သျှမ်းပြည်ရှိ မြန်မာ – တရုတ် ၊ မြန်မာ – ထိုင်း နယ်စပ် ကုန်သွယ်ရေး စခန်းများမှ တဆင့် တဖက်နိုင်ငံသို့ ဆန်နှင့် ဆန်ထွက် ပစ္စည်းများ တင်ပို့မှုမှ ရရှိလာသည့် ပို့ကုန်ရငွေများ၏ ၆၅ ရာခိုင်နှုန်းကို စစ်ကောင်စီ လက်အောက်ခံ ဗဟိုဘဏ်ဈေး နှင့် လဲလှယ်ရမည်ဟု စစ်ကောင်စီဘက်မှ ထုတ်ပြန်လာသည့်အတွက် ဆန်ကုန်သည်များက အခက် တွေ့နေကြောင်း သတင်းသိရသည်။

မတ်လ ၁ ရက်နေ့မှ စတင်ပြီး ဆန် နှင့် ဆန်ရောင်းရငွေများ၏ ၆၅ % ကို ဗဟိုဘဏ်နှင့် လဲလှယ်ရမည်ဟူသည့် စစ်ကောင်စီ၏ ထုတ်ပြန်ကြေညာစာကို ဖေဖော်ဝါရီ (၂၃) ရက်တွင် ထုတ်ပြန်ထားသည်။

ယင်းကဲ့သို့ ထုတ်ပြန်ကြေညာခြင်း နှင့် ပတ်သက်ပြီး နယ်စပ် ဆန်ကုန်သည်များ အနေဖြင့် ဆန်တစ်အိတ်ကို မြန်မာ ငွေကျပ် တစ်သောင်းကျော် ဆုံးရှုံးနေရကြောင်း မြန်မာ – တရုတ် နယ်စပ် ဆန်ကုန်သည် အမျိုးသား တစ်ဦးက သျှမ်းသံတော်ဆင့်ကို ပြောသည်။

“ဒီဟာကို ၆၅ – ၃၅ ဆိုပြီးတော့ ကျနော်တို့က အလွယ်မှတ်ထားတယ်၊ သူက ဆန်နဲ့ ဆန်ထွက်ပစ္စည်း တင်ပို့ ရောင်းရငွေ ၆၅ ရာခိုင်နှုန်းကို ဗဟိုဘဏ်ဈေးနဲ့ လဲလှယ်ရမယ်၊ ဒါပေမဲ့ ၃၅ ရာခိုင်နှုန်း ကိုတော့ ပြင်ပဈေးနဲ့ လဲလို့ရတယ်၊ ဒါတွေကြောင့် ဆန်တစ်အိတ်ကို ကျပ် ၁၁,၈၀၀ ကျပ်လောက် ရှုံးနေရတယ်” ဟု ဆန်ကုန်သည်က သျှမ်းသံတော်ဆင့်ကို ပြောသည်။

စစ်ကောင်စီ တပ်ဖွဲ့၏ ထိန်းချုပ်မှုကြောင့် ပြည်တွင်းဆန်ဈေးနှုန်း အနည်းငယ် ကျဆင်းလာသော်လည်း ဆန်ထွက် ရာသီ မဟုတ်ချိန် ဆန်ဈေးကျခြင်းသည် ပုံမှန်အနေအထား မဟုတ်သည့်အတွက် ကုန်သည်များက အရှုံးပေါ် နေကြောင်းဆန်ကုန်များက ပြောဆိုဝေဖန် နေကြသည်။

“လက်ရှိအချိန်မှာ ပြည်တွင်း ဆန်ဈေးက ကျလာပေမယ့် ဆန်ကုန်သည်တွေက အဝယ်မလိုက်တော့ဘူး၊ အခု ဈေး အရဆိုရင် ဘယ်လိုနေနေ ရှုံးမယ်ဆိုတော့လေ ၊ တရုတ်ဘက်ကို ဈေးတင်ပြီးရောင်းနိုင်ပေမဲ့လည်း မသေချာ တော့ အဝယ်ကိုရပ်ထားရတယ်” ဟု အထက်ပါ ဆန်ကုန်သည်က ဆက်ဆိုသည်။

ယခင် နယ်စပ်ကုန်သွယ်ရေး၌ လယ်ယာထွက်ကုန်များ ဖြစ်သည့် ပဲမျိုးစုံ၊ ဆီထွက်သီးနှံ၊ ပြောင်း၊ ရာဘာနှင့် ရေထွက် ကုန်ပစ္စည်းများ၏ ပို့ကုန်ရငွေများကိုသာ သတ်မှတ်ဈေး ၆၅ ရာခိုင်နှုန်း လဲလှယ်ရန် သတ်မှတ်ထားရာမှ ယခုအခါ ဆန် နှင့် ဆန် ကွဲကိုပါ ထည့်သွင်းလာခြင်း ဖြစ်သည်။

ကုန်သည်များ အနေဖြင့် ငွေလဲသည်ဖြစ်စေ မလဲသည်ဖြစ်စေ ဘဏ်အကောင့်ထဲတွင် ပို့ကုန်တင်ပို့မှုမှ ဒေါ်လာ သို့မဟုတ် ယွမ် ငွေဝင်လာသည်နှင့် စစ်ကောင်စီ၏ ဗဟိုဘဏ်က ၆၅ ရာခိုင်နှုန်းကို ဖြတ်ယူထားမည်ဖြစ်ပြီး ကျန် ၃၅ ရာခိုင်နှုန်းကို တလအတွင်း ကုန်သည်ကြိုက်ဈေး နှင့် လဲလှယ်နိုင်ကြောင်း ကန့်သတ်ထားသည်။

ယခင် နယ်စပ်ကုန်သွယ်ရေး၌ လယ်ယာထွက်ကုန်များ ဖြစ်သည့် ပဲမျိုးစုံ၊ ဆီထွက်သီးနှံ၊ ပြောင်း၊ ရာဘာနှင့် ရေထွက် ကုန်ပစ္စည်းများ၏ ပို့ကုန်ရငွေများကိုသာ သတ်မှတ်ဈေး ၆၅ ရာခိုင်နှုန်း လဲလှယ်ရန် သတ်မှတ်ထားရာမှ ယခုအခါ ဆန် နှင့် ဆန် ကွဲကိုပါ ထည့်သွင်းလာခြင်း ဖြစ်သည်။

ဗဟိုဘဏ် သတ်မှတ်စျေးမှာ တဒေါ်လာလျှင် ငွေကျပ် ၂,၁၀၀ ဖြစ်ပြီး ပြင်ပ ကျပ်နှင့် ဒေါ်လာဈေး လဲလှယ်မှုများက ၂,၉၀၀ နီးပါး ဝန်းကျင်ဖြင့် အရောင်းအဝယ် ဖြစ်နေကြောင်း သိရသည်။