သျှမ်းပြည် တောင်ကြီးခရိုင် ပင်းတယမြို့နယ်ရှိ ပျူစောထီးများကို စစ်သင်တန်းပေးနေသည့် စစ်ကောင်စီ တပ်ဖွဲ့၏ စစ်သင်တန်းတွင် သင်တန်းသား ပျူစောထီးများ ထွက်ပြေးနေကြောင်း စုံစမ်းသိရသည်။
ပင်းတယမြို့နယ် အောယောရပ်ကွက်တွင် စစ်သင်တန်းပေးနေခြင်းဖြစ်ပြီး သင်တန်းလာတက်သည့် ပျူစောထီးများက ထွက်ပြေးကြသဖြင့် လက်ရှိတွင် အဆိုပါ စစ်သင်တန်းကို ပိတ်ထားရကြောင်း ဒေသခံများက သျှမ်းသံတော်ဆင့် ကိုပြောသည်။
“သင်တန်းမတက်ခင်မှာတော့ သင်တန်းတက်ပြီးတာနဲ့ သေနတ်လည်း ပေးကိုင်မယ်လို့ ပြောပြီး စည်းရုံးထားတာပေါ့၊ ဒါပေမဲ့ သင်တန်းလည်း ပြီးရော တချို့က ရှေ့တန်းကို သွားရမယ်ဆိုတာကျတော့ ကြောက်ကြတယ်လေ။ ဒါကြောင့် တချို့က ထွက်ပြေးကြတာ” ဟု ဖြစ်စဥ်ကို သိရှိရသည့် ပင်းတယမြို့မှ အသက် ၃၀ နီးပါးရှိ အမျိုးသား တစ်ဦးက သျှမ်းသံတော်ဆင့်ကို ပြောသည်။
စစ်ကောင်စီ၏ ပျူစောထီး စစ်သင်တန်းကို တက်ရောက်သူများသည် ၎င်းတို့ လက်အောက်ခံ အုပ်ချုပ်ရေးမှူးများ နှင့် ပျူစောထီးအဖွဲ့ဝင်များ ဖြစ်ကြောင်း သိရသည်။
ပင်းတယမြို့မှ စစ်ကောင်စီတပ်ဖွဲ့တို့၏ ပျူစောထီး စစ်သင်တန်းသည် ပြီးခဲ့သည့် ဇန်နဝါရီလ ၂၂ ရက် မှ စတင်လာခဲ့ခြင်းဖြစ်ပြီး ဖေဖော်ဝါရီလ နှောင်းပိုင်းတွင် သင်တန်းပြန်လည် ပိတ်ခဲ့ခြင်း ဖြစ်သည်။
ထို့အပြင် ပျူစောထီး စစ်သင်တန်း ဖွင့်လှစ်စဥ်ကာလအတွင်းတွင် စစ်သားများ၏ ဝင်ထွက်သွားလာမှုကြောင့် ဒေသခံ ပြည်သူများအတွက် အနှောင့်အယှက်ဖြစ်သလို စိုးရိမ်စိတ်လည်း ဖြစ်စေ ကြောင်းလည်း အောယော ရပ်ကွက်နေ အမျိုးသမီး တစ်ဉီးက ပြောသည်။
“နံနက်အစောကြီး ၅ နာရီလောက်ကစပြီး ဘယ်ညာအော်သံတွေ ကြားရတယ်၊ ညဘက်ဆိုလည်း သေနတ်တွေ ဖောက်ပစ်တာ ရှိတယ်၊ တက်တဲ့သူလည်း အယောက် ၂၀ လောက်ရှိနေတယ်၊ အခုတော့ ပိတ်သွားပြီ၊ နားအေးတာပေါ့” ဟု အထက်ပါ အမျိုးသမီးက သျှမ်းသံတော်ဆင့်ကို ပြောသည်။
အာဏာသိမ်း စစ်ကောင်စီမှ ပျူစောထီးများ မွေးထုတ်ပြီး လက်နက်တပ်ဆင်ပေးခြင်းသည် ဒေသခံ ပြည်သူ့ ကာကွယ်ရေး တပ်ဖွဲ့နှင့် ဒေသခံ အချင်းချင်း ရန်တိုက်ပြီး သပ်လျိုသွေးခွဲသလို ဖြစ်နေသည့်အတွက် စိုးရိမ်ရကြောင်းလည်း ဒေသခံများက ပြောဆိုနေကြသည်။
ပြီးခဲ့သည့် ၂၀၂၂ ခုနှစ် စက်တင်ဘာလ အတွင်းမှာလည်း ရွာငံမြို့နယ်အတွင်း စစ်သင်တန်းပေးမှု ရှိခဲ့ကြောင်းလည်း သိရသည်။
လက်ရှိတွင်လည်း သျှမ်းပြည် တောင်ကြီး ခရိုင်ရှိ ပင်လောင်းမြို့နယ်ထဲက လုံးပျဉ်ရွာ၊ တောင်မဲသင်းရွာ၊ မြောက်စလုံး၊ တောင်စလုံး၊ နမ့်နိမ့်ရွာ နှင့် ပင်လုံရွာတို့၏ အနီးနားတဝိုက်၌ စစ်ကောင်စီ နှင့် ဒေသခံ PDF တို့က ထိတွေ့ တိုက်ပွဲဆက်လက် ဖြစ်ပွားနေပြီး အဆိုပါ တိုက်ပွဲ၌ ပျူစောထီးများ ပါဝင်နေကြောင်းလည်း သိရသည်။
Leave a Comments