သျှမ်းပြည် မူဆယ်ခရိုင် နမ့်ခမ်းမြို့မှ အမျိုးသမီး တစ်ဦး ပြန်ပေးဆွဲ ဖမ်းဆီးခံရပြီး မြန်မာကျပ်ငွေသိန်း ၆၀၀ ဖြင့် လာရောက်လဲလှယ်ခိုင်းကြောင်း သတင်းသိရသည်။

ပြီးခဲ့သည့် ဖေဖော်ဝါရီလ ၂၄ ရက်တွင် နမ့်ခမ်းမြို့နေ အသက် ၃၇ နှစ်အရွယ်ရှိ နန်းခင်မာဦးကို မျက်နှာဖုံးစွပ် အမျိုးသား နှစ်ဦးမှ ဆိုင်ကယ်နှစ်စီးဖြင့် လာရောက်ဖမ်းဆီးသွားပြီး ပိုက်ဆံ သိန်း ၆၀၀ ကျပ်ဖြင့် လာရောက် လဲလှယ်ရန် မိသားစုဝင်များကို ခြိမ်းခြောက်ပြောဆိုခဲ့ကြောင်း သတင်းသိရသည်။

“သူတို့အိမ်က ကုန်စုံဆိုင်လေးဖွင့်ထားပါတယ်၊ အဲ့အမျိုးသားနှစ်ယောက် ပထမအကြိမ်လာတုန်းက ဈေးဝယ် သလိုလိုနဲ့ စကားပြောပြီး ပြန်ထွက်သွားတယ်၊ ဒုတိယ တခေါက်ထပ်လာပြီးတော့ ဖမ်းသွားတာ၊ သူတို့က သူမ မိသားစုတွေဆီ ဖုန်းဆက်လာပြီး ပိုက်ဆံ သိန်း ၆၀၀ ကျပ်နဲ့ ပြန်လာရွေးဖို့ ပြောတယ်၊ ဖုန်းထဲကနေ သေနတ် ငါးချက်လည်း ပစ်ပြတယ်” ဟု ဖြစ်စဥ်ကို သိရှိသူ ဆွေမျိုးတော်စပ်သည့် အမျိုးသားတစ်ဦးက သျှမ်းသံတော်ဆင့်ကို ပြောသည်။

ပြန်ပေးဆွဲသူတို့ တောင်းဆိုသည့် ငွေကျပ် သိန်း ၆၀၀ မရှိကြောင်း မိသားစုဝင်များက ပြန်ပြောသည့်အချိန်တွင် ဖုန်းထဲမှတစ်ဆင့် သေနတ်ငါးချက် ပစ်ဖောက်မှု ရှိခဲ့သည်။

မိသားစုဝင်များက ဆွေမျိုးများ နှင့် နီးစပ်သူများထံ ငွေကြေးချေးငှားပြီး ပိုက်ဆံ သိန်း ၈၀ ကျပ် ရရှိလာသည့် အတွက် အဆိုပါ သိန်း ၈၀ ကျပ်ဖြင့်ပင် နန်းခင်မာဦးကို ပြန်လည် ရွေးယူခဲ့ရကြောင်း အထက်ပါ အမျိုးသားက ဆက်ပြောသည်။

“မိသားစုဝင်တွေကလည်း ပိုက်ဆံ သိန်း ၆၀၀ ကျပ် မပြောနဲ့ ၆၀ တောင် မရှိဘူးပြောတယ်၊ ဒါပေမဲ့ အရပ်ထဲ ရွာထဲ ဆွေမျိုးတွေကနေ ပိုက်ဆံတွေ လိုက်ချေးတော့ သိန်း ၈၀ လောက်ရလာတယ်၊ အဲ့ဒါနဲ့ ပြန်ပေးဆွဲ လုပ်တဲ့ သူတွေကို ဖုန်းပြန်ဆက်တော့ သဘောတူတယ်ဆိုပြီး ပိုက်ဆံထုပ်ကို မူဆယ် – နမ့်ခမ်း ကြားက တိုးဂိတ်နားမှာ သွားထားပေးရတယ်၊ လူကိုလည်း မနေ့က မနက်ပိုင်း အဲ့နေရာမှာပြန်လာပေးတာ” ဟု ၎င်းက ဆိုသည်။

မိသားစုဝင်များမှ ပိုက်ဆံ သိန်း ၈၀ ကို တိုးဂိတ်နား သွားထားလိုက်ပြီးနောက် ဖေဖော်ဝါရီလ ၂၆ ရက် နံနက်ပိုင်း တွင် နန်းခင်မာဦးကို ပြန်ပေးဆွဲသူတို့က မူဆယ် – နမ့်ခမ်းကြား တိုးဂိတ်နားတွင် ပြန်လွှတ်ပေးခဲ့ ကြောင်း သိရသည်။

လက်ရှိတွင် နန်းခင်မာဦးသည် နေအိမ်သို့ ပြန်လည်ရောက်ရှိလာသော်လည်း ကြောက်ရွံ့တုန်လှုပ်မှုများ ရှိနေသေးကြောင်း သိရသည်။

စစ်တပ်မှနိုင်ငံတော် အာဏာသိမ်းယူပြီးနောက်ပိုင်း နိုင်ငံ နှင့် တစ်ဝှမ်းလုံး၌ တရားဥပဒေ စိုးမိုးမှု ကင်းမဲ့လာပြီး တရားမဝင် ငွေရှာချင်သည့် သောင်းကျန်းသူ အဖွဲ့များက ကလေးငယ်များ၊ အမျိုးသမီးများကို ပြန်ပေးဆွဲ ပြုလုပ်လာကြသည့်အတွက် ဒေသအတွင်း လုံခြုံရေးများလည်း ကင်းမဲ့နေသည်။

ထို့အပြင် နယ်စပ် ဒေသဖြစ်ကြသည့် မူဆယ်၊ နမ့်ခမ်း နှင့် တာချီလိတ်တို့လို နေရာများ၌ လူဝင်လူထွက် များပြားပြီး လက်နက်ကိုင် တပ်ဖွဲ့ ပေါင်းစုံက ဝင်ထွက်သွားလာနေသည့်အတွက် ရာဇဝတ်မှုလည်း ပိုမိုများပြားသည်။