သျှမ်းပြည် အခြေစိုက် တအာင်း (ပလောင်) ပြည်နယ် လွတ်မြောက်ရေး တပ်ဦး PSLF/TNLA သည် သြဂုတ်လ အထိ CDM မပြုလုပ်သူများကို အရေးယူ ဆောင်ရွက်သွားမည်ဟု ထုတ်ပြန် ကြေညာထားသည်။

PSLF/TNLA သတင်း နှင့် ပြန်ကြားရေးမှတစ်ဆင့် ဖေဖော်ဝါရီလမှ စတင်ကာ သြဂုတ်လ အထိ CDM မပြုလုပ် ရသေးသည့် သူများ (Non – CDM) များကို CDM ပြုလုပ်ကြရန် နှင့် CDM မပြုလုပ်သူများသည် အရေးယူ ဆောင်ရွက်ခြင်း ခံရမည် ဟု ထုတ်ပြန်ကြေညာထားသည်။

ပြီးခဲ့သည့် ၂၀၂၂ ခုနှစ်အတွင်းမှာလည်း TNLA တပ်ဖွဲ့သည် ကျောက်မဲမြို့နယ်မှ မိုင်းတင်းကျေးရွာအုပ်စု အတွင်းက စာသင်ကျောင်းများကို စစ်ကောင်စီမှ ခန့်အပ်ထားသည့် Non – CDM စာသင်ခွင့် မရှိဟု ဆိုကာ ဆရာ/ဆရာမများကို တားမြစ်ခဲ့သည့်အတွက် စာသင်ကျောင်းများလည်း ပိတ်ထားခဲ့ရသည်။

ယခု တစ်ကြိမ် TNLA တပ်ဖွဲ့မှ Non – CDM များကို ထပ်မံ ဖိအားပေး ခြိမ်းခြောက်လာခြင်း နှင့် ပတ်သက်ပြီး ပညာရေးပိုင်း နှင့် ကျေးလက်ဒေသ ကျန်းမာရေး ထိခိုက် နစ်နာမှုများ ရှိလာမည်ကို စိုးရိမ်ရသည့် အကြောင်းလည်း ကျောက်မဲမြို့နယ်ခံ အသက် ၃၀ ဝန်းကျင် အမျိုးသမီးတစ်ဦးက သျှမ်းသံတော်ဆင့်ကို ပြောသည်။

“CDM တွေသာ စာသင်ခွင့်ရှိမယ်၊ အလုပ်လုပ်နိုင်မယ် ဆိုရင် အဲ့ CDM သမားတွေအတွက် စစ်ကောင်စီရဲ့ ရန်ကို TNLA က ဘယ်လောက်ထိ ကာကွယ်ပေးနိုင်မလဲ၊ ပြီးတော့ Non – CDM တွေသာ လုပ်သွားကြရင် သူတို့အတွက် အသက်မွေးဝမ်းကျောင်း ဘယ်လိုလုပ်ပေးမှာလဲ ဆိုတာ မေးစရာရှိလာတယ်၊ ဒါကြောင့် နစ်နာတာက ပြည်သူတွေပဲ ဖြစ်မှာ၊ ဆေးရုံ ဆေးခန်းက ဝန်ထမ်း မရှိ၊ စာသင်ကျောင်းက ဆရာ/မတွေ မရှိ အဲ့လိုတွေ ဖြစ်မှာကို စိုးရိမ်တယ်” ဟု အထက်ပါ အမျိုးသမီးက ဆိုသည်။

စစ်အာဏာသိမ်းမှုကို အကြမ်းမဖက် အနုနည်းလမ်းဖြင့် အာဏာဖီဆန် ဆန့်ကျင်သူများ (CDM) သည် အများအားဖြင့် ပညာရေး ဝန်ထမ်း၊ ကျန်းမာရေး ဝန်ထမ်းတို့မှ ဖြစ်ကြပြီး အချို့သော CDM များသည် အလုပ်လက်မဲ့ဖြစ်ကာ စားဝတ်နေရေးခက်ခဲနေကြောင်း သိရသည်။

ထို့ကြောင့် CDM ပြုလုပ်ကြရန် ဖိအားပေး ခြိမ်းခြောက်လာသည့် PSLF/TNLA မှ CDM သမားများကို အလုပ်အကိုင် အခွင့်အလမ်းများ နှင့် လုံခြုံရေးပိုင်းဆိုင်ရာ ကူညီထောက်ပံ့ပေးသင့်ကြောင်း ဝေဖန်ပြောဆိုသံများ ထွက်လာသည်။

ယင်းကဲ့သို့ PSLF/ TNLA မှ CDM မပြုလုပ်သူများကို အရေးယူ ဆောင်ရွက်မည်ဟု ထုတ်ပြန်ကြေညာ လာခြင်း နှင့် ပတ်သက်ပြီး TNLA တပ်ဖွဲ့၏ ပြောရေးဆိုခွင့် ရှိသူ ဗိုလ်မှူးကြီး တားအိုက်ကျော်ထံသို့ ဖုန်းဖြင့် အကြိမ်ကြိမ် ဆက်သွယ်မေးမြန်းခဲ့သော်လည်း ဖုန်းလက်ခံ ဖြေကြားခြင်း မရှိခဲ့ပေ။