သျှမ်းပြည် မူဆယ်ခရိုင် ကွတ်ခိုင်မြို့နယ် နမ့်ဖက်ကာ-နမ့်ခမ်း ပတ်လမ်းရှိ (၁၂) မိုင်ရွာတွင် မီးလောင်ပျက်စီးဆုံးရှုံးသွားခဲ့သည့် နေအိမ်များပြန်လည်ထူထောင်ရေးအတွက် အကူညီလိုအပ်နေကြောင်း စုံစမ်းသိရှိရသည်။
ပြီးခဲ့သည့် (ဧပြီ ၇ ရက်) ညနေ ၁၀ နာရီကျော်အချိန်မှ စပြီး မီးလောင်ကျွမ်းမှုဖြစ်ပွားခဲ့ရာ စုစုပေါင်း အိမ်ခြေ (၄၇) လုံး မီးလောင်ပျက်စီးဆုံးရှုံးခဲ့ကြောင်း သိရသည်။
လက်ရှိ မီးလောင်ပျက်စီးဆုံးရှုံးသွားသည့် စုစုပေါင်း အိမ်ခြေ (၄၇) လုံးထဲမှ လက်ရှိ နေထိုင်သည့် အိမ်ခြေ (၂၁) စုအတွက် နေအိမ်အသစ်ပြန်လည်ထူထောင်ရေး တည်ဆောက်ဖို့ရန် အကူညီလိုအပ်နေကြောင်း ၎င်းကိုသွားရောက်ကူညီနေသည့် အမျိုးသားတစ်ဦးက ပြောသည်။
“ အခုက စာသင်ကျောင်းမှာ စုပြီးနေရတာပေါ့ဗျာ။ နေစရာအိမ်တွေလည်း မရှိတော့ဘူး။ စားဖို့သောက်ဖို့ကတော့ ခက်ခဲမှုတွေ သိပ်မရှိပါဘူး။ စားစရာအတွက် ကူညီပေးတဲ့သူက များပါတယ်။ အခုက ပြန်လည် ထူထောင်ရေး ဆိုပေမယ့်လည်း ဘယ်သူဘဲဖြစ်ဖြစ် အလှူရှင်တွေပေါ်ပေါက်လာနိုင်အောင် သွပ်တစ်ချပ်တနိုင်နိုင်၊ စေတနာရှိ သလောက်ကူညီပေးပါ “ ဟု ၎င်းက အမျိုးသားတစ်ဦးက ပြောသည်။
အဆိုပါ ဒေသခံနေအိမ်မီးလောင်မှု ဖြစ်ပွားရခြင်းမှာ တောတောင်အတွင်းရှိ သစ်ခြောက်၊ သစ်ကိုင်း၊ ထင်း မီးလောင်မှုမှ တစ်ဆင့်မီးလောင်မှုဖြစ်ပွားခဲ့ပြီး အဆိုပါ မီးစွဲလောင်မှုကြီးကြောင့် စုစုပေါင်း အိမ်ခြေ (၄၇) လုံး မီးလောင် ပျက်စီးဆုံးရှုံးခဲ့ရကြောင်း သိရသည်။
ထို့အပြင် မီးလောင်နေစဉ်အတွင်း နမ့်ဖက်ကာ-နမ့်ခမ်းမှ မီးသတ်ကားကို ဖုန်းဆက်အကူညီတောင်းခံခဲ့ပေမယ့် မီးစွဲလောင်မှုကြီး ဖြစ်ပွားခဲ့သောကြောင့် အချိန်မှီ မီးကို မငြိမ်းသတ်နိုင်ခဲ့ကြောင်း၊ အနီးနားရှိစွဲလောင်နေသည့် မီးကိုသာ ထပ်မပွားအောင် ရေဖြန်းပေးနိုင်ခဲ့ကြောင်း PSLF/ TNLA မှ ယမန်နေ့ (ဧပြီ ၉ ရက်)နေ့တွင် ထုတ်ပြန်ထားသည်။
Leave a Comments