သျှမ်းပြည် တောင်ကြီးခရိုင် ရွာငံမြို့နယ်အတွင်း နှမ်းစိုက်ပျိုးသူများအတွက် ယခုနှစ်အတွင်း ဈေးနှုန်းမရှိကြောင်း စုံစမ်းသိရှိရသည်။

ယခင်နှစ် နှမ်း တစ်ပိဿလျှင် မြန်မာကျပ်ငွေ (၁၂,၀၀၀) ကျပ် ထိရရှိပြီး စစ်တပ်အာဏာသိမ်းပြီးနောက်ပိုင်း လက်ရှိအချိန်ထိ တစ်ပိဿလျှင် မြန်မာကျပ်ငွေ (၄,၅၀၀) ကျပ် ထိသာ ရရှိတော့ကြောင်း သိရသည်။

“ အရင်နှစ်တွေက တစ်ပိဿကို (၁၂,၀၀၀) ထိရတယ်။ အခုနှစ်တော့ ဈေးက မရှိတော့ဘူး။ တစ်ပိဿကို ၄,၅၀၀ – ၅,၀၀၀ လောက်ပဲရတော့တယ်။ ဈေးက အရမ်းကို ကျသွားတယ်။ အခုချိန်က နှမ်းလုံးတွေ ရောင်းတဲ့ချိန်ပဲ ဖြစ်တယ်လေ” ဟု ရွာငံမြို့နယ် နှမ်းလုံးစိုက်ပျိုးသူက ပြောသည်။

အဆိုပါ နှမ်းကို ကိုးရီးယားနိုင်ငံ နှင့် ဂျပန်နိုင်ငံ တို့ကို အများဆုံးတင်သွင်းပြီး ယခုနှစ်တွင် ဝယ်ယူသူတွေ မရှိသည့်အတွက်ကြောင့် တောင်သူများ စားဝတ်နေရေးအတွက် ခက်ခဲမှုရှိကြောင်း သိရသည်။

ထို့အပြင် နှမ်းကို ဇူလိုင်လမှ စတင်စိုက်ပျိုးပြီး ဒီဇင်ဘာလတွင် ရိတ်သိမ်းပြီး ယခုလတွင် ရောင်းချချိန် ဖြစ်ကြောင်း သိရသည်။

“ ဝယ်မဲ့သူတွေတောင် ရှားတယ်။ ပြည်ပက ဝယ်တဲ့သူတွေနည်းတယ်။ အဝယ်နည်းတော့ တောင်သူတွေရဲ့ လက်ထဲမှာ အများကျန်တယ်။ အခုချိန်က နှမ်းလုံးတွေကို ရောင်းတဲ့ချိန်ဖြစ်တယ်။ ဒီနှစ်မရောင်းရရင်တော့ နောက်နှစ် စိုက်ပျိုးရာသီအတွက် အရင်းနည်းသွားမယ်။ တောင်သူတွေတော့ ရသလောက်ရောင်းကြတယ်။ အရှုံးတော့ များတာပေါ့” ဟု အထက်ပါ တောင်သူက ပြောသည်။

နှမ်းကို သျှမ်းပြည်တွင် ခေါ်ပုတ်ထဲတွင် ရောစားလေ့ရှိပြီး ၊ နိုင်ငံခြားများတွင် စားသုံးဆီအဖြစ် ထုတ်လုပ်ကြောင်း သိရသည်။