲ စသည့် ဒေသတွင် စစ်ကောင်စီမှ တိုက်လေယာဉ်ကို အသုံးပြုပြီး နေ့စဉ်ဆက်တိုက် ဗုံးကြဲတိုက်ခိုက်နေသည့် အပေါ်တွင် ပြည်သူများက စိုးရိမ်ထိတ်လန့်မှု နှင့် ရှင်သန်နေရကြောင်း ၎င်း အမျိုးသမီးတစ်ဦးက ထပ်လောင်းပြောသည်။
“ ဒီမနက် ၉ နာရီခွဲကစပြီး လာကြဲသွားတာ အဲ့တစ်နေရာထဲကို လာကြဲသွားတာ။ ၅ ခေါက်လောက် လာကြဲသွားတာ။ လက်နက်ကြီးတွေနဲ့ကော အရမ်းထုတယ်။ ဒါတွေ မကျေနပ်သေးဘူး ခဏတစ်အောင့်လောက် ထပ်လာကြဲပြန်ရော။ ကျည်ဆံထိပြီး သေတာထက်ဆိုင်ရင် ဒီတုန်လှုပ်မှုနဲ့ ခံစားနေရတဲ့ ဝေဒနာနဲ့ အသက်ရှူကြပ်ပြီး ဘယ်လောက်ထိ ခံစားနေရလဲ ကျွန်မကိုယ်တိုင်လည်း သိတယ်။ ဒီခံစားချက်တွေကို အထက်လူကြီးတွေက လက်ပိုက်ပြီးတော့ ကြည့်နေတော့မလား။ ပြည်သူတွေက လက်နက်မရှိဘဲ တိုက်နေရတယ် “ ဟု ၎င်း အမျိုးသမီးတစ်ဦးက ပြောသည်။
ထို့အပြင် (ဧပြီလ ၂၅ ရက်) တွင်လည်း ဖယ်ခုံမြို့နယ် ဆောင်းဖွေးပြည်သူ့ဆေးရုံကို စစ်ကောင်စီမှ တိုက်လေယာဉ်ဖြင့် (၅) ကြိမ်ထက် မနည်း တိုက်ခိုက်ခဲ့သောကြောင့် အသက် (၁၅) နှစ် ကလေးငယ် အပါအဝင် ပြည်သူ (၅) ဦးထိခိုက်ဒဏ်ရာ ရရှိခဲ့ကြောင်း MOH NUG ကထုတ်ပြန်ထားသည်။
