Thursday, May 30, 2024

သျှမ်းပြည်အမျိုးသားနေ့ကို သျှမ်းတပ် ၂ တပ် ဌာနချုပ် တွင် ကျင်းပ

Must read

ယနေ့ (ဖေဖော်ဝါရီ ၇) ရက် သျှမ်းပြည်အမျိုးသားနေ့ (၇၆) နှစ်ပြည့် ကို သျှမ်းပြည်အတွင်းရှိ သျှမ်းတပ် ၂ တပ် သျှမ်းပြည်ပြည်လည်ထူထောင်ရေးကောင်စီ ၊ သျှမ်းပြည်တပ်မတော် (RCSS/SSA) နှင့် ရှမ်းပြည် တိုးတက်ရေးပါတီ၊ ရှမ်းပြည်တပ်မတော်( SSPP/SSA )တို့၏ ဌာနချုပ်များတွင် ကျင်းပခဲ့ကြောင်း သိရှိရသည်။

SSPP

ရှမ်းပြည်တိုးတက်ရေးပါတီ SSPP/SSA ၏ ဝမ်ဟိုင်း ဌာနချုပ်တွင် ကျင်းပပြုလုပ်သည့် သျှမ်းပြည် အမျိုးသားနေ့ အခမ်းအနားကို လူဦးရေ ၃ ထောင်ခန့် တက်ရောက်ခဲ့ကြောင်း SSPP ပြောရေးဆိုခွင့်ရှိသူ ဒု- ဗိုလ်မှူးကြီး စိုင်းဆု က သျှမ်းသံတော်ဆင့်ကို ပြောသည်။

” တပ်သားတွေနဲ့ ပြည်သူတွေရော တက်ရောက်လာတဲ့သူတွေ ၃ ထောင်ဝန်းကျင်လောက်ရှိတယ်။ တပ်သားတွေကတော့ ၁ ထောင်လောက်တက်ရောက်တယ်။ ဒီနေ့ အစီစဉ်ကတော့ ကျနော်တို့ ဗိုလ်ချုပ်ကြီး ဆေထျဲန်က မိန့်ခွန်ပြောကြားတယ်။ နိုင်ငံရေးပါတီတွေက ပေးပို့လာတဲ့ သံဝဏ်လွှာတွေကို ဖတ်ကြားတယ်။ ပြီးတော့ သျှမ်းပြည်အလံ နဲ့ ကျဆုံးသွားတဲ့ ရဲဘော်တွေကို အလေးပြုတာတွေပဲ ပြုလုပ်ခဲ့တယ်” ဟု ဒု ဗိုလ်မှူးကြီး စိုင်းဆုက ပြောသည်။

SSPP

ဝမ်းဟိုင်ဌာနချုပ်တွင် သျှမ်းပြည်အမျိုးသားနေ့ကို နံနက် ၈ နာရီမှ ၁၀ နာရီ အထိ ကျင်းပပြုလုပ်ခဲ့ကြောင်း သိရသည်။

ထိုအပြင် SSPP/SSA တပ်ဖွဲ့အနေဖြင့် သျှမ်းအမျိုးသားနေ့အတွက် စစ်ကောင်စီတပ်ဘက်ကို ဖိတ်ကြားခြင်းမရှိကြောင်း သိရသည်။

အလားတူ သျှမ်းပြည်ပြန်လည်ထူထောင်ရေးကောင်စီ ၊ သျှမ်းပြည်တပ်မတော်သည် RCSS/SSA သည်လည်း လွိုင်တိုင်းလျန်းတွင် သျှမ်းပြည်အမျိုးသားနေ့ကို နံနက် ၇ နာရီမှ အစီစဉ်ကို စတင်ကျင်းပခဲ့ကြောင်းသိရသည်။

RCSS

RCSS/SSA ဌာနချုပ်တွင် ပြုလုပ်သည့် သျှမ်းပြည်အမျိုးသားနေ့ကို EAOs အဖွဲ့အစည်းများ ၊ PPSTအဖွဲ့ဝင်များ နှင့် စစ်ကောင်စီတပ်မှ ကိုယ်စားလှယ်များ တက်ရောက်ခဲ့ကြောင်း သိရသည်။

စစ်ကောင်စီတပ် ဒုဗိုလ်ချုပ်ကြီး အေးဝင်းဦးဆောင်ပြီး ၊ ကျိုင်းတုံမြို့ တြိဂံဒေသ ဒုတိုင်းမှူး ၊ အရှေ့အလယ်ပိုင်း ခိုလမ် ဒုတိုင်းမှူး နှင့် PPST အဖွဲ့ဝင်များဖြစ်သည့် ရခိုင်ပြည်လွတ်မြောက်ရေးတပ်မတော်( ALP) ၊ လားဟူဒီမိုကရက်တစ်အစည်းအရုံး (LDU) ၊ ပအိုဝ်းအမျိုးသားလွတ်မြောက်ရေး တပ်မတော်( PNLO) ၊ မြန်မာနိုင်ငံလုံးဆိုင်ရာ ကျောင်းသားများ ဒီမိုကရက်တစ်တပ်ဦး (ABSDF) တို့က တက်ရောက်ခဲ့ကြောင်း RCSS/SSA ပြောရေးဆိုခွင့်ရှိသူ ဗိုလ်မှူး စိုင်းခမ်းစံက ပြောသည်။

” စစ်ကောင်စီဘက်ကတော့ ဒုဗိုလ်ချုပ်ကြီးအေးဝင်း ဦးဆောင်ပြီးတော့လာတယ်။ ပြီးတော့ တိုင်းရင်းသား လက်နက်ကိုင်ထဲကတော့ ALP၊ LDU၊ PNLO၊ ABSDF တို့ တက်ရောက်ခဲ့တယ်။ တစ်ချို့ အမည်မဖော်ပဲ တက်ရောက်ခဲ့တာရှိတယ်။ တက်ရောက်တဲ့သူတွေကတော့ ၁ ထောင်ကျော်လောက်ရှိပါတယ်” ဟု ဗိုလ်မှူး စိုင်းခမ်းစံက ပြောသည်။

ယနေ့ သျှမ်းပြည်အမျိုးသားနေ့ကို ၁၉၄၇ ခုနှစ် ဖေဖေါ်ဝါရီလ ၇ ရက်နေ့တွင် ပင်လုံညီလာခံမှာ စော်ဘွားကိုယ်စားလှယ် ၇ ပါး ၊ လူထုကိုယ်စားလှယ် ၇ ဉီး တန်းတူထိုင်ပြီး လွတ်လပ်ရေးအတူတကွ ရယူရန် သျှမ်းပြည်ကောင်စီကို သဘောတူ ဖွဲ့စည်းခဲ့သောကြောင့် ထိုနေ့ကို သျှမ်းပြည်အမျိုးသားနေ့အဖြစ် သတ်မှတ်ထားခဲ့သည်။

Leave a Comments

- Advertisement -spot_img

Latest article