ထိုင်းနိုင်ငံ ဘန်ကောက်မြို့တွင် မြန်မာရွှေ့ပြောင်း အလုပ်သမားတစ်ဦး လမ်းမပေါ်၌ ပန်းရံ အလုပ်လုပ်နေစဉ် မိုးကြိုးပစ်ခံရပြီး သေဆုံးသွားကြောင်း စုံစမ်းသိရှိသည်။
ယမန်နေ့ (ဖေဖော်ဝါရီ ၅) ရက် ညနေပိုင်း ၃ နာရီ ဝန်းကျင်တွင် ဘန်ကောက်မြို့ ဖဟွန်ယိုးထင်းလမ်းမပေါ်၌ မိုးသည်းထန် ရွာသွန်းမှု နှင့် အတူ မိုးခြိန်းသံများ ဖြစ်ပေါ်နေချိန် အသက် ၂၁ နှစ်အရွယ် အောင်ထူးစိုးက ဘိလပ်မြေဖျော်နေစဉ်အတွင်း လမ်းမပေါ်၌ မိုးကြိုးပစ်ခံရပြီး သေဆုံးသွားကြောင်း သိရသည်။
“မောင်လေး ဆုံးသွားတာတော့ မထင်မှတ်ဘဲ ဖြစ်လာတဲ့ အကြောင်းလို့ဘဲ ပြောရမှာပေါ့။ မတော်တဆ မိုးကြီးလေကြီးနေတဲ့အချိန်မှာ မီးကြိုးပစ်ခံရပြီး သေဆုံးသွားတာ။ သူ့အလုပ်က လူတွေလည်း ပြောပြပါတယ် သူဘိလပ်မြေဖျော်နေတုန်းမှာ မိုးကြိုးပစ်ကွင်းထဲမှာရှိလို့ ပစ်ခံရပြီး သေဆုံးသွားတယ် “ ဟု ၎င်း အစ်မဖြစ်သူတစ်ဦးက ပြောသည်။
အဆိုပါ အောင်ထူးစိုးက မိုးကြိုးပစ်ခံရပြီးနောက်ပိုင်း သက်ဆိုင်ရာ ရဲတပ်ဖွဲ့က လာရောက်အလောင်းသယ်ယူကာ စစ်ဆေးမှုများ ပြုလုပ်ခဲ့ကြောင်း သိရသည်။
